07 Nov 2024, 12:20
ޔުއޭފާ ޗެމްޕިއަންސް ލީގުގެ ލީގު ފޭސްގައި ޖަރުމަނު ބުންޑެސްލީގާގެ ބަޔާން މިޔުނިކާއި ލީގާ ޕޯޗުގަލްގެ ބެންފީކާ ބައްދަލުކުރި މެޗު ބަޔާން އިން ކާމިޔާބުކޮށް ހަމަނޭވާއެއް ލައިފިއެވެ.
ބަޠޭންގެ ދަނޑުގައި ކުޅުނު މިމެޗު އެޓީމަށް ކާމިޔާބު ކޮށްފައިވަނީ އެއް ލަނޑު ސުން ލަނޑުންނެވެ. އެންމެ ފަހުން މިމުބާރާތުގައި ކުޅުނު ދެ މެޗުން ވެސް ބަލިވެފައިވުމުން މިމެޗުން ރަނގަޅު ނަތީޖާއެއް ނެރުމަށް ކޮންމެހެން ބޭނުންވެފައިތިބި ބަޔާންއިންވަނީ މިމެޗުގައި މޮޅު ކުޅުމެއް ދައްކާފައެވެ. މިގޮތުން މިމެޗުގައި ގިނައިރު ބޯޅަ ގެންގުޅުމުގެ އިތުރުން ގިނަ ހަމަލާ އުފައްދާފައިވަނީ ވެސް ބަޔާންއިންނެވެ.
މިމެޗުގެ ފުރަތަމަ ހާފުގައި ލަނޑެއް ނުފެނުން ނަމަވެސް ބަޔާނުން ވަނީ ނުރައްކާތެރި ހަމަލާތަކެއް މިހާފުގައި ވެސް ބެންފީކާގެ ގޯލަށް ފޮނުވާލައިފައެވެ. މީގެތެރެއިން ވެސް ހެރީ ކޭން އާއި ސާޖީ ގިނެބްރީ ފޮނުވާލި ދެ ހަމަލާ ފާހަގަ ކޮށްލެވެއެވެ.
މިމެޗުގައި ބަޔާންއިން ކާމިޔާބު ކުރި ހަމައެކަނި ލަނޑު މެޗުގެ 67ވަނަ މިނެޓުގައި ކާމިޔާބު ކޮށްފައިވަނީ ކޭން ތަނަވަސް ކޮށްދިން ފުރުސަތެއްގައި ޖަމާލް މުސިއެލާއެވެ. މީގެއިތުރުން ވެސް ލަނޑު ޖަހާނެ ފުރުސަތު އެޓީމަށް ލިބިގެންދިޔަ ނަމަވެސް އޭގެތެރެއިން އެއްވެސް ފުރުސަތެއްގެ ބޭނުން ހިފޭގޮތެއް ނުވިއެވެ. މިކާމިޔާބީ ވެފައިވަނީ މިފަހަރުގެ މުބާރާތުގައި ބަޔާންއަށް ކާމިޔާބު ކުރެވުނު ދެވަނަ މެޗަށެވެ. އެންމެ ފުރަތަމަ މެޗުގައި ޑީނަމޯ ޒަގްރެބްގެ މައްޗަށް ކާމިޔާބީ ހޯދުމަށްފަހު ދެން ކުޅުނު ދެމެޗުންވަނީ ބަލިވެފައެވެ. އެހެން ކަމުން މިމެޗަށް ބަޔާން ނުކުތްއިރު ވެސް ޔޫރަޕްގައި މިފަހަރު ރަނގަޅު ކުޅުމެއް ނުފެންނާތީ ކޮންމެވެސް ވަރެއްގެ ފާޑުކިޔުންތަކެއްވަނީ އަމާޒުވާން ފަށައިފައެވެ.
މިކާމިޔާބީއާއެކު ބަޔާން މިހާރު އުޅެނީ ހަތް ޕޮއިންޓާއެކު ތާވަލްގެ 17 ވަނައިގައެވެ. އަދި ބެންފިކާ އުޅެނީ ހަ ޕޮއިންޓް ލިބި ނަމަވެސް ފައިދާ ލަނޑަށް ބަލާއިރު ތާވަލްގެ 19 ވަނައިގައެވެ.
މިމުބާރާތުގައި އިޓާލިއަން ސެރީއާގެ އެޓަލާންޓާ އާއި ޖަރުމަނު ބުންޑެސްލީގާގެ ވީއެފްބީ ސުޓުޓްގާޓް ބައްދަލުކުރި މެޗު ރަށުން ބޭރުގައި ދެ ލަނޑު ސުން ލަނޑުން ކާމިޔާބު ކޮށްފައިވަނީ އެޓަލާންޓާއެވެ. މިފަހަރުގެ މުބާރާތުގައި މިހާތަނަށް މެޗަކުން ބަލިނުވާ އެޓަލާންޓާއިން ކާމިޔާބުކުރި ދެ ލަނޑު އެޓީމަށް ޖަހައިދިނީ އަޑެމޯލާ ލޫކްމަން އާއި ނިކޮލޯ ޒަނިއޯލޯއެވެ.
މިކާމިޔާބީއާއެކު އެޓަލާންޓާ އުޅެނީ އަށް ޕޮއިންޓާއެކު ތާވަލްގެ ނުވަ ވަނައިގައެވެ. އަދި ސުޓުޓްގާޓް އުޅެނީ ހަތަރު ޕޮއިންޓާއެކު ތާވަލްގެ 27 ވަނައިގައެވެ.