15 Nov 2024, 13:56
ޔުއޭފާ ނޭޝަންސް ލީގުގެ ކްއާޓާ ފައިނަލްއިން އިޓަލީވިލާތާއި ފަރަންސޭސިވިލާތުން ޖާގަ ހޯދައިފިއެވެ.
މި މުބާރާތުގެ ކުއާޓާ ފައިނަލްއިން އިޓަލީވިލާތް ޖާގަ ހޯދާފައިވަނީ ލީގު އޭގެ ގްރޫޕް ދޭއްގައި ބެލްޖިއަމް އާއި ދެކޮޅަށް ކުޅުނު މެޗު ކާމިޔާބު ކޮށްގެންނެވެ.
ބެލްޖިއަމްގެ ވެރިރަށް ބްރަސެލްސްގައި ކުޅުނު މި މެޗު އިޓަލީވިލާތުން ކާމިޔާބު ކޮށްފައިވަނީ އެއް ލަނޑު ސުން ލަނޑުންނެވެ. ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ގިނައިރު އިޓަލީވިލާތުން ބޯޅަ ގެންގުޅެފައިވާއިރު ހަމަލާ އުފެއްދިފައިވަނީ ދެ ޓީމަށްވެސް ހަމަހަމަ ކޮށެެވެ.
ކްއާޓާ ފައިނަލަށް ދިއުމަށްޓަކައި ދެ ޓީމަށްވެސް މުހިންމު މި މެޗުގެ ފެށުން ރަނގަޅުވީ އިޓަލީވިލާތުގެއެވެ. މިގޮތުން އިޓަލީވިލާތުން ވަނީ މެޗުގެ ކުރީކޮޅު މޮޅު ކުޅުމެއްދައްކާ ބެލްޖިއަމްއަށް ނުރައްކާކޮށްފައެވެ. ނަތީޖާ އަކަށް ވެގެންދިޔައީ މެޗުގެ 11 ވަނަ މިނެޓުގައި އެ ޓީމުން އުފެއްދި ހަމަލާއެއްގައި ސަންޑްރޯ ޓޮނާލީ މި މެޗުގެ ހަމައެކަނި ލަނޑު ޖަހާ އިޓަލީވިލާތަށް ލީޑު ނަގައިދިނުމެވެ. މި ލަނޑާއެކުވެސް މި މެޗުގެ ފުރަތަމަ ހާފުގައި ރަނގަޅަށް ކުޅެފައިވަނީ އިޓަލީވިލާތުންނެވެ.
މި މެޗުގެ ދެވަނަ ހާފަށް ބެލްޖިއަމްއިން ނިކުތީ ފުރަތަމަ ހާފާއި ހިލާފަށް އެ ޓީމުގެ ކުޅުން ރަނގަޅުކޮށް މެޗުން ނަތީޖާއެއް ނެރުމުގެ އުންމީދާއެކުއެވެ. ނަމަވެސް މި ހާފުގައި އެ ޓީމުގެ ކުޅުން ރަނގަޅު ކުރުމާއެކުވެސް އިޓަލީވިލާތުގެ ޑިފެންސް ފޫއަޅުވާލެވޭގޮތެއް ނުވިއެވެ. މި ހާފުގައި ބެލްޖިއަމްއިން ލަނޑެއް ޖެހުމާއި އެންމެ ގާތަށް ގޮސްފައިވަނީ ވޫޓް ފައޭސްއެވެ. ނަމަވެސް އޭނާ ފޮނުވާލި ހަމަލާ އަމާޒުވެފައި ވަނީ އިޓަލީވިލާތުގެ ގޯލުގެ ދަނޑިއަށެވެ. މި ކާމިޔާބީއާއެކު އިޓަލީވިލާތަށް މިހާރު ވަނީ ފަސް މެޗުން 13 ޕޮއިންޓް ލިބިފައެވެ. އެ ޓީމުން ކްއާޓާ ފައިނަލްއިން ޖާގައެއް ކަށަވަރު ކޮށްފައިމިވަނީ އެއްވެސް މެޗަކުން ބަލިނުވެއެވެ.
މި މުބާރާތުގެ ކްއާޓާ ފައިނަލްއިން ފަރަންސޭސިވިލާތުން ޖާގަހޯދީ ލީގު އޭގެ ގްރޫޕް ދޭއްގައި އިސްރާއީލް އާ އަމިއްލަ ދަނޑުގައި ކުޅުނު މެޗު ލަނޑެއް ނުޖެހި އެއްވަރުމުން ލިބުނު ޕޮއިންޓާއެކުއެވެ. މިއާއެކު ފަރަންސޭސީން މިހާރު ވަނީ ފަސް މެޗުން 10 ޕޮއިންޓް ހޯދާފައެވެ. އަދި އިޓަލީވިލާތު އަތުން ބެލްޖިއަމް ބަލިވުމާއެކު އެ ޓީމާ އަރާ ހަމަކުރުމުގެ ފުރުސަތު މިހާރު ވަނީ ބެލްޖިއަމްއަށް ގެއްލިގެން ގޮސްފައެވެ. ބެލްޖިއަމްއަށް ލިބިފައިވަނީ ހަތަރު ޕޮއިންޓެވެ. އަދި އިސްރާއީލް އުޅެނީ އެއް ޕޮއިންޓާއެކު ގްރޫޕްގެ އެންމެ ފުލުގައެވެ.