03 Nov 2024, 09:58
ވަރަށް ގިނަ ބައެއްގެ މެދުގައި ބޮޑު މަގުބޫލު ކަމެއް ހޯދާފައިވާ ސްޓާ ޕްލަސްގެ މަޝްހޫރު ސިލްސިލާ "އަނޫޕަމާ"ގެ ބަތަލާ ރުޕާލީ ދެކެ އެ ސިލްސިލާއިން ފެނުނު ގިނަ ތަރިންތަކެއް ހިތްހަމަނުޖެހުން ފާޅުކޮށްފިއެވެ.
ސްޓާ ޕްލަސްއިން ދައްކަމުން އަންނަ ޑްރާމާ ސިލްސިލާތަކުގެ ތެރެއިން އެންމެ ޓީއާރްޕީ މަތި "އަނޫޕަމާ"އިން ބެލުންތެރިންގެ މަގުބޫލުކަން ހޯދި ވަރަށް ގިނަ ތަރިންތަކެއް މިހާރު ވަނީ ވަކިވެފައެވެ.
އެ ސިލްސިލާގެ 'ވަންރާޖް'ގެ ރޯލް ކުޅުނު ސުދާންޝޫ ޕާންޑޭ އަދި 'ކާވިޔާ'ގެ ރޯލް ކުޅުނު މަދަލްސާ ޝަރުމާ ޝޯއިން ވަކިވިކަން އިއުލާނުކޮށްފައިވާއިރު ކުޑަ ދުވަސްކޮޅެއްގެ ތެރޭ ބެލުންތެރިންގެ މަގުބޫލުކަން ހޯދި ނިދީ ޝާހް، ނިޝީ ސަކްސޭނާ އަދި ކުންވަރު އަމަރު ވެސް ވަނީ މި ސިލްސިލާއިން ވަކިވެފައެވެ.
'އަނޫޕަމާ' ސީރީސްގެ ކިންޖަލްގެ ރޯލް ކުޅުނު ބަތަލާ ނިދީ އަދި ސަމަރުގެ ރޯލްއިން ކުރިން ފެނުނު އެކްޓަރު ޕަރަސް--ފޮޓޯ/ބޮލީވުޑްހަންގާމާ
މި ތަރިންތައް މީޑިއާއަށް ދީފައިވާ އިންޓަވިއުތަކުގައި ބުނެފައިވަނީ އެ ސިލްސިލާއިން ވަކިވާން ޖެހުނީ ކާސްޓުންގެ މެދުގައި ހިޔާލު ތަފާތުވުން އުފެދި އެކަކު އަނެކަކަށް އޮންނަ އިހުތިރާމު ކުޑަވެ, ގުޅުން ކުޑަވުމާ ގުޅިގެން ކަމަށެވެ.
މި ސިލްސިލާގައި 'ކިންޖަލް'ގެ ރޯލް ކުޅެފައިވާ ނިދީ ޝާހް ބުނިގޮތުގައި އޭނާ ކުޅެފައިވާ ވަރަށް ގިނަ ސީންތައް އެޕިސޯޑުތަކުގައި ދައްކަނީ އެއްބައި ކަނޑާލުމަށް ފަހުއެވެ. އެކަން އެނގުނީ ވަރަށް ފަހުން ކަމަށާއި ނިދީ ސިލްސިލާގައި ހެދުން އަޅާ ގޮތާ އިސްތަށިގަނޑު ސްޓައިލްކުރާ ގޮތް ކަމުނުގޮސްގެން އެކަމުގެ ޝަކުވާ ވެސް 'އަނޫޕަމާ'ގެ ރޯލް ކުޅޭ ރުޕާލީ ކޮށްފައިވާ ކަމަށް ނިދީ ވަނީ ބުނެފައެވެ.
މި ސިލްސިލާއިން އެންމެ ގިނަ ބައެއްގެ ސަމާލުކަން ލިބޭ ތަރިއަކީ ރުޕާލީ ކަމަށްވުމުން ބަތަލާއާ ދެކޮޅަށް ވާހަކަދައްކަން އެންމެން ވެސް ޖެހިލުންވާ ކަމަށާއި ސީރީސް ގެނެސްދޭ މީހުން އެފަދަ ޝަކުވާތަކަށް މާބޮޑު ސަމާލުކަމެއް ނުދޭ ކަމަށް ވެސް މި ސިލްސިލާގެ ބައެއް ތަރިން ވަނީ ބުނެފައެވެ.
އޭގެތެރޭގައި މީގެ ދެ އަހަރުކުރިން "އަނޫޕަމާ"އިން 'ސަމަރު'ގެ ރޯލްއިން ފެނުނު ޕަރަސް ކަލްނަވަތު ހިމެނެއެވެ. މި ސިލްސިލާގެ ވާހަކައަށް ބޮޑެތި ބަދަލުތަކެއް ގެނެސްގެން މިހާރު ވެސް ދައްކަމުން އަންނައިރު ފަހުން ގެނެސްދޭން ފެށި އެޕިސޯޑުތަކުން ފެންނަނީ މުޅިންވެސް އާ މޫނު ތަކެކެވެ.