01 Nov 2024, 19:59
އިންގްލިޝް ޕްރިމިއާ ލީގުގެ މެންޗެސްޓާ ޔުނައިޓެޑްގެ އާ ކޯޗަކަށް ޕޯޗުގަލްގެ ރުބެން އަމޮރިމް ހަމަޖައްސައިފިއެވެ.
މަޢުލޫމާތު ލިބިފައިވާ ގޮތުގައި އުމުރުން 39 އަހަރުގެ އަމޮރިމް ޔުނައިޓެޑަށް ސޮއިކޮށްފައިވަނީ ދެ އަހަރާއި އަށް މަސް ދުވަހުގެ އެއްބަސްވުމެއްގެ ދަށުންނެވެ. އެހެންކަމުން އޭނާ ޔުނައިޓެޑްގައި 2027 ވަނަ އަހަރުގެ ޖޫން މަހުގެ ނިޔަލަށް ދެމިހުންނާނެއެވެ.
ނަމަވެސް އޭނާ މިޔުނައިޓެޑަށް ސޮއިކުރި ނަމަވެސް ޓީމާއި ހަވާލުމަށް ހަމަޖެހިފައިވަނީ މި ހިނގާ ނިވެމްބަރު މަހުގެ 11 ވަނަ ދުވަހުން ފެށިގެންނެވެ. އޭހާ ތަނަށް އޭނާ ހުންނާނީ މިހާރު ކޯޗު ކޮށްދެމުންދާ ލީގާ ޕޯޗުގަލްގެ ޗެމްޕިއަން ސްޕޯޓިން ލިޒްބަންއާއެކުއެވެ.
އެހެން ކަމުން ޔުނައިޓެޑްގެ ކޯޗު އެރިކް ޓެން ހާގް ވަކިކުރުމަށްފަހު ވަގުތީގޮތުން އެ މަގާމް ހަވާލުކުރި އެ ޓީމުގެ ކުރީގެ ކުޅުންތެރިޔާ ކަމުގައިވާ ރޫޑް ވެން ނިސްޓެރޯއީ އިތުރު ތިން މެޗުގައި އެޓީމުގެ ބެންޗުން ފެނިގެންދާނެއެވެ.
އަމޮރިމް ވެގެންދާނީ 2013 ވަނަ އަހަރު ޔުނައިޓެޑްގެ ކޯޗުކަމުން ސާ އެލެކްސް ފާގަސަން ވަކިވިފަހުން އެ ޓީމުގެ ދާއިމީ ކޯޗުކަމުގެ މަގާމާއި ހަވާލުވާ ހަވަނަ ކޯޗަށެވެ.
ޔުނައިޓެޑުން އާންމު ކުރި ބަޔާނެއްގައި ހާމަކުރިގޮތުގައި އަމޮރިމްއަކީ މިވަގުތު ޔޫރަޕްގެ ފުޓްބޯޅައިގާ އެންމެ ފާހަގަ ކޮށްލެވޭ ޒުވާން ކޯޗުންގެ ތެރެއިން އެއް ކޯޗު ކަމަށެވެ. ޔުނައިޓެޑުން މިކަން ހާމަކުރުމުގެ ކުރިން ސްޕޯޓިންއިން ވަނީ ޔުނައިޓެޑުން އެ ޓީމުގެ ކޯޗު އަމޮރިމް ގެންދިއުމުގެ ޝައުގުވެރިކަން ފާޅުކޮށް އޭނާގެ ރިލީސް ކްލައުސްގައި ހިމެނޭ 11 މިލިއަން ޔޫރޯ ދައްކަންވެސް ތައްޔާރަށް ތިބިކަން ހާމަކޮށްފައެވެ.
މިހާރު ހަމަޖެހިފައިވާގޮތުން އަމޮރިމް ޔުނައިޓެޑާއި މިހާރުވަނީ މިމަހުގެ އިންޓާނޭޝަނަލް ބްރޭކް އާއި ދިމާކޮށެވެ. އެހެން ކަމުން އޭނާގެ ކޯޗުކަމުގެ ދަށުން ޔުނައިޓެޑްގެ ކުޅޭ ފުރަތަމަ މެޗަށް ވެގެންދާނީ މިމަހުގެ 24 ވަނަ ދުވަހު ލީގުގައި ރަށުން ބޭރުގައި އަލަށް ޕްރޮމޯޓްވި އިޕްސްވިޗް ޓައުން އާއި ދެކޮޅަށް ކުޅޭ މެޗެވެ.
އަދި އޭނާ ޔުނައިޓެޑްގެ އޯލްޑް ޓްރެފަޑް ސްޓޭޑިއަމްގައި ކުޅޭ ފުރަތަމަ މެޗަށް ވެގެންދާނީ މި މަހުގެ 28ވަނަ ދުވަހު ޔޫރޮޕާ ލީގުގައި ނޯވޭގެ ބޯޑޯ/ގްލިމްޓް އާއި ދެކޮޅަށް ކުޅޭ މެޗެވެ. އަމޮރިމްގެ ކޯޗިން ޓީމަށް އިތުރު ވެގެންދާނެ އެހެން ކޯޗުންގެ ތަފްސީލް ޔުނައިޓެޑުން ފަހުން ހާމަކުރާނެކަމުގައި އެ ފަރާތުން ހާމަކުރެއެވެ.
މިއަހަރުގެ އޮގަސްޓް މަހުގެ ތިންވަނަ ދުވަހު ޕޯޗުގީސް ސުޕާ ކަޕްގައި ވާދަވެރި ޕޯޓޯ އަތުން ބަލިވިފަހުން މިހާތަނަށްވަނީ ބަލިނުވެ 14 މެޗު ފުރިހަމަ ކޮށްފައެވެ. އަދި މިފަހަރު ލީގުގައި މިހާތަނަށް ނުވަ މެޗު ކުޅެފައިވާއިރު އެ ހުރިހާ މެޗެއް ކާމިޔާބުކޮށް ސްޕޯޓިން އުޅެނީ 27 ޕޮއިންޓާއެކު ތާވަލްގެ އެއްވަނައިގައެވެ. އަދި މިރޭ ދަންވަރު ލީގުގައި އެސްޓްރެލާ އާއި ދެކޮޅަށް ސްޕޯޓިން ކުޅޭ މެޗުގައި ވެސް އަމޮރިމް އެ ޓީމުގެ ބެންޗުން ފެނިގެންދާނެކަމަށްވެއެވެ.
އަދި މި އަންނަ އަންގާރަ ދުވަހު އަމިއްލަ ދަނޑުގައި މެންޗެސްޓާ ސިޓީ އާއި ދެކޮޅަށް ކުޅޭ މެޗުގައިވެސް އަމޮރިމް ސްޕޯޓިން އާއެކު ހުންނާނެއެވެ. އަދި ޔުނައިޓެޑާއި އެންމެ ވާދަވެރި ސިޓީ އެމެޗުގައި ބަލިކުރެވިއްޖެނަމަ އޭނާއަށް ޔުނައިޓެޑްގެ ސަޕޯޓިންގެ ތާއިދު އިތުުރު ވެގެންދާނެކަމަށްދެކޭ ފަރާތްތަށް ވަރަށް ގިނައެވެ. ސްޕޯޓިންގެ ކޯޗެއްގެ ގޮތުން އޭނާ އެންމެ ފަހުން ފެނިގެންދާނީ މި މަހުގެ 10 ވަނަ ދުވަހު ބްރާގާ އާއި ދެކޮޅަށް ކުޅޭ މެޗެވެ.
އަމޮރިމް ޔުނައިޓެޑާއި ހަވާލުވާއިރު އެޓީމު މިވަގުތު އޮތީ ޕްރިމިއާ ލީގުގެ ތާވަލްގެ 14 ވަނައިގައެވެ. އަދި ޔޫރޮޕާ ލީގުގައި އުޅެނީ 21 ވަނައިގައެވެ. ނަމަވެސް އަމޮރިމް ޔުނައިޓެޑާއި ހަވާލުވަނީ ޔޫރަޕްގައި މިހާރު ހަރަކާތެރިވަމުންދާ ކޯޗުންގެ ތެރޭގައި ހިމެނޭ އެންމެ އުންމީދީ ކޯޗުންގެ ތެރެއިން އެއް ކޯޗުގެ ހައިސިއްޔަތުންނެވެ.
އޭނާ ކޯޗެއްގެ ހައިސިއްޔަތުން އެންމެ ފުރަތަމަ ހަރަކާތްތެރިވެފައިވަނީ ޕޯޗުގަލްގެ ތިންވަނަ ޑިވިޜަންގެ ޓީމެއްކަމުގައިވާ ކާސާ ޕިއާގެ ކޯޗެއްގެ ގޮތުން 2018 ވަނަ އަހަރުއެވެ. އަދި ހަމަ އެއަހަރުގެ ޖޫން މަަހު ބްރާގާގެ ބީ ޓީމައި ހަވާލުވެ 11 މެޗު ކުޅެވުނުތަނާވަނީ އެ ޓީމުގެ ސީނިއާ ޓީމުގެ ކޯޗުކަން ހަވާލުކޮށްފައެވެ.
އަދި ގްރާގާގެ ކޯޗެއްގެ ގޮތުގައި 13 މެޗު ކުޅުނު ތަނާ ސްޕޯޓިން އިން ވަނީ އޭނާ ހޯދުމުގެ މަސައްކަތް ފަށާފައެވެ. ބްރާގާގެ ކޯޗުގެ ގޮތުގައި އޭނާ ހޭދަކުރި 13 މެޗުގެ ތެރޭގާއި އަމޮރިމްވަނީ ބެންފީކާގެ ދަނޑުގައި ކުޅެ 65 އަހަރުގެ ތެރޭގައި ފުރަތަމަ ފަހަރަށް ބްރާގާއަށް ކާމިޔާބީ ހޯދާދީފައެވެ.
އަދި ލީގު ކަޕްގައި ޕޯޓޯ ބަލިކޮށްފައެވެ. އަދި ސްޕޯޓީންގެ ކޯޗު ކަމާ ހަވާލުވި ފުރަތަމަ އަހަރު އޭނާވަނީ އެޓީމަށް ލީގު ތަށި ކާމިޔާބު ކޮށްދީފައެވެ. އެއީ އެ ޓީމަށް 19 އަހަރުގެ ތެރޭގައި ލީގު ކާމިޔާބު ކުރެވުނު ފުރަތަމަ ފަހަރެވެ. އަމޮރިމް ހޯދުމަށް ޕްރިމިއާ ލީގުގެ އެހެން ދެ ކްލަބަކުން ވަނީ މީގެކުރިން ޝައުގުވެރިކަން ފާޅުކޮށްފައެވެ.
މިގޮތުން މައުރީސިއޯ ޕޮޗެޓީނޯ ވަކިކުރިއިރު ޗެލްސީއިން އަމޮރިމް އަށް ޝައުގު ފާޅުކުރިއިރު މިފަހަރުގެ ސީޒަން ފެށުމުގެ ކުރިން ވެސްޓް ހޭމް ޔުނައިޓެޑާއި ވާހަކަ ދެއްކުމަށް އޭނާ ލަންޑަން އަށްވެސް ދަތުރު ކޮށްފައިވެއެވެ.
ނަމަވެސް ދެން އުފެދޭ ސުވާލަކީ ޔުނައިޓެޑްގެ ހާލަތު އަމޮރިމްއަށް ބަދަލުކުރެވިދާނެތޯއެވެ. އަދި މިކަން ކުރުމަށް ޓީމުގެ މެނޭޖްމަންޓުން އޭނާއަށް ކިހާވަގުތެއް ދޭނެތޯއެވެ. ސާ އެލެކްސް ފާގަސަންގެ ފަހުން އެޓީމާއި ހަވާލުވި ހުރިހާ ކޯޗުންވެސް ހަވާލުވެފައިވަނީ އުންމީދު ތަކަކާއެކު ޔުނައިޓެޑަށް ކާމިޔާބީ ހޯދައިދީ ކުރީގެ އުސްމިންތަކަށް އެޓީމު ގެންގޮސްދިމުގެ އުންމީދާއެކުއެވެ. އެހެންކަމުން އަމޮރިމްގެ ދަށުން ޔުނައިޓެޑަށް ލިބިގެންދާ ކުރިއެރުން އެނގިގެންދާނީ އޭނާ ބޭނުންވާ ގޮތަށް ޓީމު ބައްޓަން ކުރަން އޭނާއަށް ވަގުތު ދީގެންނެވެ.