02 Nov 2024, 23:50
އިންގްލިޝް ޕްރިމިއާ ލީގުގައި ލިވަޕޫލާއި ބްރައިޓަން އެންޑް ހޯވް އެލްބިއަން ބައްދަލުކުރި މެޗު ލިވަޕޫލުން ކާމިޔާބުކޮށް ތާވަލްގެ އެއްވަނައަށް އަރައިފިއެވެ.
ލިވަޕޫލްގެ ދަނޑުގައި ކުޅުނު މިމެޗު އެޓީމުން ކާމިޔާބު ކޮށްފައިވަނީ ފަހަތުން އަރާ 1-2 އިންނެވެ. ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ގިނައިރު ބްރައިޓަންއިން ބޯޅަ ގެންގުޅުނު އިރު ގިނަ ހަމަލާ އުފައްދާފައިވަނީ ލިވަޕޫލްއިންނެވެ.
ނަމަވެސް މި މެޗުގެ ފެށުން ރަނގަޅުވީ ބްރައިޓަންގެއެވެ. މިގޮތުން މެޗުގެ 14 ވަނަ މިނެޓުގައި އުފެއްދި ހަމަލާއެއްގައި ބްރައިޓަންއިން ވަމީ މެޗުގެ ލީޑު ނަގާފައެވެ.
މި ލަނޑު އެ ޓީމަށް ކާމިޔާބު ކޮށްދީފައިވަނީ ފާޑީ ކަޑިއޮގްލޫއެެވެ. މިމެޗުގެ ފުރަތަމަ ހާފުގައި އިތުރު ލަނޑެއް ފެނިގެން ނުދިޔަ ނަމަވެސް ލަނޑު ޖަހާނެ ފުރުސަތު ދެ ޓީމަށް ވެސް މި ހާފުގައި ލިބިގެންދިޔައެވެ. މި ހާފުގައި މޮޅަށް ކުޅުނު ތަން ފެނިގެންދިޔައީ ބްރައިޓަންއިންނެވެ.
ފުރަތަމަ ހާފާއި ހިލާފަށް ދެވަނަ ހާފަށް ލިވަޕޫލުން ނިކުތީ ފުރަތަމަ ހާފަށް ވުރެ ރަނގަޅު ކުޅުމެއް ދައްކާ މިމެޗުން ނަތީޖާއެއް ނެރުމުގެ އުންމީދުގައެވެ. މިގޮތުން މިހާފުގައި އެޓީމުގެ ފަރާތުން ފެނިގެންދިޔަ ކުޅުމުން އެކަން ފާހަގަ ވިއެވެ.
މި ހާފުގައި ބްރައިޓަންއިން ވެސް ރަނގަޅު ކުޅުމެއް ދެއްކި ނަމަވެސް ލިވަޕޫލަށް މި ހާފުގައި ލަނޑު ޖެހުން ހިފެހެއްޓޭގޮތެއްނުވިއެވެ. މިމެޗުގައި ލިވަޕޫލުން ކާމިޔާބުކުރި ފުރަތަމަ ލަނޑު ޖަހާ މެޗުގެ ނަތީޖާ އެޓީމުން ހަމަހަމަ ކޮށްފައިވަނީ 69 ވަނަ މިނެޓުގައި ކޯޑީ ކަގްޕޯ ކާމިޔާބުކޮށްދިން ލަނޑުންނެވެ. އަދި މިލަނޑު ޖެހިތާ ތިން މިނެޓްފަހުން މި މެޗުން ލިވަޕޫލް މޮޅުވި ލަނޑު އެޓީމަށް ޖަހައިދިނީ މުހަންމަދު ސަލާހްއެވެ. މި މެޗުގައި އިތުރު ލަނޑެއް ފެނިގެން ނުދިޔަ ނަމަވެސް ދެޓީމުންވެސް ވަނީ ބަލާހިތްވާ މޮޅު ކުޅުމެއް ދައްކާފައެވެ.
މި ކާމިޔާބީއާއެކު ލިވަޕޫލަށް ތާވަލްގެ އެއްވަނަ ލިބިގެން ދަނީ 10 މެޗުން ލިބިފައިވާ 25 ޕޮއިންޓާއެކުއެވެ. އަދި މި މަގާމް ލިބުމުގައި ކުރިން ތާވަލްގެ އެއްވަނައިގާ އޮތް އެންމެ ފަހުގެ ޗެމްޕިއަން މެންޗެސްޓާ ސިޓީ ކުޅުނު މެޗުން އެޓީމު ބަލިވުމެވެ. ބްރައިޓަން މިމެޗުން ބަލިވުމާއެކު އެޓީމު އުޅެނީ 16 ޕޮއިންޓާއެކު ތާވަލްގެ ހަތްވަނައިގައެވެ.