25 Nov 2024, 13:26
ސްޕެނިޝް ލަލީގާގައި އެންމެ ފަހުގެ ޗެމްޕިއަން ރެއާލް މެޑްރިޑާއި ލެގާނޭސް ބައްދަލުކުރި މެޗު ކާމިޔާބުކޮށް ރެއާލް އިން ތާވަލްގެ އެއްވަނައިގާ އުޅޭ އެފްސީ ބާސެލޯނާ އާއި ދެމެދުގައިވާ ފަރަގު ކުޑަކޮށްފިއެވެ.
ލެގާނޭސްގެ ދަނޑުގައި ކުޅުނު މިމެޗު ރެއާލް އިން ކާމިޔާބު ކޮށްފައިވަނީ 0-3 އިންނެވެ. ރެއާލްއިން ގިނައިރު ބޯޅަ ގެންގުޅެ ގިނަ ހަމަލާ އުފެއްދި މިމެޗުގެ ފުރަތަމަ ހާފުގެ ބޮޑުބައިގާ ލެގާނޭސްއިން ވަނީ ރެއާލް އަށް ލަނޑެއް ޖެހުނަނުދީ ހިފަހައްޓާލައިފައެވެ.
ނަމަވެސް ލެގާނޭސްއަށް އިން ކުރި މިހިތްވަރު ފުރަތަމަ ހާފު ނިމެންދެން ހިފަހައްޓާލެވޭ ގޮތެއް ނުވިއެވެ. މިމެޗުގައި ރެއާލް އިން ކާމިޔާބުކުރި ފުރަތަމަ ލަނޑު މެޗުގެ 43 ވަނަ މިނެޓުގައި އެޓީމަށް ކާމިޔާބު ކޮށްދިނީ ކިލިއަން އެމްބާޕޭއެވެ. މިއީ މިސީޒަންގައި ލީގުގައި އޭނާ ކާމިޔާބުކުރި ހަތްވަނަ ލަނޑެވެ.
މި ލަނޑާއެކު ފުރަތަމަ ހާފު ނިމިގެންދިޔައީ ރެއާލް ކުރީގައި އޮވެގެންނެވެ. މި މެޗުގެ ފުރަތަމަ ހާފުގައި އެމްބާޕޭ އިތުރު ލަނޑެއް ކާމިޔާބުކުރި ނަމަވެސް އެލަނޑު ވަނީ އޮފް ސައިޑް ކަމަށް ދައްކާފައެވެ.
މިމެޗުގެ ދެވަނަ ހާފުގައި ރެއާލްއިން ހަމަލާއަށް އިސްކަން ދީގެން ކުޅުނު އިރު ލެގާނޭސް ފެނިގެންދިޔައީ ޑިފެންސަށް އިސްކަންދީގެން ކުޅެމުންދިޔަ ތަނެވެ. މި މެޗުގައި ރެއާލްގެ ދެވަނަ ލަނޑު މެޗުގެ 66 ވަނަ މިނެޓުގައި ކާމިޔާބު ކޮށްދިނީ ފެޑެރީކޯ ވަލްވާޑޭއެވެ. އަދި ފަހު ލަނޑު މެޗުގެ 85 ވަނަ މިނެޓުގައި ކާމިޔާބު ކޮށްދިނީ ޖޫޑް ބެލިންހަމްއެވެ. މިއީ އޭނާ މިސީޒަންގައި ރެއާލް އަށް ކާމިޔާބު ކޮށްދެވުނު ދެވަނަ ލަނޑެވެ. މި މެޗުގައި ލެގާނޭސްއަށް ރެއާލްގެ ގޯލާއި އަމާޒުކޮށް އެންމެ ހަމަލާއެއްވެސް ފިނުވާލެވިފައެއް ނުވެއެވެ.
މިކާމިޔާބީއާއެކު ރެއާލް މިހާރު އުޅެނީ ކުޅުނު 13 މެޗުން ލިބިފައިވާ 30 ޕޮއިންޓާއެކު ތާވަލްގެ ދެވަނައިގައެވެ. އަދި ބާސާ އާއި ދެމެދުގައިވާ ފަރަގު މިވަނީ މިހާރު ހަތަރު ޕޮއިންޓަށް ކުޑަކޮށްފައެވެ. އަދި ރެއާލް އެއްމެޗު ނުކުޅެ އޮތުމުން އެމެޗު ކާމިޔާބު ކޮށްފި ނަމަ މިފަރަގު އެންމެ ޕޮއިންޓަކަށް ކުޑަވެގެންދާނެއެވެ. އަދި ލެގާނޭސް އުޅެނީ 14 ޕޮއިންޓާއެކު ތާވަލްގެ 14 ވަނައިގައެވެ.