22 Nov 2024, 23:03
އިތުބާރުކުރެވޭ މަގާމެއްގައި ހުރެ، ކުޑަކުއްޖަކަށް ޖިންސީ ގޯނާކުރި މައްސަލަ ސާބިތުވެ، ހުކުމް ތަންފީޒުކުރަމުން ދިޔަ ގައިދީއަކު މިނިވަންކޮށްފައިވާކަމަށް ބުނެ ސޯޝަލް މީޑިއާގައި ފަތުރަމުންދާ ވާހަކަ މޯލްޑިވްސް ކަރެކްޝަނަލް ސާވިސްއިން ދޮގުކޮށްފިއެވެ.
މިކަމާ ގުޅިގެން ކަރެކްޝަނުން މިއަދު ނެރުނު ބަޔާނެއްގައި ވަނީ، ހއ. ހޯރަފުށީ އަންދަލީބުގެ، ހާޝިމް އަބޫބަކުރަކީ 2022ވަނަ އަހަރުން ފެށިގެން ޖަލުގައި ހުކުމް ތަންފީޒުކުރުމަށް ޖަލަށް ލާފައިވާ މީހެއް ކަމަށެވެ.
އިތުބާރުކުރެވޭ މަގާމެއްގައިހުރެ ކުޑަކުއްޖަކާމެދު ޖިންސީ އަމަލު ހިންގި މައްސަލައިގައި އޭނާ ޖަލަށްލީ 2022ވަނަ އަހަރެވެ. އޭނަގެ މައްޗަށް ހުކުމް ހުރީ 12 އަހަރާއި 5 މަހާއި 18 ދުވަހުގެ ޖަލު ހުކުމެކެވެ.
އޭނާ އަކީ 2022ވަނަ އަހަރުން ފެށިގެން އުނަގަނދުގެ މައްސަލައެއް ހުރެ އެކަމުގެ ވޭން ތަހަންމަލުކުރާ މީހެއް ކަމަށް ކަރެކްޝަނުގެ ބަޔާނުގައި ވެއެވެ. އަދި އޭނާގެ ސާޖަރީ ރާއްޖޭން ކުރެވެން ނެތްކަމަށް ޑޮކްޓަރުން ލަފާދިނުމުން ކަރެކްޝަނުގެ މެޑިކަލް ބޯޑުގެ ނިންމުމާ އެކު އޭނާ ރާއްޖޭން ބޭރަށް ބޭސްފަރުވާއަށް ދިއުމުގެ ހުއްދަ އޮގަސްޓު މަހުގެ ފަސްވަނަ ދުވަހު ދިން ކަމަށް ވެސް އެ ބަޔާނުގައި ވެއެވެ.
އެ ބަޔާނުގައި ވަނީ، ބޭސްފަރުވާ ހޯދުމަށްފަހު މިދިޔަ ހޮނިހިރު ދުވަހު އޭނާ މާލެ އައިސްފައި ވާކަމަށެވެ.
"އަދި ހާޝިމް އަބޫބަކުރުގެ ބަލި ހާލަތު ހުރި ގޮތުން، ޑޮކްޓަރު ދެއްވާފައިވާ ރިކަމެންޑޭޝަންއާ އެއްގޮތަށް ޖަލުގައި ބަހައްޓައިގެން ފަރުވަ ނުދެވޭނެތީ އޭނާ ވަނި ހުކުމް ތަންފީޒު ކުރުމަށް ވަގުތީ ގޮތުން ގޭބަންދުގައި ބެހެއްޓިފައި،" އެ ބަޔާނުގައި ވެއެވެ.
އާންމު އުސޫލުގެ ދަށުން ކަރެކްޝަނުން ހާޝިމް މޮނީޓާކޮށް، ބަލަހައްޓަމުންދާކަމަށް ވެސް އެ ޚިދުމަތުން ވަނީ ބުނެފައެވެ.
ހާޝިމް މިނިވަންކޮށްފައި ވާކަމަށް ބުނެ ސޯޝަލް މީޑިއާގައި ގިނަ އަދަދެއްގެ މީހުން ވަނީ އެކަމާ ގުޅިގެން ސަރުކާރަށް ވަރަށް ބޮޑަށް ފާޑުކިޔާފައެވެ. ސޯޝަލް މީޑިއާގައި ތުހުމަތުކުރާ ގޮތުގައި ހާޝިމް މިނިވަންކުރީ ރައްޔިތުންގެ މަޖިލީހުގައި ސަރުކާރު ތަމްސީލުކުރާ މެމްބަރަކާ އޭނާއާ އާއިލީގޮތުން ގުޅުން އޮންނާތީއެވެ.