25 Nov 2024, 14:40
ސްޕެއިންގެ މަގާލާގައި ބޭއްވި ޑޭވިސް ކަޕް ޓެނިސް މުބާރާތުގެ ތަށި އިޓަލީވިލާތުން ދިފާއު ކޮށްފިއެވެ.
މިމުބާރާތުގެ ތަށި އިޓަލީވިލާތުން ދިފާއު ކޮށްފައިވަނީ ރޭ ކުޅުނު ފައިނަލްގައި ނެދަލަންޑްސްއާ ބައްދަލުކޮށް ސިދާ ދެމެޗުން ކާމިޔާބު ހޯދައިގެންނެވެ. ފައިނަލްގެ ފުރަަތަމަ މެޗުގައި ބައްދަލު ކުރީ އިޓަލީވިލާތުގެ މަޓިއޯ ބެރެޓީނީ އާއި ނެދަލަންޑްސްގެ ބޮޓިކް ވެން ޑެ ޒަންޑްޗުލްޕްއެވެ. ވާދަވެރި ކުޅުމެއް ފެނުނު މިމެޗު ސީދާ ދެސެޓުން ކާމިޔާބު ކޮށްފައިވަނީ ބެރެޓީނީއެވެ. މިމެޗުގެ ފުރަތަމަ ސެޓު ބެރެޓީނީ ކާމިޔާބު ކޮށްފައިވަނީ ހައެއް ހަތަރަކުންނެވެ.
މިމެޗުގެ ދެވަނަ ސެޓުގައި ބެރެޓީނީ ފެނުނީ ތަފާތު ކުޅުންތެރިއެއްގެ ގޮތުގައެވެ. މިސެޓުގައި ބެރެޓީނީ ވަނީ ވަރަށް މޮޅު ކުޅުމެއް ދައްކައި ހައެއް ދެއަކުން މިސެޓު ކާމިޔާބުކޮށް އެއް މެޗުގެ ލީޑެއް އިޓަލީވިލާތަށް ނަގައިދީފައެވެ. މިދިޔަ އަހަރު އިޓަލީވިލާތުން ޑޭވިސް ކަޕް ކާމިޔާބުކުރިއިރު އަނިޔާގެ ސަބަބުން ޓީމާ ގުޅުމުގެ ފުރުސަތު ނުލިބުނު ބެރެޓީނީ ކުޅުމާ ދުރުގައި ހަ މަސް ދުވަހު ހުރުމަށްފަހު އެނބުރި އައިސްފައިވަނީ މިއަހަރުގެ މާޗް މަހުގެ ތެރޭގައެވެ.
މެޗަށްފަހު ވާހަކަ ދައްކަމުން ބެރެޓީނީ ބުނީ އަލުން ކުޅުމުގެ ތެރެއަށް އައިސް އިޓަލީވިލާތް ތަމްސީލް ކުރުމުގެ ފުރުސަތު ލިބުމުން ވަރަށް އުފާވާކަމަށެވެ.
މިފައިނަލްގެ ދެވަނަ ސިންގަލަސް މެޗުގައި އިޓަލީވިލާތުގެ ފަރާތުން ދުނިޔޭގެ އެއްވަނަ ފިރިހެން ކުޅުންތެރިޔާ ޔަނިކް ސިނާ ވާދަކުރިއިރު ނެދަލަންޑްސް ޓީމުގެ ފަރާތުން ވާދަކޮށްފައިވަނީ ޓެލޮން ގްރީކްސްޕޯއެވެ. މިމެޗު ސީދާ ދެސެޓުން ކާމިޔާބު ކޮށްފައިވަނީ ސިނާއެވެ.
މިމެޗުގެ ފުރަތަަމަ ސެޓު ވަރަށް ވާދަވެރިކޮށް ކުޅުމަށްފަހު ސިނާ ކުރި ހޯދީ ޓައި ބްރޭކަކަށް ގޮސް ހަތެއް ދެއަކުންނެވެ. މިސެޓު ދިގުލައިގެންދިޔައިރު ސިނާގެ ފަރާތުން ކޮންމެވެސް ވަރަކަށް ވަރުބަލިކަން އިހުސާސްކުރެވޭ ކަމުގެ އިޝާރާތްތައް ފެނުނެވެ. އަދި ދެވަނަ ސެޓުގެ ކުރީކޮޅު ސިނާގެ ސާވިސް ގްރީކްސްޕޯ ބްރޭކް ކުރުމާއެކު އިޓަލީވިލާތުގެ ޓީމަށް ކޮންމެވެސް ވަރެއްގެ ކަންބޮޑު ވުމެއް އިހްސާސް ކުރެވުނެވެ. ނަމަވެސް ސިނާގެ ކުޅުން އެހާ ހިސާބުން ފެނުނީ އެއް ދަރަޖަ މައްޗަށް ޖެހުނު ތަނެވެ. އޭނާވަނީ ޖެހިޖެހިގެން ހަތަރު ގޭމް ކާމިޔާބުކޮށް މިދިޔަ އަހަރު އުފުލާލި ޑޭވިސް ކަޕް އިޓަލީވިލާތަށް ދިފާއުކޮށްދީފައެވެ.
މިކާމިޔާބީއާއެކު އިޓަލީވިލާތް ވެފައިވަނީ ޑޭވިސް ކަޕްއަށް ފައިނަލް ސްޓޭޖް މީގެ 52 އަހަރު ކުރިން ތައާރަފް ކުރި ފަހުން މި މުބާރާތް ޖެހިޖެހިގެން ކާމިޔާބުކުރި ހަ ވަނަ ގައުމަށެވެ. މީގެއިތުރުން މި މޮޅާއެކު ސިނާއަށް މިވަނީ ވަރަށް ކާމިޔާބު ސީޒަނެއް ކާމިޔާބު ކަމާއެކު ނިންމާލުމުގެ ފުރުސަތު ލިބިފައެވެ.
ސިނާ ވަނީ އޭނާގެ ކެރިއަރުގެ ފުރަތަމަ ގްރޭން ސްލޭމް މުބާރާތް މިއަހަރު ކާމިޔާބު ކުރުމުގެ އިތުރުން ދުނިޔޭގެ ރޭންކިންގެ އެއްވަނައަށް ވެސް އަރާފައެވެ. މިސީޒަންގައި އޭނާ އޭޓީޕީ ޓުއާގައި ކުޅުނު 76 މެޗުގެ ތެރެއިން ބަލިވެފައިވަނީ އެންމެ ހަ މެޗުންނެވެ.
މެޗަށްފަހު ސިނާ ބުނީ އިޓަލީވިލާތް ތަމްސީލް ކުރުމަކީ ތަފާތު އިހްސާސްތަކެއް ކުރެވޭ ކަމެއް ކަމަށާއި ޑޭވިސް ކަޕަކީ އޭނާ ވަރަށް ބޮޑު އަހައްމިއްޔަތުކަމެއް ދޭ މުބާރާތެއްކަމަށެވެ.
މިކާމިޔާބީއާއެކު އިޓަލީވިލާތުން މިވަނީ މިފަހަރުގެ ޑޭވިސް ކަޕްގެ އިތުރުން ބިލީ ޖީން ކިންގް ކަޕްވެސް ކާމިޔާބު ކޮށްފައެވެ. އެހެން ކަމުން މިއީ އިޓަލީވިލާތުގެ ޓެނިހަށް ވަރަށް ޚާއްސަ ކަމެކެވެ.