03 Nov 2024, 18:48
އިޓާލިއަން ސެރީއާގައި ޔުވެންޓަސް އާއި އުދިނޭސީ ބައްދަލުކުރި މެޗު ޔުވެންޓަސްއިން ކާމިޔާބު ކޮށްފިއެވެ.
އުދިނޭސީގެ ދަނޑުގައި ކުޅުނު މިމެޗު ޔޫވޭއިން ކާމިޔާބު ކޮށްފައިވަނީ ދެ ލަނޑު ސުން ލަނޑުންނެވެ. ދެޓީމުގެ ފަރާތުން ވާދަވެރި ކުޅުމެއް ފެނުނު މިމެޗުގައި ގިނައިރު ޔޫވޭއިން ބޯޅަ ގެންގުޅުނުއިރު ހަމަލާ އުފެއްދިފައިވަނީ ދެޓީމަށްވެސް ހަމަހަމަ ކޮށެވެ.
މިމެޗުގެ ފެށުން ރަނގަޅުވީ ޔޫވޭގެއެވެ. މިގޮތުން މެޗުގެ 19 ވަނަ މިނެޓުގައި އުފެއްދި ހަމަލާއެއްގައި ޔޫވޭއިން ފުރަތަމަ ލަނޑު ޖަހައި މެޗުގެ ލީޑު ނެގިއެވެ. މިލަނޑަކީ ޔޫވޭގެ ހެފެރެން ތުރާމް އުދިނޭސީގެ ގޯލަށް ފޮނުވާލި ހަމަލާއެއް ދަނޑީގައި ޖެހިފައި ނުކުތް ވަގުތު ކީޕަރު މަޑޫކާ އޮކޯޔޭ ގައިގައި ޖެހިފައި ބައިކޮޅަށް ވަން ލަނޑެކެވެ.
ޔޫވޭއިން މިމެޗުގައި ކާމިޔާބުކުރި ދެވަނަ ލަނޑު 37 ވަނަ މިނެޓުގައި ކާމިޔާބު ކޮށްފައިވަނީ ޒުވާން ފޯވަޑް ކެނަން ޔިލްޑިސް އުދިނޭސީގެ ގޯލަށް ފޮނުވާލު ހަމަލާއެއް ދަނޑީގައި ޖެހިފައި ނުކުތް ވަގުތު ނިކޮލޯ ސަވޯނާ ގޯލް ތެރެއަށް ވައްދާލައިގެންނެވެ. މިމެޗުގެ ފުރަތަމަ ހާފުގައި ޔޫވޭއަށް ވަނީ އެޓީމުގެ ލީޑު ފުޅާކުރާނެ ރަނގަޅު ދެތިން ފުރުސަތު ލިބިފައެވެ.
މިމެޗުގެ ދެވަނަ ހާފުގައި އުދިނޭސީއިން އެޓީމުގެ ކުޅުން ފުރަތަމަ ހާފަށްވުރެ ރަނގަޅު ކުރި ނަމަވެސް ޔޫވޭގެ ޑިފެންސް ފޫއަޅުވާލެވޭގޮތެއް ނުވިއެވެ. މިހާފުގައި ދެޓީމަށްވެސް ލަނޑު ޖަހާނެ ފުރުސަތު ލިބުނެވެ. އަދި އުދިނޭސީއިން ފޮނުވާލި އެއް ހަމަލާވަނީ ޔޫވޭގެ ގޯލްގެ ހުރަސް ދަނޑިއަށްވެސް އަމާޒުވެފައެވެ.
މިކާމިޔާބީއާއެކު ޔޫވޭ މިހާރުވަނީ ކުޅުނު 11 މެޗުން ލިބިފައިވާ 21 ޕޮއިންޓާއެކު ތާވަލްގެ ތިންވަނައަށް ކުރިއަށް ޖެހިލައިފައެވެ. އެއީ ދެވަނައިގައި އުޅޭ އެންމެ ފަހުގެ ޗެމްޕިއަން އިންޓާ މިލާންއާ އެއްވަރަށް ޕޮއިންޓް ލިބި ނަމަވެސް ޖަހާފައިވާ ގޯލަށް ބަލާއިރު އިންޓާއަށް ކުރި ލިބޭތީއެވެ. މިމެޗުން ބަލިވުމުން އުދިނޭސީ އުޅެނީ 16 ޕޮއިންޓާއެކު ތާވަލްގެ އަށް ވަނައިގައެވެ.
މިމުބާރާތުގައި އޭސީ މިލާން އާއި މޮންޒާ ބައްދަލުކުރި މެޗު ރަށުން ބޭރުގައި އެއް ލަނޑު ސުން ލަނޑުން ކާމިޔާބު ކޮށްފައިވަނީ މިލާންއެވެ. މިމެޗުގައި އެޓީމުން ކާމިޔާބުކުރި ހަމައެކަނި ލަނޑު މެޗުގެ 43 ވަނަ މިނެޓުގައި ކާމިޔާބުކޮށްދިނީ ޓިޖާނީ ރެއިންޑަސްއެވެ. މިމެޗުގައި މީގެ އިތުރުންވެސް ލަނޑު ޖަހާނެ ފުރުސަތު ދެޓީމަށް ލިބުނު ނަމަވެސް އެއިން އެއްވެސް ފުރުސަތެއްގެ ބޭނުން ހިފޭގޮތެއް ނުވިއެވެ. މިމެޗުން ލިބުނު ތިން ޕޮއިންޓާއެކު މިލާން މިހާރު އުޅެނީ 17 ޕޮއިންޓާއެކު ތާވަލްގެ ހަތް ވަނައިގައެވެ. އަދި މޮންޒާ އުޅެނީ އަށް ޕޮއިންޓާއެކު ތާވަލްގެ 18 ވަނައިގައެވެ.