27 Nov 2024, 08:52
އިންޑިއާގެ މަޝްހޫރު ރެޕް ލަވަކިޔުންތެރިޔާ ބާދްޝާހް ހިންގާ ކެފޭއެއްގެ ކައިރީ ބާރު ގަދަ ދެ ބޮން ގޮއްވާލުމާ ގުޅިގެން ފުލުހުން އެ މައްސަލަ ބަލަން ފަށައިފިއެވެ.
ޗަންދިގަރުގައި ހުންނަ ދަ ޑެއޮރާ ކްލަބް ކެފޭގައި މި ބޮންތަކެއް ގޮއްވާލާފައި ވަނީ އިއްޔެގެ ފަތިހު ހަތަރެއް ޖަހާކަށްހާއިރު ކަމަށް ރިޕޯޓުތައް ބުނެއެވެ. މަންޒަރު ދުށް މީހުން ރިޕޯޓުކުރި ގޮތުގައި ބޮންތައް ގޮއްވާލުމުގެ ކުރިން އެ ސަރަހައްދުން ދެ މީހަކު ސައިކަލެއްގައި ހަރަކާތްތެރިވި މަންޒަރު ވަނީ ފެނިފައެވެ.
ނަމަވެސް ބޮންތައް ގޮވުމާ އެކު އެ ދެމީހުން އެ ސަރަހައްދުން ފިލާފައިވާ ކަމަށް މަންޒަރު ދުށް މީހުން ވަނީ ބުނެފައެވެ. މި ބޮމުގެ ހަމަލާގައި އެއްވެސް މީހަކަށް ގެއްލުމެއް ވެފައިވާ ކަމަށް މިހާތަނަށް ރިޕޯޓު ކުރެވިފައެއް ނުވެއެވެ. އެހެންނަމަވެސް ރެޕަ ބާދްޝާހްގެ ކެފޭގެ ދެ ލައުންޖެއްގެ ބިއްލޫރިތައް ތަޅައިގެން ގޮސް ކެފޭއަށް ބޮޑެތި ގެއްލުންތަކެއް ލިބިފައިވާ ކަމަށް ރިޕޯޓުތައް ބުނެއެވެ.
ބާދްޝާހް މިހާރު ޖަޖެއްގެ ގޮތުގައި މަސައްކަތް ކުރަމުން އަންނަ އިންޑިއަން އައިޑަލް ޝޯގައި--ފޮޓޯ/ޕޭސްބުކް
މި ބޮމުގެ ހާދިސާއާ ގުޅިގެން ފުލުހުން ބުނެފައި ވަނީ އެ ސަރަހައްދުގެ ސީސީޓީވީ ފުޓެޖްތައް ޗެކްކުރަމުން އަންނަ ކަމަށާއި މައްސަލައިގެ ތަހުގީގު ނިމުނުހާ އަވަހަކަށް މައުލޫމާތު ރަސްމީކޮށް އާންމު ކުރާނެ ކަމަށެވެ.
މި ހާދިސާ ހިނގި ދުވަހުގެރޭ ދަންވަރުގެ ވަގުތެއްގައި ވެސް އިންޑިއާގެ ޕަންޖާބްގެ މާންސާ ޑިސްޓްރިކްޓްގައި ހުންނަ ޕެޓްރޯލް ޕަމްޕެއް ކައިރީ ވެސް ބަޔަކު މީހުން ވަނީ ގްރެނޭޑްތަކެއް ގޮއްވާލާފައެވެ. މި ހާދިސާގެ ފަހަތުގައި ތިބި މީހުން ވަނީ އެ ޕެޓްރޯލް ޕަމްޕްގެ ވެރިމީހާގެ ކިބައިން ފަސް ކްރޯޑު ރުޕީސްއަށް ޑިމާންޑުކޮށްފައެވެ.
ބާދްޝާހްގެ ކެފޭ ކައިރީގައި ގޮއްވާލި ގޮއްވާލުން ތަކާއެކު ހައި ޕްރޮފައިލް މީހުންގެ ވިޔަފާރިތައް ހިންގާ ސަރަހައްދުތަކަށް ސެކިއުރިޓީ ވަރުގަދަކޮށްދިނުމަށް ގިނަ ބަޔަކު ވަނީ ގޮވާލާފައެވެ.