04 Nov 2024, 10:34
އިންގްލިޝް ޕްރިމިއާ ލީގުގައި ޓޮޓްނަމް ހޮޓްސްޕާ އާއި އެސްޓަން ވިލާ ބައްދަލުކުރި މެޗު ސްޕާސް އިން ކާމިޔާބުކޮށް ތާވަލްގެ ހަތްވަނައަށް ކުރިއަށް ޖެހިލައިފިއެވެ.
ސްޕާސްގެ ދަނޑުގައި ކުޅުނު މި މެޗު އެ ޓީމުން ކާމިޔާބު ކޮށްފައިވަނީ ފަހަތުން އަރާ 1-4 އިންނެވެ. ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ސްޕާސްއިންނެވެ.
ނަމަވެސް މި މެޗުގެ ފުރަތަމަ ހާފުގައި ސްޕާސްގެ ފަރާތުން އެންމެ ރަނގަޅު ކުޅުމެއް ފެނިގެން ގޮސްފައެއް ނުވެއެވެ. އޭގެ ބަދަލުގައި މިހާފުގައި ފެނިގެންދިޔައި ވިލާއިން ސްޕާސްއަށް ވުރެ ރަނގަޅަށް ކޫލެމުންދިޔަ ތަނެވެ. ނަތީޖާއަކަށް ވެގެންދިޔައީ މެޗުގެ 32 ވަނަ މިނެޓުގައި ވިލާއިން ލަނޑެއް ޖަހާ މެޗުގެ ލީޑު ނެގުމެވެ.
މި ލަނޑު އެ ޓީމަށް ކާމިޔާބުކޮށްދިނީ މޯގަން ރޮޖާސްއެވެ. މިމެޗުގެ ފުރަތަމަ ހާފުގައި ވިލާއަށް ވަނީ ލަނޑު ޖަހާނެ އިތުރު ފުރުސަތުވެސް ލިބިގެން ގޮސްފައެވެ.
ފުރަތަމަ ހާފާއި ހިލާފަށް ދެވަނަ ހާފުގައި ސްޕާސް ފެނިގެންދިޔައީ ތަފާތު ޓީމެއްގެ ގޮތުގައެވެ. މިގޮތުން ދެވަނަ ހާފުގެ ކުޅުން ފެށިތާ ހަތަރޔ މިނެޓުގެ ތެރޭގައި ސްޕާސްއިން ވަނީ ލަނޑެއް ޖަހާ މެޗުގެ ނަތީޖާ ހަމަހަމަ ކޮށްފައެވެ.
މި ލަނޑު ކެޕްޓަން ސޮން ހެއުން މިން ތަނަވަސްކޮށްދިން ފުރުސަތެއްގައި ޖަހައިދިނީ ބްރެނޮން ޖޯންސަންއެވެ. މި މެޗުގެ ލީޑު ސްޕާސްއިން ނަގާފައިވަނީ މެޗުގެ 75ވަނަ މިނެޓުގައި ޑޮމިނިކް ސޮލާންކީ ޖަހައިދިން ލަނޑުންނެވެ. އަދި މި ލަނޑު ޖެހިތާ ހަތަރު މިނެޓް ފަހުން ސޮލާންކީވަނީ އިތުރު ލަނޑެއް ޖަހާ ސްޕާސްގެ ލީޑު ފުޅާކޮށްދީފައެވެ.
ސްޕާސްއިން މި މެޗުގައި ކާމިޔާބުކުރި ހަތަރު ވަނަ ލަނޑު މެޗުގެ އިތުރު ވަގުތުގެ ހަވަނަ މިނެޓުގައި ލިބުނު ހިލޭ ޖެހުމަކުން ކާމިޔާބު ކޮށްދިނީ ޖޭމްސް މެޑިސަންއެވެ. މިއީ އޭނާ ޕްރިމިއާ ލީގުގައި ކާމިޔާބު ކުރި 50 ވަނަ ލަނޑެވެ. ފުރަތަމަ ހާފާއި ހިލާފަށް މި މެޗުގެ ދެވަނަ ހާފުގައި ވިލާއަށް މާ ރަނގަޅު ކުޅުމެއް ދެއްކޭ ގޮތެއް ނުވިއެވެ.
މި ކާމިޔާބީއާއެކު ސްޕާސް އިން މިހާރުވަނީ ކުޅުނު 10 މެޗުން ލިބިފައިވާ 16 ޕޮއިންޓާއެކު ތާވަލްގެ ހަތްވަނައަށް ކުރިއަށް ޖެހިލާފައެވެ. އަދި ވިލާއަށް މި މެޗު ގެއްލުމާއެކު އެ ޓީމަށް ތާވަލްގެ ތިންވަނައަށް އެރުމަށް ލިބިގެންދިޔަ ފުރުސަތު މިވަނީ ގެންލިގެން ގޮސްފައެވެ. އަދި މިއާއެކު ވިލާ މިހާރު އުޅެނީ 18 ޕޮއިންޓާއެކު ތާވަލްގެ ފަސްވަނައިގައެވެ.