02 Nov 2024, 23:56
ޖަރުމަނު ބުންޑެސްލީގާގައި ތާވަލްގެ އެއްވަނައިގާ އުޅޭ ބަޔެން މިޔުނިކާއި ޔޫނިއަން ބާލިން ބައްދަލުކުރި މެޗު ބަޔޭންްއިން ކާމިޔާބުކޮށްފިއެވެ.
ބަޔޭންގެ ދަނޑުގައި ކުޅުނު މިމެޗު އެ ޓީމުން ކާމިޔާބު ކޮށްފައިވަނީ 3-0 އިންނެވެ. ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗު އެއްކޮށް ކަހަލަ ގޮތަކަށް ކޮންޓްރޯލް ކޮށްފައިވަނީ ބަޔޭންއިންނެވެ.
މި މެޗުގެ ފުރަތަމަ ލަނޑު ބަޔޭން އިން ކާމިޔާބުކޮށްފައިވަނީ މެޗުގެ 15 ވަނަ މިނެޓުގައި ލިބުނު ޕެނަލްޓީ އަކުންނެވެ. މި ޕެނަލްޓީ ކާމިޔާބުކޮށްދީ ބަޔޭންއަށް މެޗުގެ ލީޑު ނަގައިދިނީ ހުނަރުވެރި ފޯވަޑް ހެރީ ކޭންއެވެ.
މި މެޗުގައި ބަޔޭންއިން ކާމިޔާބުކުރި ދެވަނަ ލަނޑު މެޗުގެ 43 ވަނަ މިނެޓުގައި ކާމިޔާބު ކޮށްދިނީ ކިންގްލީ ކޯމަންއެވެ. އަދި ފަހު ލަނޑު މެޗުގެ 51 ވަނަ މިނެޓުގައި ކާމިޔާބުކޮށްދިނީ އަނެއްކާވެސް ފުރަތަމަ ލަނޑު ޖަހައިދިން ކޭންއެވެ. މި ލަނޑާއެކު ކޭން މިހާރުވަނީ ލީގުގައި 11 ލަނޑު ޖަހާފައެވެ.
މި ކާމިޔާބީއާއެކު ބަޔޭން މިހާރު އުޅެނީ ކުޅުނު ނުވަ މެޗުން ލިބިފައިވާ 23 ޕޮއިންޓާއެކު ތާވަލްގެ އެއްވަނައިގައެވެ. އަދި މިކާމިޔާބީއާއެކު ބަޔޭންއިން މިހާރު ޖެހިޖެހިގެން ތިން މެޗުން ލީގުގައި މޮޅުވެފައިވުމުން އެޓީމަށް ކުރިއަށް އޮތް ޔުއޭފާ ޗެމްޕިއަންސް ލީގުގައި ކުޅެ މެޗަށް އިތުރު ހިތްވަރެއް ލިބިގެންދާނެކަމަށް ބެލެވެއެވެ. އަދި މި މެޗުން ބަލިވުމުން ޔޫނިއަން ބާލިން އުޅެނީ 15 ޕޮއިންޓާއެކު ތާވަލްގެ ހަވަނައިގައެވެ.