03 Nov 2024, 11:21
އިންގްލިޝް ޕްރިމިއާ ލީގުގައި ބޯންމޯތުން އެންމެ ފަހުގެ ޗެމްޕިއަން މެންޗެސްޓާ ސިޓީ ބަލިކޮށް ގިނަ ބަޔަކު ހައިރާން ކޮށްލައިފިއެވެ.
ބޯންމޯތުގެ ދަނޑުގައި ކުޅުނު މި މެޗު އެ ޓީމުން ކާމިޔާބު ކޮށްފައިވަނީ 2 ލަނޑު އެއް ލަނޑުންނެވެ. މިއީ ބޯންމޯތުގެ ވައިޓާލިޓީ ސްޓޭޑިއަމްގައި ކުޅެ އެ ޓީމަށް ސިޓީގެ މައްޗަށް ކުރި ހޯދުނު ފުރަތަމަ ފަހަރެވެ.
އެންމެ ފަހުން ލީގުގައި ކުޅުނު ދެ މެޗުގައި އާސެނަލް އާއި އެސްޓާން ވިލާ އާއި ބައްދަލުކުރި ދެ މެޗުން ލިބުނު ހަތަރު ޕޮއިންޓާއެކު މި މެޗަށް އެ ޓީމުން ކުރިމަތިލީ ވަރަށް އިތުބާރާއި ހިތްވަރާ އެކުއެވެ. އެއާ ހިލާފަށް ސިޓީ މެޗަށް ކުރިމަތިލާފައިވަނީ އެ ޓީމަށް ދިމާވެފައިވާ އަނިޔާގެ މައްސަލަ ތަކުގެ ސަބަބުން އެ ޓީމަށް މައްސަލަތަކާ ކުރިމަތިލާން ޖެހިފައިވާ ދަނޑިވަޅެއްގައެވެ.
ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ ސިޓީއިން އުފެއްދި ނަމަވެސް މި މެޗުގެ ފުރަތަމަ ހާފުގައި ގޯލަށް އަމާޒުކޮށް އެންމެ ހަމަލާއެއް ވެސް ފޮނުވާލެވިފައެއް ނުވެއެވެ. އެއާ ހިލާފަށް ބޯންމޯތުން މެޗު ފެށީ ވަރަށް އިތުބާރާއެކު އެހާމެ ފޯރީގައެވެ.
އެ ޓީމުން އުފައްދަމުންދިޔަ ހަމަލާތަކުގެ ނަތީޖާ އަކަށް ވެގެންދިޔައީ މެޗުގެ ނުވަ ވަނަ މިނެޓުގައި އެ ޓީމުން މެޗުގެ ފުރަތަމަ ލަނޑު ޖަހައި މެޗުގެ ލީޑު ނެގުމެވެ. މި ލަނޑު އެ ޓީމަށް ކާމިޔާބު ކޮށްދިނީ މި މެޗުގައި މޮޅު ކުޅުމެއް ދެއްކި ސަމޭޑޯއެވެ. މި ލަނޑާއެކު ސިޓީގެ ކުޅުން ރަނގަޅު ވެގެންދާނެކަމަށް ބެލެވުނު ނަމަވެސް މި މެޗުގައި ސިޓީގެ އަސްލު ކުޅުމާ ގާތަށްވެސް އެ ޓީމަށް ކުޅުން ދެއްކެމުން ނުދިޔަކަން ފާހަގަ ވެގެންދިޔައެވެ.
މި މެޗުގެ ފުރަތަމަ ހާފެކޭ އެއްގޮތަށް ދެވަނަ ހާފުވެސް ބޯންމޯތުން ފެށީ ވަރަށް ފޯރީގައެވެ. އަދި ކުޅުން ފެށިތާ މާގިނަ އިރު ތަކެއް ނުވެ އެޑަސަންއަށް ބޯންމޯތުގެ ހަމަލާއެއް ދިފާއުކުރަން ޖެހުނުތަން ފެނިގެންދިޔައެވެ. މި ހާފުގައި ސިޓީއިން ކޮންމެވެސް ވަރަކަށް ކުޅެވޭތޯ މަސައްކަތް ކުރި ނަމަވެސް މެޗުގެ 64 ވަނަ މިނެޓުގައި އުފެއްދި ކައުންޓާ އެޓޭކެއްގައި ދެން ފެނިގެންދިޔައީ ބޯންމޯތުން ދެވަނަ ލަނޑު ޖަހާ އެ ޓީމުގެ ލީޑު ފުޅާކުރިތަނެވެ. މި ލަނޑު އެ ޓީމަށް ކާމިޔާބު ކޮށްދިނީ އެވަނީލްސަންއެވެ.
މި މެޗުގައި ސިޓީއަށް ބޯންމޯތުގެ ގޯލަށް އަމާޒުކޮށް ފުރަތަމަ ހަމަލާ ފޮނުވާލެވިފައިވަނީ މެޗުގެ 80 ވަނަ މިނެޓުގައެވެ. އަދި މި ހަމަލާ އުފެއްދިތާ ދެ މިނެޓް ފަހުން ސިޓީއިން މި މެޗުގައި ކާމިޔާބުކުރި ހަމައެކަނި ލަނޑު ޖޮސްކޯ ގުވަޑިއޯލް ކާމިޔާބު ކުރިއެވެ. މި މެޗުގެ ފަހު ވަގުތު ކޮޅު ސިޓީއިން ލަނޑެއް ޖެހޭތޯ މަސައްކަތް ކުރި ނަމަވެސް އެކަން އެ ޓީމަށް ކާމިޔާބު ކުރެވޭގޮތެއް ނުވިއެވެ.
މި ކާމިޔާބީއާއެކު ބޯންމޯތު މިހާރު އުޅެނީ 10 މެޗުން ލިބިފައިވާ 15 ޕޮއިންޓާއެކު ތާވަލްގެ އަށް ވަނައިގައެވެ. އަދި ސިޓީއަށް ބަލާލާއިރު މިއީ މި ސީޒަންގައި ލީގުގައި އެ ޓީމު ބަލިވި ފުރަތަމަ މެޗެވެ. އަދި އެ ޓީމު މިސީޒަންގައި ޖެހިޖެހިގެން ބަލިވި ދެވަނަ މެޗެވެ. އަދި މިހާރު އެ ޓީމަށް ދިމާވެފައިވާ އަނިޔާގެ މައްސަލަ ތަކާއެކު ކުރިއަށް އޮތް ޗެމްޕިއަންސް ލީގުގައި ސްޕޯޓިން ލިޒްބަން އާ ރަށުން ބޭރުގައި ކުޅޭ މެޗުގައި ވެސް ނާކާމިޔާބީ އާ ކުރިމަތިލާންޖެހުން ގާތްކަމަށް ގިނަ ފަރާތްތަކުން ފާހަގަ ކުރެއެވެ.
މި މުބާރާތުގައި ސައުތެމްޕްޓަން އާއި އެވަޓަން ބައްދަލުކުރި މެޗު އެއް ލަނޑު ސުން ލަނޑުން ކާމިޔާބުކޮށް ސައުތެމްޕްޓަން މި ވަނީ މި ސީޒަންގައި ލީގުގައި ފުރަތަމަ ކާމިޔާބީ ހާސިލްކޮށްފައެވެ. މި މެޗުގައި ސައުތެމްޕްޓަންގެ ހަމައެކަނި ލަނޑު އެ ޓީމަށް ކާމިޔާބު ކޮށްދިނީ 85 ވަނަ މިނެޓުގައި އެޑަމް އާމްސްޓްރޯންގްއެވެ. މި ކާމިޔާބީއާއެކު ސައުތެމްޕްޓަން މިހާރު އުޅެނީ ހަތަރު ޕޮއިންޓާއެކު ތާވަލްގެ 19 ވަނައިގައެވެ. އަދި އެވަޓަން އުލެނީ ނުވަ ޕޮއިންޓާއެކު ތާވަލްގެ 16 ވަނައިގައެވެ.