01 Nov 2024, 15:31
އެމެރިކާގެ ރިޔާސީ އިންތިޚާބުގެ ވޯޓުލުން ފެށުމަށް އެންމެ ހަތަރު ދުވަހަށް ވެފައިވާއިރު، އެތައް މިލިއަން ބަޔަކު މިހާރު ވަނީ ވޯޓުލުމަށް ތައްޔާރުވެފައެވެ.
މި މަހުގެ ފަސްވަނަ ދުވަހު ވޯޓުލާން ފަށާއިރު، މި ވޯޓަކީ ފާއިތުވި މަސްތަކުގައި ދުނިޔޭގެ ގިނަ ބައެއްގެ ސަމާލުކަން ހޯދާފައިވާ ވޯޓެކެވެ. އިންތިޚާބުގެ ނަތީޖާ އަންނަ ގޮތަކުން ދުނިޔޭގެ އިގުތިސާދަށް އަސަރުކުރުމާއި، މޫސުމީ ދަތިތަކުން ފެށިގެން ސަޕްލައި ޗެއިން ހިމެނޭހެން ބައިނަލްއަގުވާމީ އެތައް މައްސަލަތަކަކަށް އެ އިންތިޚާބުގެ ސަބަބުން އަސަރު ކުރާނެ ކަމަށް މަސްރަހު ދިރާސާކުރާ ފަރާތްތަކުން ބުނެއެވެ.
އިންތިޚާބަށް ވަގުތު ކުޑަތަންވެ، ގިނަ ބަޔަކު ވޯޓަށް އިންތިޒާރުކުރާއިރު، އެމެރިކާގެ ރައްޔިތުން ރައީސަކު ހޮވަނީ ސީދާ ކިހިނެއްކަމާއި ރިޔާސީ އިންތިޚާބު ހިނގާ ގޮތާ ބެހޭ ގޮތުން އެނގެން ބޭނުންވާ ކަންކަން ފާހަގަކޮށްލާނަމެވެ.
އިންތިޚާބު ބޭއްވުން
އެމެރިކާގެ ރައީސާއި ނާއިބު ރައީސްގެ އިންތިޚާބު ބާއްވަނީ ކޮންމެ ހަތަރު އަހަރުން އެއް އަހަރެވެ.
އެ ވޯޓު ނަގަނީ ޕްރައިމަރީގައި މައިގަނޑު ދެ ޕާޓީ ކަމަށްވާ ރިޕަބްލިކަން ޕާޓީއާއި ޑިމޮކްރެޓިކް ޕާޓީން ޕްރައިމަރީ ވޯޓު ކަރުދާހާއި ސްޓޭޓް ކޯކަސް މެދުވެރިކޮށް ކެންޑިޑޭޓަކު ހޮވާ ދިގުދެމިގެންދާ ޕްރައިމަރީ ޕްރޮސެސްއަކަށް ފަހުއެވެ. އެއަށް ފަހު އެ ކެންޑިޑޭޓް ރަސްމީކޮށް ނޮމިނޭޓް ކުރަނީ އެމެރިކާގެ 50 ސްޓޭޓުގެ ކޮންމެ ސްޓޭޓެއްގެ ޕާޓީގެ މަންދޫބުން ގައުމީ ނޮމިނޭޓިން ކޮންވެންޝަނެއްގައެވެ.
މި އަހަރު ރިޔާސީ އިންތިޚާބުގައި ވާދަކުރައްވާ ރިޕަބްލިކަން ޕާޓީގެ ކެންޑިޑޭޓަކީ ކުރީގެ ރައީސް ޑޮނަލްޑް ޓްރަމްޕެވެ. މިހާރު ވެރިކަންކުރާ ޑިމޮކްރެޓިކް ޕާޓީގެ ކެންޑިޑޭޓަކީ މިހާރުގެ ނައިބު ރައީސް ކަމަލަ ހެރިސްއެވެ. ހެރިސް ރަސްމީކޮށް ޑިމޮކްރެޓިކް ޕާޓީގެ ނޮމިނޭޓަކަށް ވެވަޑައިގަތީ މިދިޔަ އޮގަސްޓް މަހު މިހާރުގެ ރައީސް ޖޯ ބައިޑަން ރިޔާސީ ރޭހުން ވަކިވެވަޑައިގަތުމަށް ނިންމަވައި ޖުލައި މަހު އެކަން އިއުލާނުކުރެއްވުމުންނެވެ.
އިންތިޚާބު ބާއްވާ ތާރީޚު ހަމަޖައްސާފައިވަނީ އެމެރިކާގެ ކޮންގްރެސްއިން 1845 ވަނަ އަހަރު ފާސްކުރި އުސޫލަކުންނެވެ. އެމެރިކާގެ ސްޓޭޓްތަކުން ކޮންމެ ހަތަރު އަހަރަކުން އިންތިޚާބުކުރާ ރައީސް އައްޔަންކުރުމަށް އިންތިޚާބު ބާއްވަން ޖެހެނީ ނޮވެމްބަރު މަހުގެ ފުރަތަމަ ހޯމަ ދުވަހަށް ފަހު އަންނަ އަންގާރަ ދުވަހުއެވެ.
އެންމެ ކުރިއާ ޚިލާފަށް އިންތިޚާބުގެ ކުރިން އެ މީހުންގެ އުފަން ސްޓޭޓުގައި ވޯޓުލުމަށް ރަޖިސްޓްރީކުރަން ޖެހެއެވެ. އެއަށް ފަހު އެ މީހުންނަށް ތިން ގޮތެއް އޮވެއެވެ. އިންތިޚާބު ދުވަހު ވޯޓުލުމާއި، ހާޒިރުނުވާ ވޯޓު ކަރުދާހެއް މެއިލް ކުރުމާއި، ނުވަތަ ވޯޓުލާ މަރުކަޒެއްގައި އަވަހަށް ވޯޓުލުމެވެ.
އިލެކްޓޯރަލް ކޮލެޖް
އެމެރިކާގެ ރައީސްގެ އިންތިޚާބު ނިންމަނީ ސީދާ ރައްޔިތުން ލާ ވޯޓަކުން ނޫނެވެ. އޭގެ ބަދަލުގައި ރިޔާސީ އިންތިޚާބުގައި ބޭނުންކުރަނީ އިލެކްޓޯރަލް ކޮލެޖުގެ ނަމުން މަޝްހޫރު ޕްރޮސެސްއެކެވެ.
"ކޮލެޖް"އަކީ ސްޓޭޓް ވޯޓުލުމުގެ ޒިންމާ އުފުލަން ތިބޭ ބަޔަކަށް ކިޔާ ނަމެވެ. މި ނިޒާމު ބޭނުންކުރަނީ ހަމައެކަނި ރައީސަކު ހޮވުމަށެވެ. އެމެރިކާގެ އެހެން ހުރިހާ އިންތިޚާބެއް ނިންމަނީ އާދައިގެ އާންމު ވޯޓަކުންނެވެ.
އިލެކްޓޯރަލް ކޮލެޖް ނިޒާމުގައި އާންމު ވޯޓަށް ފަހު، ކޮންމެ ސްޓޭޓަކުން ވެސް، އެ ސްޓޭޓެއްގައި ތިބޭ އިލެކްޓޯރަލް ކޮލެޖްއިން ރިޔާސީ ކެންޑިޑޭޓަށް ވޯޓުލާނެއެވެ. އިލެކްޓާސްއިން ވޯޓުލާން ޖެހޭނީ އެ ސްޓޭޓަކުން އެންމެ ގިނަ އާންމުންގެ ވޯޓު ލިބުނު ކެންޑިޑޭޓަށެވެ.
އެ ނިޒާމުގައި އެމެރިކާގެ 50 ސްޓޭޓުގެ ކޮންމެ ސްޓޭޓަކަށް ވެސް ގިނަ އަދަދެއްގެ އިންތިޚާބީ ވޯޓު ދޫކުރަނީ އެމެރިކާގެ ކޮންގްރެސްގައި އެ ސްޓޭޓެއް ތަމްސީލުކުރާ މިންވަރަށް ބަލައިގެންނެވެ.
ޖުމްލަ 538 އިލެކްޓޯރަލް ކޮލެޖް ވޯޓް އޮވެއެވެ.
ކެންޑިޑޭޓަކު ރިޔާސީ އިންތިޚާބު ކާމިޔާބުކުރުމަށްޓަކައި ވޯޓުގެ އަޣުލަބިއްޔަތު 270 ނުވަތަ އެއަށްވުރެ ގިނަ ވޯޓު ހޯދަން ޖެހެއެވެ.
އެއްވެސް ކެންޑިޑޭޓަކަށް އަޣުލަބިއްޔަތު ނުލިބިއްޖެ ނަމަ، ރައީސަކު ހޮވަން ދެން ވޯޓު ދޭނީ އެމެރިކާގެ ގާނޫނު ހަދާ މަޖިލީހުގެ މެންބަރުންގެ ތިރިގެ ކަމަށްވާ ހައުސް އޮފް ރެޕްރެޒެންޓޭޓިވްސް އިންނެވެ.
އިންތިޚާބަށް ފަހު ކޮންމެ ސްޓޭޓަކުން ވެސް ރައީސާއި ނައިބު ރައީސަށް ރަސްމީކޮށް ވޯޓު ދޭނެއެވެ. ދެން ޖެނުއަރީ މަހު ކޮންގްރެސްގެ ޖޮއިންޓް ސެޝަނެއް ބާއްވައި އިންތިޚާބުގެ ނަތީޖާ އިއުލާނުރާނެއެވެ. އެމެރިކާގެ އާ ރައީސް ވެރިކަމާ ހަވާލުވެވަޑައިގަންނަވާނީ 20 ޖެނުއަރީ 2025 ގައެވެ.