10 Nov 2024, 10:05
ނެޓްފްލިކްސްއިން ގެނެސްދިން ރިއަލިޓީ ސީރީޒްއިން ސްކްރީނަށް ތައާރަފުވި ކަޕޫރު ޚާންދާންގެ ރިދިމާ ކަޕޫރު ފިލްމީ ދާއިރާއާ ގުޅުމަކީ ބައްޕަ ރިޝީ ކަޕޫރު އެއްވެސް އިރަކު ބޭނުންވި ކަމެއް ނޫން ކަމަށް ބަތަލާ ނީތޫ ކަޕޫރު ބުނެފިއެވެ.
ފިލްމީތަރިން ކަމަށްވާ ނީތޫ ކަޕޫރާއި ރިޝީ ކަޕޫރުގެ ދެ ކުދިންގެ ތެރެއިން ރިދިމާ ކަޕޫރު ފިލްމު އިންޑަސްޓްރީއިން ނުފެނުނު ނަމަވެސް އެއީ އެއްވެސް އިރެއްގައި ފިލްމުތަކާއި ދުރުގައި އުޅުނު ޒުވާނެއް ނޫނެވެ.
ރިދިމާގެ މުނި ކާފައިން ފެށިގެން އެ އާއިލާއިން އިންޑަސްޓްރީއަށް އުފަންކުރުވި ފިލްމީތަރިންގެ އަދަދު އިންތިހާއަށް ގިނައެވެ. ރިދިމާގެ މައިންބަފައިންނަކީ ހިންދީ ސިނަމާގެ އެންމެ ކާމިޔާބު ފިލްމީ ތަރިންގެ ތެރޭ ހިމެނޭ އެކްޓަރުންނަށް ވިއިރު ކޮއްކޮ ރަންބީރު ކަޕޫރަކީ ވެސް ބޮލީވުޑްގައި މި ވަގުތު ތިބި އެންމެ ހުނަރުވެރި އެކްޓަރުންގެ ތެރެއިން ގުނާލެވޭ ތަރިއެކެވެ.
ރިދިމާ އާއި ރަންބީރު މަންމަ ނީތޫ، ބައްޕަ ރިޝީ އަދި ފިރިމީހާ ބަރަތު ސަހާނީއާ އެކު ރިޝީ މަރުވުމުގެ ދުވަސްތަކެއް ކުރިން--ފޮޓޯ/މިސްމާލިނީ
ހަމައެއާ އެކު ރިދިމާގެ ދެބެއިންގެ ދެދަރި ކަރީނާ، ކަރިޝްމާ އަދި ފަހަރި އާލިއާ ބަޓް އަކީ ވެސް ހިންދީ ސިނަމާގެ އެންމެ ކާމިޔާބު ބަތަލާއިންނެވެ.
ކުރީގެ އެކްޓަރު ރިޝީ ކަޕޫރުގެ އޮޓޯބައޮގްރަފީގައި ނީތޫ ބުނެފައިވަނީ، ހުރި ހަމައެކަނި އަންހެން ދަރިފުޅު ފިލްމީ ތަރިއަކަށް ވާން އެދުނުނަމަ އެކަން އެއްގޮތަކަށް ވެސް ރިޝީއަށް ތަހައްމަލުނުކުރެވުނީސް ކަމަށެވެ.
ރިދިމާއަކީ ފިލްމީ ތަރިއެއްގެ ކިބައިގައި ހުންނަންޖެހޭ ހުނަރު ހުރި މީހެއް ކަމަށް ގަބޫލުކުރެވޭ ކަމަށާއި އެހެންނަމަވެސް ބައްޕަގެ އުފަލަށްޓަކައި އެ ހުވަފެން ގުރުބާންކުރީ އެއީ ރިޝީ އެއްވެސް އިރަކު އެއްބަސްވާނެ ކަމެއް ނޫންކަން ރިދިމީއަށް އެނގޭތީ ކަމަށް ނީތޫ ބުނެފައިވެއެވެ.
ރިދިމާ އާއި ރަންބީރު ދާދިފަހުން ބައިވެރިވި ކަޕިލް ޝަރުމާގެ ނެޓްފްލިކްސް ޝޯގައި މަންމަ ނީތޫއާ އެކު--ފޮޓޯ/ޕިންކްވިލާ
އަންހެނުން ފިލްމީ ދާއިރާގައި މަސައްކަތް ކުރުމާ ދެކޮޅުވެރިކަމެއް ރިޝީގެ ނެތް ނަމަވެސް އަމިއްލަ އަންހެނުންނާއި ދަރިފުޅު ވަރަށް ގިނަ ކަންކަމުން ރައްކާތެރިކުރުމަށް ރިޝީ އަބަދުވެސް މަސައްކަތްކުރި ކަމަށް ނީތޫ ވަނީ ބުނެފައެވެ.
އޭގެ ތެރޭގައި ފިލްމީ ތަރިންނާ ގުޅޭގޮތުން މީޑިއާގައި ފަތުރަމުންދާ ހަގީގަތާ ޚިލާފު ވާހަކަތަކުގެ އިތުރުން އޭރު ފިލްމީ ދާއިރާގައި އަންހެނުންނާއި ފިރިހެނުންނާ ދެމެދު ގެންގުޅު ފަރަގުކުރުން ވެސް ހިމެނޭ ކަމަށް ކުރީގެ މަޝްހުރު ބަތަލާ ވަނީ ބުނެފައެވެ.
ފިލްމު އިންޑަސްޓްރީއާ ގުޅުމުގެ ޚިޔާލު އެއްކައިރި ކޮށްލުމަށް ފަހު ރިދިމާ ނިންމީ ފެޝަން ޑިޒައިން އަދި ގަހަނާ ޑިޒައިންކޮށް ފަރުމާކޮށް އެ ދާއިރާއިން ތައުލީމު ހާސިލުކުރުމަށެވެ.
ބައްޕަ ރިޝީ ކަޕޫރު މަރުވުމާ ގުޅިގެން އާއިލީ ގުޅުން އިހުނަށް ވުރެ އެތައް ގުނައެއް ވަރުގަދަވެ ފިލްމުތަކުގައި މަސައްކަތް ކުރުމަށް ވެސް އެންމެ ބޮޑަށް ބާރު އަޅާ ހިތްވަރު ދިނީ ރިދިމާ ކަމަށް ނީތޫ ވަނީ ދެމައިން ބައިވެރިވި ކަޕިލް ޝަރުމާގެ ކޮމެޑީ ޝޯގެ އެޕިސޯޑެއްގައި ބުނެފައެވެ.
ރިދިމާ ސްކްރީނަށް ތައާރަފުވީ ދާދި ފަހުން ނެޓްފްލިކްސްއިން ގެނެސްދިން ރިއަލިޓީ ޝޯ "ފެބިއުލަސް ލައިވްސް ވާސަސް ބޮލީވުޑް ވައިވްސް"ގެ ތިންވަނަ ސީޒަނުންނެވެ. މި ޝޯގެ އެޕިސޯޑެއްގައި ރިދިމާ ބުނެފައިވަނީ ދަރިފުޅު ސަމައިރާ ބޮޑުވެގެން ބޭނުންވަނީ ފިލްމީތަރިއަކަށް ވުމަށް ކަމަށެވެ. އެކަމާ އޭނާގެ އެއްވެސް މައްސަލައެއް ނެތްކަމަށް ވެސް ރިދިމާ ވަނީ ބުނެފައެވެ.