05 Nov 2024, 10:29
ފާރަވެރިވެ، ސަރުކާރު ޖަވާބުދާރީ ކުރުވުމާ ގުޅޭ ވޯކްޝޮޕެއް ދަ ޑިމޮކްރެޓްސްއިން ރޭ ކުރިއަށް ގެންގޮސްފިއެވެ.
މި ވޯކްޝޮޕާގުޅޭ މައުލޫމާތު ދެއްވަމުން ޑިކޮކްރެޓްސްގެ ޗެއާޕާސަން ހަސަން ލަތީފް ވިދާޅުވީ، މީގެ އަލީގައި ވެރިކަން ކުރާ ޕީއެންސީން ވެރިކަމަށް އައުމަށްޓަކައި ގެންގުޅުނު ސިޔާސަތުތަކާ ޑިމޮކްރެޓްސްގެ ސިޔާސަތުތަކާ އަޅައިކިޔައި، ރައްޔިތުންނަށް ކަންކަން ކިޔައިދީ އޮޅުންފިލުވައިދޭނެ ކަމަށެވެ.
ސަރުކާރު ޖަވާބުދާރީ ކުރުވުމަށް ޑިމޮކްރެޓްސްއިން ހިންގި ވޯކްޝޮޕް -- ސަން ފޮޓޯ/ ނާއިޝް ނާހިދު
މި ވޯކްޝޮޕް ހިންގުމަށް ޑިމޮކްރެޓްސްއިން ވަނީ އެ ޕާޓީގެ ހުރިހާ ކޮމިޓީއެއްގެ މުގައްރިރުން ހިމެނޭ ކޮމިޓީއެއް އެކުލަވައިލައިފައެވެ. ވޯކްޝޮޕް ހިންގަވައިދެއްވީ އެ ކޮމިޓީގެ ޗެއާޕާސަން ހުސައިން އަމްރެވެ.
މީޑިއާއާ މައުލޫމާތު ހިއްސާ ކުރައްވަމުން އޭނާ ވިދާޅުވީ، ސަރުކާރުގެ ޕާފޮމަންސްއާ ގުޅޭ އަހަރީ ރިޕޯޓެއް ޑިމޮކްރެޓްސްއިން ނެރޭނެ ކަމަށެވެ. ސަރުކާރުގެ ބަހެއް ވެސް ހިމަނައިގެން ތައްޔާރުކުރުމަށް ނިންމާފައިވާ އެ ރިޕޯޓާ ގުޅިގެން ސަރުކާރުގެ ވުޒާރާތަކުން ބޭނުންވާ މައުލޫމާތު ފޯރުކޮށްދޭން، މާދަމައިން ފެށިގެން އެ ތަންތަނަށް އަންގާނެ ކަމަށް އަމްރު ވިދާޅުވިއެވެ.
ސަރުކާރު ޖަވާބުދާރީ ކުރުވުމަށް ޑިމޮކްރެޓްސްއިން ހިންގި ވޯކްޝޮޕް -- ސަން ފޮޓޯ/ ނާއިޝް ނާހިދު
މި މަސައްކަތުގައި ޑިމޮކްރެޓްސްގެ ކޮމިޓީތަކުގެ މެންބަރުންގެ އިތުރުން ވެސް އެހެނިހެން ބޭފުޅުން އެއްބާރުލުން ދޭން ބޭނުންފުޅުވާނަމަ، އެ ފުރުސަތު ވެސް އެބައޮތް ކަމަށް އޭނާ ވިދާޅުވިއެވެ.
އިދިކޮޅު ސިޔާސީ ޕާޓީތަކުގެ އެންމެ މުހިންމު މަސައްކަތަކީ އެ އިރެއްގައި އޮންނަ ސަރުކާރަކަށް ފާރަވެރިވެ، އެ ސަރުކާރެއް ޖަވާބުދާރީ ކުރުވުމެވެ. އިދިކޮޅު ސިޔާސީ ޕާޓީތަކުގެ ގޮތުގައި ޑިމޮކްރެޓްސްގެ އިތުރުން އެމްޑީޕީ އަދި ޕީއެންއެފުން ވެސް ދަނީ ހަރަކާތްތެރިވަމުންނެވެ.
ފާހަގަކޮށްލެވޭ ގޮތުގައި މިދިޔަ ރިޔާސީ އިންތިޚާބުގެ ފުރަތަމަ ބުރާ ވަރަށް ކައިރިވެފައި އޮއްވައި އުފެއްދި ޑިމޮކްރެޓްސްއިން އެ ބުރުގައި ވާދަކުރިއެވެ. އެކަމަކު، ދެވަނަ ބުރަކަށް ނިދުއުމުން އެ ޕާޓީން ނިންމީ، އެއްވެސް ޕާޓީއަކަށް ދެވަނަ ބުރުގައި ތާއީދުނުކުރާށެވެ.