15 Nov 2024, 18:28
ޔުއޭފާ ނޭޝަންސް ލީގުގެ ލީގު ބީގެ ގްރޫޕް ތުރީގައި ނޯވޭ އާއި ސްލޮވީނިއާ ބައްދަލުކުރި މެޗު ނޯވޭއިން ކާމިޔާބު ކޮށްފިއެވެ.
ސްލޮވީނިއާގެ ދަނޑުގައި ކުޅުނު މި މެޗު ނޯވޭއިން ކާމިޔާބު ކޮށްފައިވަނީ 1-4 އޮންނެވެ. ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ނޯވޭއިންނެވެ.
އަދި މި މެޗު އެ ޓީމުން ފަށާފައިވަނީވެސް ވަރަށް ފޯރީގައެވެ. މިގޮތުން މެޗުގެ ހަތަރުވަނަ މިނެޓުގައި ނޯވޭއިން ވަނީ މި މެޗުގެ ލީޑު ނަގައިފައެވެ. މިލަނޑު އެ ޓީމަށް ކާމިޔާބު ކޮށްދީފައިވަނީ އެންޓޯނިއޯ ނޫސާއެވެ.
މި މެޗުގައި ސްލޮވީނިއާއިން ކާމިޔާބު ކުރި ހަމައެކަނި ލަނޑު މެޗުގެ 21 ވަނަ މިނެޓުގައި ލިބުނު ޕެނަލްޓީ އަކުން ކާމިޔާބު ކޮށް މެޗުގެ ނަތީޖާ އެ ޓީމަށް ހަމަހަމަ ކޮށްދިނީ ބެންޖަމިން ސެސްކޯއެވެ. ނޯވޭއަށް މި މެޗުގެ ލީޑު ދެވަނަ ފަހަރަށް ނަގާދީފައިވަނީ މެޗުގެ 45 ވަނަ މިނެޓުގައި އާލިން ހާލަންޑް ކާމިޔާބުކޮށްދިން ލަނޑުންނެވެ.
މި މެޗުގައި ނޯވޭއިން ކާމިޔާބު ކުރި ތިންވަނަ ލަނޑު މެޗުގެ 59 ވަނަ މިނެޓުގައި ކާމިޔާބު ކޮށްދީފައިވަނީ ފުރަތަމަ ލަނޑު ވެސް ކާމިޔާބު ކޮށްދިން ނޫސާއެވެ. އަދި ފަހު ލަނޑު މެޗުގެ 82 ވަނަ މިނެޓުގައި ކާމިޔާބު ކޮށްދީފައިވަނީ ޔެންސް ޕީޓާ ހާގުއެވެ.
މި ކާމިޔާބީއާއެކު ނޯވޭއިން މިހާރު އުޅެނީ ކުޅުނު 5 މެޗުން ލިބިފައިވާ 10 ޕޮއިންޓާއެކު ގްރޫޕްގެ ދެވަނައިގައެވެ. އެއީ ގްރޫޕްގެ އެއްވަނައިގާ އޮތް އޮސްޓްރިއާ އާއި އެއްވަރަށް ޕޮއިންޓް ލިބި ނަމަވެސް ފައިދާ ލަނޑަށް ބަލާއިރު ކުރި ނުލިބޭތީއެވެ. އަދި ސްލޮވީނިއާ އުޅެނީ ހަތް ޕޮއިންޓާއެކު ގްރޫޕްގެ ތިންވަނައިގައެވެ.