10 Nov 2024, 09:33
ކުރީގެ ވަރަށް ގިނަ ފިލްމުތަކުން ބެލުންތެރިންގެ މަގުބޫލުކަން ހޯދި އެކްޓަރު ޗަންކީ ޕާންޑޭގެ ފިލްމީ ކެރިއަރު ފަނޑުވީ މަޝްހޫރު އެކްޓަރުން ކަމަށްވާ އަޖޭ ދޭވްގަން، ސަލްމާން ޚާން، ގޯވިންދާ އަދި އާމިރު ޚާން ފަދަ އެކްޓަރުން ފިލްމީ ދާއިރާއަށް ތައާރަފުވި ހިސާބުން ކަމަށް އެކްޓަރު ބުނެފިއެވެ.
ޗަންކީ ފިލްމީ ދާއިރާއަށް ތައާރަފުވި 1987 ވަނަ އަހަރަކީ އޭނާއަށް ވަރަށް ކާމިޔާބު އަހަރެއް ކަމަށާއި ނަމަވެސް ކާމިޔާބީ އަތުގައި ހިފުމަށް ފަހު ދޫވާން މާ ގިނަ ދުވަހެއް ނުނަގާ ކަމަށް ޗަންކީ ވަނީ ބުނެފައެވެ.
ކެރިއަރުގެ ފުރަތަމަ ފިލްމު ލިބުނީ ވެސް ފަސް އަހަރުގެ ބުރަ މަސައްކަތުން ކަމަށާއި އެއްފަހަރާ މާ ގިނަ ޒުވާން އެކްޓަރުން އިންޑަސްޓްރީއަށް ތައާރަފުވުމާ އެކު ވަރަށް ގިނަ ގޮންޖެހުންތަކާ ވެސް ކުރިމަތިލާން ޖެހުނު ކަމަށް ޗަންކީ ވަނީ ބުނެފައެވެ.
ޗަންކީ ޕާންޑޭ ދަރިފުޅު އަދި ބަތަލާ އަނަނިޔާ ޕާންޑޭއާ އެކު--ފޮޓޯ/ޕިންކްވިލާ
ފިލްމީ ކެރިއަރުގައި ނާކާމިޔާބީއާ ކުރިމަތިވާން ފެށުމުން ވަގުތު ބޭކާރު ކުރުމުގެ ބަދަލުގައި އެއް އަހަރު ދުވަސް ވަންދެން އަންހެނުން ބާވްނާ ޕާންޑޭއާ އެކު ހަނީމޫން ދަތުރުތަކުގައި ދުވަސްތައް ހޭދަކުރި ކަމަށް ޗަންކީ ވަނީ ބުނެފައެވެ.
ފިލްމު އިންޑަސްޓްރީގައި ކާމިޔާބު ހޯދުމަކީ ވަރަށް ބުރަ މަސައްކަތެއް ކަމަށާއި ވަރަށް މަދު ފަހަރަކު ނޫނީ ނަސީބު އަތުގައި ހިފުމުން ނޫނީ އިންޑަސްޓްރީގެ އެންމެ އުހަށް ނުދެވޭނެ ކަމަށް މީޑިއާއަށް ދިން އިންޓަވިއުއެއްގައި ޗަންކީ ވަނީ ބުނެފައެވެ.
ޗަންކީ ބަތަލާ ނީލަމްއާ އެކު ފިލްމެއްގެ މަންޒަރެއްގައި--ފޮޓޯ/ފިލްމުފެއަ
ޗަންކީއަށް ބެލުންތެރިންގެ ސަމާލުކަން ލިބެން ފެށީ ޕްރޮޑިއުސަރު ސާޖިދު ނަދިއަދުވާލާގެ ފްރެންޗައިސް ފިލްމު "ހައުސްފުލް"ގައި އޭނާ ކުޅުނު ހެއްވާ މަޖާ ރޯލުންނެވެ. އެއަށް ފަހު ބައެއް ފިލްމުތަކުގެ ވިލެންގެ ރޯލުން ޗަންކީ ފެނިފައިވާއިރު އޭނާ އެންމެ ފަހުން ފެނިފައިވަނީ ދާދި ފަހުން ނެޓްފްލިކްސްގައި ރިލީޒްކުރި ފިލްމު "ވިޖޭ 69"އިންނެވެ.
ބޮލީވުޑުގައި ކުރިމަތިވި ނާކާމިޔާބީއަށް ފަހު ޗަންކޭ ފަހުން ވަނީ ބަންގްލަދޭޝް ސިނަމާގައި ވެސް އަހަރުތަކެއް ވަންދެން މަސައްކަތްކޮށްފައެވެ.
ޗަންކީއާއި ބަތަލާ ނީލަމް އެކީގައި އޭރު މަސައްކަތްކުރި ވަރަށް ގިނަ ފިލްމުތަކަކީ ގިނަ ބައެއްގެ މެދުގައި މަގުބޫލުވި ފިލްމުތަކެކެވެ. އޭގެ ތެރޭގައި، "ޕާޕް ކީ ދުނިޔާ"، "ޚަތުރޯންކް ކޭ ކިލާޅީ"، "ގަރް ކާ ޗިރާގް" އަދި "ވިޝްވާތުމާ" ހިމެނެއެވެ.