09 Nov 2024, 21:25
ސްޕެނިޝް ލަލީގާގައި އެންމެ ފަހުގެ ޗެމްޕިއަން ރެއާލް މެޑްރިޑާއި އޮސަސޫނާ ބައްދަލުކުރި މެޗު ރެއާލުން ކާމިޔާބުކޮށް ތާވަލުގެ އެއްވަނައިގައި އުޅޭ އެފްސީ ބާސެލޯނާ އާއި ދެމެދުގައިވާ ފަރަގު ކުޑަކޮށްފިއެވެ.
ރެއާލްގެ ދަނޑުގައި ކުޅުނު މިމެޗު އެޓީމުން ކާމިޔާބު ކޮށްފައިވަނީ ހަތަރު ލަނޑު ސުން ލަނޑުންނެވެ. ރެއާލްގެ ފަރާތުން މޮޅު ކުޅުމެއް ފެނިގެންދިޔަ މިމެޗުގައި އެޓީމުގެ ތަރިއަކަށްވީ ކުރިއަށް ކުޅޭ ވިނީޝިއަސް ޖޫނިއާއެވެ. އޭނާ ވަނީ މިމެޗުގައި ތިން ލަނޑު ކާމިޔާބު ކޮށްދީ ހެޓްރިކެއް ހަދައިފައެވެ.
އެންމެ ފަހުން ރެއާލް ކުޅުނު ދެމެޗުން ބަލިވެފައިވުމުން މި މެޗަށް އެޓީމުން ނިކުތީ ކާމިޔާބީ ހޯދުމަށް ވަރަށް ބޮޑަށް އަޒުމް ކަނޑައަޅައިގެންނެވެ. ނަމަވެސް މިމެޗުގައި ލަނޑެއް ފެނުމުގެ ކުރިން ފެނުނީ ރެއާލަށް ކުޅޭ ބްރެޒިލްގެ ދެކުޅުންތެރިންކަމަށްވާ ޑިފެންޑާ އެޑާ މިލިޓާއޯއާއި ފޯވަޑް ރޮޑްރިގޯއަށް އަނިޔާވެގެން ބާލަން ޖެހުނު ތަނެވެ. މީގެތެރެއިން ވެސް މިލިޓާއޯގެ ކަކުލަށް ލިބުނު އަނިޔާ ސީރިއަސް ވެދާނެކަމަށްވަނީ ބެލެވިފައެވެ.
މިމެޗުގައި ރެއާލް އިން ކާމިޔާބުކުރި ފުރަތަމަ ލަނޑު މެޗުގެ 34ވަނަ މިނެޓުގައި އެޓީމަށް ކާމިޔާބުކޮށްދީ ލީޑު ނަގައިދިނީ ވިނީޝިއަސްއެވެ. އަދި ފުރަތަމަ ހާފު ނިމެން ތިން މިނެޓަށް ވެފައިވަނިކޮށް ރެއާލްގެ ލީޑު ފުޅާކޮށްދިނީ ޖޫޑް ބެލިންހަމްއެވެ. މިއީ މިސީޒަންގައި ބެލިންހަމްއަށް ކާމިޔާބު ކުރެވުނު ފުރަތަމަ ލަނޑެވެ.
މިމެޗުގެ ދެވަނަ ހާފުގައި ވެސް ފެނިގެންދިޔައީ ފުރަތަމަ ހާފެކޭ އެއްގޮތަށް ރެއާލް އިން ހަމަލާއަށް އިސްކަން ދީގެން ކުޅުނު އިރު އޮސަސޫނާއިން ޑިފެންސަށް އިސްކަންދީ ލިބޭ ފުރުސަތު ތަކުގައި ކުރިއަށް އެރޭތޯ މަސައްކަތް ކުރި ތަނެވެ. މިމެޗުގައި ރެއާލްގެ ތިންވަނަ ލަނޑު މެޗުގެ 61ވަނަ މިނެޓުގައި ކާމިޔާބު ކޮށްދިނީ ވިނީޝިއަސް އޭނާގެ ދެވަނަ ލަނޑު ކާމިޔާބު ކުރިއިރު ތިންވަނަ ލަނޑު ޖަހާ ހެޓްރިކް ފުރިހަމަ ކޮށްފައިވަނީ 69ވަނަ މިނެޓުގައި ކާމިޔާބު ކުރި ލަނޑުންނެވެ. މިމެޗުގައި އިތުރު ލަނޑެއް ނުފެނުން ނަމަވެސް ލަނޑު ޖަހާނެ ފުރުސަތު ރެއާލަށް ލިބިގެން ދިޔަކަން ފާހަގަ ވެގެންދިޔައެވެ.
މިމެޗުން ރެއާލް ފަސޭހަ ކަމާއެކު މޮޅުވި ނަމަވެސް އެޓީމަށް ދިމާވެފައިވާ އަނިޔާގެ މައްސަލަތައް އަންނަނީ އިތުރު ވަމުންނެވެ. މިގޮތުން ފުރަތަމަ ހާފުގައި ބާލަން ޖެހުނު ދެ ކުޅުންތެރިންގެ އިތުރުން ފުރަތަމަ ހާފަށް ފަހު ލޫކަސް ވަޒްކޭޒްއަށް އަނިޔާގެ ސަބަބުން ދެވަނަ ހާފަށް އެރޭ ވަރެއްް ނުވިއެވެ. މީގެއިތުރުން ތަޖުރިބާކާރު ޑިފެންޑާ ޑާނީ ކާވަހާލް ދިގު މުއްދަތަކަށް ކުޅުމާ ދުރައް ދާން ޖެހިފައިވާއިރު ޑޭވިޑް އަލަބާވެސް އަނިޔާގެ ސަބަބުން ހުރީ ކުޅުމާއި ދުރުގައެވެ.
މިކާމިޔާބީއާއެކު ރެއާލުން މިހާރު މިވަނީ ބާސާ އާއި ދެމެދުގައިވާ ފަރަގު ހަ ޕޮއިންޓަށް ކުޑަކޮށްފައެވެ. އެއީ 12 މެޗުން ލިބިފައިވާ 27 ޕޮއިންޓާއެކުއެވެ.
ނަމަވެސް ބާސާ މާދަމާ ރޭ ރެއާލް ސޮސިއެޑާޑާ ބައްދަލު ކުރާ މެޗުން މޮޅުވެއްޖެނަމަ އަނެއްކާ ވެސް މިފަރަގު ނުވަ ޕޮއިންޓަށް އިތުރު ވެގެންދާނެއެވެ. މިމެޗުން ބަލިވުމުން އޮސަސޫނާ އުޅެނީ 13 މެޗުން ލިބިފައިވާ 21 ޕޮއިންޓާއެކު ތާވަލްގެ ފަސް ވަނައިގައެވެ.