21 Nov 2024, 10:42
ވިމެން އިން މެނޭޖްމެންޓް މޯލްޑިވްސް (ވިމް) އާއި ވޯލްޑް ބޭންކުގެ އިންޓަނޭޝަނަލް ފައިނޭންސް ކޯޕަރޭޝަން (އައިއެފްސީ)ން ގުޅިގެން ދިވެހި އަންހެނުންނަށް ޚާއްސަކޮށްގެން ބާއްވާ "ޕްރޮފެޝަނަލް އެންޑް ކެރިއާ ވިމެން އެވޯޑްސް 2024" ބޭއްވުމަށް ނިންމައިފިއެވެ.
މި އަހަރުގެ ޕްރޮފެޝަނަލް އެންޑް ކެރިއާ ވިމެން އެވޯޑްސްގައި ޚާއްސަކޮށް ވިޔަފާރި އަދި ކެރިއަރުގައި ކާމިޔާބު ހޯދާފައިވާ ދިވެހި އަންހެނުން ފާހަގަކޮށް، އެ މީހުންގެ އަގުވަޒަން ކުރުމަށް ވަނީ ހަމަޖެހިފައެވެ. އަދި މި އެވޯޑު ދިނުމުގައި އައިއެފްސީއިން ބައިވެރިވުމަކީ ގާބިލުކަމާއި ހުނަރު ލިބިފައިވާ ދިވެހި އަންހެނުންނަށް އައު ފުރުސަތުތަކެއް ހުޅުވިގެން ގޮސް، އިގުތިސާދީ ކުރިއެރުން ލިބުމަށް މަގުފަހިވެގެންދާނެ ކަމެއް ކަމަށް ވިމްއިން ބުނެއެވެ.
ވިމްގެ ފައުންޑާ އަދި ޗެއާޕާސަން ޑރ. ސުލޯޗަނާ ސެގޭރާ ވިދާޅުވީ ކޮންމެ ވެސް ވަރެއްގެ ކުރިއެރުންތަކެއް ލިބިފައިވީ ނަމަވެސް، އަދިވެސް ރާއްޖޭގައި ޖިންސުގެ ހަމަހަމަކަން ހޯދުމާއި އަންހެނުންގެ އިގުތިސާދީ ބާރުވެރިކަން ހޯދުމުގައި ދިމާވާ ގޮންޖެހުންތައް އަދި ވެސް ދެމިއޮތް ކަމަށެވެ. އެ ގޮތުން ރާއްޖޭގެ ވަޒީފާގެ ބާޒާރުގައި އަންހެނުންގެ ނިސްބަތްހުރީ 43 ޕަސަންޓުގައިކަން ފާހަގަކުރައްވައި އޭނާ ވިދާޅުވީ، މިއީ ފިރިހެނުންގެ ނިސްބަތަށް ބަލާއިރު، 79 ޕަސަންޓު ދަށް އަދަދެއް ކަމަށެވެ. އެހެންކަމުން، ދެމެހެއްޓެނިވި އަދި އެކުލެވޭ ކުރިއެރުމެއް ހޯދުމަށްޓަކައި، އަންހެނުންގެ ބައިވެރިވުން އިތުރުކުރުމާއި ވިޔަފާރި ދާއިރާގައި އަންހެނުންގެ ލީޑަޝިޕް ކުރިއެރުވުމަކީ ވަރަށް މުހިންމު ކަމެއް ކަމަށް އޭނާ ވިދާޅުވިއެވެ.
ސްރީލަންކާ، ކެނެޑާ، ޔުނައިޓެޑް ކިންގްޑަމް އަދި ޔުނައިޓެޑް އަރަބް އެމިރޭޓްސްގައި ވެސް ޕްރޮފެޝަނަލް އެންޑް ކެރިއާ ވިމެން އެވޯޑްސް ދެއެވެ. މި އެވޯޑް ލިބޭ ފަރާތްތަކަށް އަމިއްލަ ކެރިއަރު ނުވަތަ ވިޔަފާރީގެ މަގު ތަނަވަސް ވެގެންދާނެ ކަމަށް ވިމްއިން ބުނެއެވެ.
މިއީ ރާއްޖޭގައި މި އެވޯޑު ދޭ ހަވަަނަ އަހަރެވެ. ބޭންކިން އަދި ފައިނޭންސް، ހޮސްޕިޓަލިޓީ، މީޑިއާ، ޤާނޫނީ ދާއިރާ، ލޮޖިސްޓިކްސް އަދި ސަޕްލައި ޗެއިން ފަދަ ތަފާތު ގިނަ ދާއިރާތަކެއްގައި މަސައްކަތްކުރާ 170އަށްވުރެ ދިވެހި އަންހެނުންނަށް މީގެ ކުރިން މި އެވޯޑު ދީފައިވެއެވެ.
މި އެވޯޑުން ދައްކުވައިދެނީ މުވައްޒަފުންނާއި، ވިޔަފާރިވެރިންނާއި، ވިޔަފާރީގެ ލީޑަރުންގެ ގޮތުގައި ބޮޑެތި ބަދަލުތައް ގެނައުމުގައި އަންހެނުން އަދާކުރާ މުހިންމު ދައުރެވެ.