10 Nov 2024, 10:08
ސޮނީ ޓެލެވިޒަންއިން މީގެ 13 އަހަރު ކުރިން ގެނެސްދިން ޑްރާމާ ސިލްސިލާ "ބަޅޭ އައްޗޭ ލަގްތޭ ހޭ" އަލުން އެ ޗެނަލްއިން ގެނެސްދޭން ނިންމައިފިއެވެ.
ފިލްމީ ޚަބަރުތައް ގެނެސްދޭ ބޮލީވުޑްހަންގާމާގައި ބުނެފައިވާ ގޮތުގައި އަލުން މި ސިލްސިލާ ސޮނީއިން ދައްކަން ނިންމާފައިވާއިރު އެންމެ ފުރަތަމަ ވެސް ގެނެސްދޭނީ ބަތަލާ ސާކްޝީ ތަންވާރުއާއި އެކްޓަރު ރާމް ކަޕޫރު ލީޑް ރޯލް ކުޅުނު ބައެވެ.
ކުރިއަށް އޮތް ހޯމަ ދުވަހުން ފެށިގެން މި ސިލްސިލާގެ އެޕިސޯޑުތައް ސޮނީއިން ދައްކަން ފަށާނެ ކަމަށް ރިޕޯޓުތައް ބުނެއެވެ.
ސާކްޝީއާއި ރާމް ކަޕޫރު އެކީގައި ފެނުނު މި ޑްރާމާ ސިލްސިލާއަކީ ވަރަށް ގިނަ ބައެއްގެ ތަރުހީބު ހޯދި ޑްރާމާ ސިލްސިލާއެކެވެ. އިންޑިއާގެ އިތުރުން ބޭރުގެ ބައެއް ޤައުމުތަކުގައި ވެސް "ބަޅޭ އައްޗޭ ލަގްތޭހޭ"އަށް ވަނީ ބޮޑު މަގުބޫލުކަމެއް ލިބިފައެވެ.
ވަރަށް ތަފާތު ލޯބީގެ ވާހަކައެއް ގެނެސްދިން މި ޑްރާމާ ސިލްސިލާއަކީ ލޯތްބާއި އިހުތިރާމާއި އާއިލީ ގުޅުމުގެ މުހިއްމުކަން ވަރަށް ބޮޑަށް ބިނާކޮށް އުފައްދާފައިވާ ސިލްސިލާއެކެވެ.
'ބަޅޭ އައްޗޭ ލަގްތޭ ހޭ"ގެ ފަހު ދެ ސީޒަންގެ ލީޑް ތަރިން ކަމަށްވާ ނަކުލް އާއި ދީޝާ--ފޮޓޯ/ޓައިމްސްނައު
ގިނަ އަހަރުތަކަކަށް ފަހު މި ޑްރާމާ ސިލްސިލާ އަލުން ދައްކަން ނިންމި ނިންމުމާ ގުޅިގެން ބަތަލާ ސާކްޝީ ބުނެފައިވަނީ، ކުރިން މި ޑްރާމާ ނުބެލި ތިބި ގިނަ ބަޔަކަށް އަލުން އެ ސިލްސިލާގެ ވާހަކަ ފެންނާނެކަމުގެ ޔަގީންކަން ލިބުމަކީ ލިބުނު ވަރަށް ބޮޑު އުފަލެއް ކަމަށެވެ.
މި ސިލްސިލާ ސޮނީ ޗެނަލްއިން ޓެލެކާސްޓް ކުރާނީ ކޮންމެ ހަފްތާއެއްގެ ހޯމަ ދުވަހުން ފެށިގެން ހުކުރު ދުވަހާ ހަމައަށް ރާއްޖެ ގަޑިން ރޭގަނޑު 8:00 ޖަހާއިރުއެވެ.
މި ސިލްސިލާގެ ދެ ސީޒަން ފަހުން ގެނެސްދީފައިވަނީ މަޝްހޫރު ޓީވީ އެކްޓަރުން ކަމަށްވާ ނަކުލް މެހެތާ އަދި ދީޝާ ޕަރުމާރުއާ އެކީއެވެ.