16 Nov 2024, 12:15
އިޓަލީވިލާތުގެ ޓިއުރިންގައި މިހާރު ކުރިއަށްދާ އޭޓީޕީ ފައިނަލްސްގެ ސެމީ ފައިނަލްގެ ފަހު ދެ ޖާގަ މިމުބާރާތުގައި ދެވަނައަށް ސީޑު ކުރެވިފައިވާ ޖަރުމަނުވިލާތުގެ އެލެގްޒެންޑާ ޒުވަރޭވް އާއި ހަވަނައަށް ސީޑު ކުރެވިފައިވާ ނޯވޭގެ ކެސްޕާ ރޫޑް ހޯދައިފިއެވެ.
މިމުބާރާތުގެ ސެމީފައިނަލްއިން ޒުވަރޭވް ޖާގަހޯދާފައިވަނީ ގްރޫޕް ސްޓޭޖްގެ އެންމެ ފަހު މެޗުގައި ތިންވަނައަށް ސީޑު ކުރެވިފައިވާ ސްޕެއިންގެ ކާލޯސް އަލްކަރާޒްއާ ބައްދަލުކުރި މެޗު ކާމިޔާބުކޮށް ގްރޫޕްގެ އެއްވަނަ ކުޅުންތެރިޔާގެ ގޮތުގައެވެ. ޒުވަރޭވް މިމެޗު ކާމިޔާބު ކޮށްފައިވަނީ ސީދާ ދެސެޓުންނެވެ.
މިމެޗު ސީދާ ސެޓުން ޒުވަރޭވް ކާމިޔާބު ކުރި ނަމަވެސް މިމެޗުގައި އަލްކަރާޒްވެސްވަނީ ވަރަށް ރަނގަޅު ކުޅުމެއް ދައްކާފައެވެ. މިގޮތުން ފުރަތަމަ ސެޓު ޒުވަރޭވްއަށް ކާމިޔާބު ކުރެވިފައިވަނީ ޓައި ބްރޭކަކަށް ގޮސް ހަތެއް ފަހަކުންނެވެ. އަދި ދެވަނަ ސެޓު ޒުވަރޭވް ކާމިޔާބު ކުރީ ހައެއް ހަތަރަކުންނެވެ.
މިފަހަރުގެ މުބާރާތުގައި ޒުވަރޭވް ކުޅުނު ތިން މެޗުވެސް ވަނީ އޭނާގެ ސާވްއެއް ބްރޭކް ނުވެ ކާމިޔާބުކޮށްފައެވެ. އަދި މިވަގުތު އޭނާ ދަނީ ވަރަށް މޮޅު ކުޅުމެއް ދައްކަމުން ކަމުގައި ގިނަ ބަޔަކު ގަބޫލްކުރެއެވެ.
މެޗަށްފަހު ވާހަކަ ދައްކަމުން ޒުވަރޭވް ބުނީ މިމުބާރާތުގައި މިހާތަނަށް ކުޅުނު ތިން މެޗުގައި ވަރަށް ރަނގަޅު ކުޅުމެއް ދެއްކިފައިވާ ކަމަށާއި ނަމަވެސް ސެމީފައިނަލް މެޗު ފަސޭހަ ނުވާނެ ކަމަށެވެ. ޒުވަރޭވް ސެމީ ފައިނަލްގައި ވާދަކުރުމަށް ހަމަޖެހިފައިވަނީ ފަސް ވަނައަށް ސީޑު ކުރެވިފައިވާ އެމެރިކާގެ ޓޭލާ ފްރިޓްޒްއާއެވެ.
ޒުވަރޭވް ހާމަކުރިގޮތުގައި ފްރިޓްޒްވަނީ މީގެކުރިން ބައެއް ގްރޭން ސްލޭމް މުބާރާތްތަކުގައި އޭނާ ބަލިކޮށްފައިކަމަށެވެ. މިމެޗުން ބަލިވުމުން މިސީޒަން ވަރަށް ފޯމުގައި ފެށި އަލްކަރާޒް އަށް މިވަނީ ސީޒަން ނިންމާ މުބާރާތުން ވަކިވާން ޖެހިފައެވެ. މިފަހަރުގެ މުބާރާތުގައި އަލްކަރާޒްއަށް ކާމިޔާބު ކުރެވިފައިވަނީ އެންމެ މެޗެކެވެ.
މިމުބާރާތުގެ ސެމީ ފައިނަލްއިން ރޫޑް ޖާގަހޯދާފައިވަނީ އެންމެ ފަހު މެޗުގައި އަށް ވަނައަށް ސީޑު ކުރެވިފައިވާ ރަޝިއާގެ އަންޑްރޭ ރުބްލޭވް އާއި ބައްދަލުކުރި މެޗު ދެ ސެޓު އެއް ސެޓުން ކާމިޔާބު ކޮށްގެންނެވެ. މިމެޗުގެ ފުރަތަމަ ސެޓު ރޫޑް ހައެއް ހަތަރަކުން ކާމިޔާބު ކުރިއިރު ދެވަނަ ސެޓު ފަހެއް ހަތަކުން ކާމިޔާބު ކޮށްފައިވަނީ ރުބްލޭވްއެވެ. އަދި ފަހު ސެޓު ރޫޑް ކާމިޔާބު ކޮށްފައިވަނީ ހައެއް ދެއަކުންނެވެ.
މިކާމިޔާބީއާއެކު ރޫޑްއަށް ސެމީ ފައިނަލްގެ ޖާގައެއް ކަށަވަރުވީ ކުޅުނު ތިން މެޗުން ދެ މެޗު ކާމިޔާބު ކޮށްގެންނެވެ. ސެމީ ފައިނަލްގައި ރޫޑް ބައްދަލުކުރާނީ މިމުބާރާތުގައި އެއްވަނައަށް ސީޑު ކުރެވިފައިވާ އިޓަލީވިލާތުގެ ޔަނިކް ސިނާ އާއެވެ.
ރޫޑް ބުނީ ސިނާއާ ދެކޮޅަށް ކުޅޭ މެޗުގައި އޭނާގެ އެންމެ މޮޅު ކުޅުން ދައްކައިގެން ނޫނީ ކާމިޔާބީއެއް ލިބުން އުނދަގޫ ވާނެކަމަށެވެ. އޭނާ ބުނީ ސިނާ އަކީ މިވަގުތު އެންމެ މޮޅު ކުޅުންތެރިޔާ ކަމަށާއި ސިނާއަށް ބަލިވާން ހަނދާން ނެތިފައިވާހެން ހީވާކަމަށެވެ.