20 Nov 2024, 09:03
ސައުތު ސިނަމާއިން އާއްމުންގެ މަގުބޫލުކަން ހޯދުމަށްފަހު ބޮލީވުޑަށް ތައާރަފް ވުމަށް ތައްޔާރު ވަމުން އަންނަ ސައުތު ބަތަލާ ކީރްތީ ސުރޭޝް އަންނަ މަހު ކައިވެނި ކުރަން ތައްޔާރު ވަމުން އަންނަ ކަމަށް ރިޕޯޓުތައް ބުނެފިއެވެ.
ކީރުތީ ކައިވެނި ކުރަން ނިންމާފައި ވަނީ ޒަމާންވީ ލޯބިވެރިޔާ އެންތަނީ ތައްޓިލްއާ ކަމަށާއި މި ކައިވެނީގެ ހަފުލާތައް އަންނަ މަހުގެ 11 ނުވަތަ 12 ވަނަ ދުވަހު އިންޑިއާގެ ގޯއާގައި ބޭއްވޭނެ ކަމަށް މީޑިއާ ރިޕޯޓުތައް ބުނެއެވެ.
ދެ މީހުން ކައިވެނި ކުރަން ނިންމާފައި ވަނީ ލޯބީގެ ގޮތުން ގުޅިގެން އުޅޭތާ 15 އަހަރު ފަހުންނެވެ. ކީރުތީގެ ކައިވެނީގެ ޕްރީ-ވެޑިންގް ހަފްލާތައް ގޯއާގައި ކުރިއަށް ގެންދަން ރޭވިފައިވީ ނަމަވެސް ކައިވެނީގެ ރަސްމިއްޔާތު އޮންނާނީ ކެރެލާގައި ކަމަށް ރިޕޯޓުތައް ބުނެއެވެ.
ކީރުތީ އަދި ލޯބިވެރިޔާ އެންތަނީ ތައްޓިލްއާ--ފޮޓޯ/ޕިންކްވިލާ
ފިލްމީ ޚަބަރުތައް ބުނާގޮތުން މި ކައިވެނީގެ ރަސްމިއްޔާތުގައި ދެ ފަރާތުގެ އާއިލާގެ ގާތް މެމްބަރުން ބައިވެރިވާނެއިރު ދެ މީހުންގެ ވެސް ވަރަށް ގާތް އެކުވެރިން ކައިވެނީގެ ހަފްލާތަކުން ފެންނާނެއެވެ. ކައިވެނީގެ ޚަބަރު ވަރަށް އަވަހަށް ބަތަލާގެ ސަޕޯޓަރުންނާ ހިއްސާ ކުރާނެ ކަމަށް ވެސް ރިޕޯޓުތައް ބުނެއެވެ.
ތެލުގޫ، ތަމަޅަ އަދި މަލަޔާލަމް ފިލްމުތަކުން މިހާތަނަށް ފެނިފައިވާ 32 އަހަރުގެ ބަތަލާ ބޮލީވުޑަށް ތައާރަފްވާނެ ފިލްމަކީ އަންނަ މަހުގެ 25 ވަނަ ދުވަހު ރިލީޒްކުރާ ފިލްމު "ބޭބީ ޖޯން"އެވެ. ވަރުން ދަވަންގެ އިތުރުން ޖެކީ ޝްރޮފް އަދި ވަމީގާ ގައްބީ މުހިއްމު ރޯލް ކުޅޭ މި ފިލްމަކީ، ކާމިޔާބު ޑައިރެކްޓަރު އެޓުލީ 2016 ވަނަ އަހަރު ގެނެސްދިން ތަމަޅަ ފިލްމެއްގެ ރީ-މޭކްއެކެވެ.
ފިލްމު "ބޭބީ ޖޯން"ގެ ޓީޒާ ކަޓްއެއް މީގެ ދެ ހަފްތާ ކުރިން ރިލީޒްކޮށްފައިވާއިރު މިއީ ވަރަށް ގިނަ ބަޔަކު އިންތިޒާރު ކުރަމުން އަންނަ ފިލްމެކެވެ.