31 Oct 2024, 23:31
އިންގްލިޝް ޕްރިމިއާ ލީގުގެ ޗެމްޕިއަން މެންޗެސްޓާ ސިޓީއަށް ދިމާވެފައިވާ އަނިޔާގެ މައްސަަތްއް އިތުރުވެ އެކްލަބް ހާސްކަމުގެ ތެރެއަށް ވެއްޓިފައިވާކަމުގައި އެ ޓީމުގެ ކޯޗު ޕެޕް ގާޑިއޯލާ ހާމަކޮށްފިއެވެ.
ޕެޕް މިކަން ހާމަކޮށްފައިވަނީ ކަރަބާއޯ ކަޕްގެ ހަތަރު ވަނަ ބުރުގައި ރަށުން ބޭރުގައި ޓޮޓްނަމް ހޮޓްސްޕާ އާއި ބައްދަލުކޮށް ބަލިވި މެޗަށްފަހު ވާހަކަ ދައްކަމުންނެވެ.
ޕެޕް ހާމަކުރިގޮތުގައި އެ ޓީމުގައި ސްޕާސް މެޗުގައި އަނިޔާވި ކުޅުންތެރިންނާއެކު މިހާރު ފިޓްކޮށް ތިބި 13 ކުޅުންތެރިން ކަމަށާއި އެހެންކަމުން މިހާރު ކްލަބް މި ވަނީ ހާސްކަމުގެ ތެރެއަށް ވެއްޓިފައެވެ.
ސްޕާސް މެޗު ފެށުމުގެ ކުރިން މަނުއެލް އަކާންޖީއަށް އަނިޔާވެފައިވާއިރު މެޗުގެ 63 ވަނަ މިނެޓުގައި ކުރިއަށް ކުޅޭ ސާވިއޯ ވަނީ އަނިޔާވެގެން ބާލާފައެވެ. އަދި އަކާންޖީގެ ބަދަލުގައި ކުޅެން އެރި ރުބެން ޑިއާޒް ދެވަނަ ހާފުގައި ކުޅެން ނޭރުނިވެސް އަނިޔާގެ މައްސަލަ ތަކެއް އިހްސާސް ކުރެވިފައިވުމުންނެވެ.
ޕެޕް ހާމަކުރިގޮތުގައި އެ ޓީމުގައި މިހާރު ފިޓްކޮށް ތިބި ކުޅުންތެރިންވެސް ސްޕާސް ނިންމާލިއިރު އިތުރު ކުދި މައްސަލަ ތަކާއި ކުރިމަތިލާން ޖެހިފައިވާކަމަށާއި އެހެން ކަމުން އެކުޅުންތެރިން ރިކަވާ ވަނީ ކިހާވަރަކަށްތޯ ވެސް ޖެހޭނީ ބަލާށެވެ.
ޕެޕް ހާމަކުރި ގޮތުގައި އޭނާ ސިޓީގައި މިހާތަނަށް ހޭދުކުރި ނުވަ އަހަރުގެ ތެރޭގައި މި ހާލަތަށް މީގެކުރިން އައިސްފައިނުވެއެވެ. މިހާ ގިނަ އަނިޔާތަކަކާ އެއްފަހަރާއި ކުރިމަތިލާނ ޖެހިފައިނުވާ ކަމަށެވެ. އަދި މިއަންނަ ހޮނިހިރު ދުވަހު ޕްރިމިއާ ލީގުގައި ރަށުން ބޭރުގައި ބޯންމޯތު މެޗާއި ކުރިމަތިލާން ބަލާއިރު ރިކަވަރީއަށް މިއޮތީ ވަރަށް ކުޑަ ވަގުތު ކޮޅެއް ކަމަށެވެ.
ސިޓީއަށް މި ސީޒަންގައި ދިމާވެފައިވާ އަނިޔާގެ މައްސަލަތަކަށް ބަލާލާއިރު ލިސްޓުގެ އެންމެ ކުރީގައި އުޅެނީ ދާދިފަހުން ބެލޮން ޑިއޯގެ އިނާމް އުފުލާލި ރޮޑްރީއެވެ.
އޭނާގެ ފަޔަށް ލިބުނު އަނިޔާ އާއި ގުޅިގެން މިހާރު އޮޕަރޭޝަން ކޮށްފައިވާއިރު އޭނާއަށް މި ސީޒަންގައި ވެސް ނުކުޅެވޭނެކަންވަނީ ޔަގީންވެފައެވެ. މި ފަހަރުގެ ޕްރީ ސީޒަންގައި އެންމެ ރަނގަޅު ކުޅުމެއް ދެއްކި އޮސްކާ ބޮބް އަށް އޮގަސްޓް މަހު ލިބުނު އަނިޔާގެ ސަބަބުން އޭނާވެސް ވަނީ ދިގު މުއްދަތަކަށް ކުޅުމާ ދުރަށް ދާންޖެހިފައެވެ. ނަމަވެސް އޭނާ ސީޒަންގެ ފަހު ބައިގައި ފެނިގެންދިއުން ގާތްކަމަށްވެއެވެ.
މިދިޔަ ސީޒަންގައި އަނިޔާގެ ސަބަބުން ފަސް މަސް ދުވަސް ކުޅުމާއި ދުރުގައި ހުއްނަން ޖެހުނު ކެވިން ޑި ބްރުއިނާ އަށް ލިބުނު އަނިޔާގެ ސަބަބުން ކުޑަ ދުވަސް ކޮޅަކަށް ކުޅުމާ ދުރަށް ދާން ޖެހޭނެ ކަމަށް ހީވި ނަމަވެސް މިހާރު އޭނާ ފިތްވާނެ ދުވަހެއް ބުނަން ނޭނގޭ ކަމަށްވަނީ ޕެޕް ހާމަކޮށްފައެވެ. ޓީމުގެ ކެޕްޓަން ކައިލް ވޯކާގެ ކަކުލަށް ލިބުނު އަނިޔާގެ ސަބަބުން ކުޅުމާ ދުރުގައި ހުރިއިރު އޭނާއަށް އަނބުރާ އާދެވޭނެ ދުވަހެއް ނޭނގެއެވެ.
ކުރިއަށް ކުޅޭ ދެ ކުޅުންތެރިން ކަމުގައިވާ ޖެރެމީ ޑޮކޫ އާއި ޖެކް ގްރީލިޝް ވެސް ވަނީ އަނިޔާގެ ސަބަބުން އެންމެ ފަހުން ކުޅުނު ދެތިން މެޗުގައި ބައިވެރިވެވޭ ގޮތް ނުވެފައެވެ. އަދި ނޮވެމްބަރު މަހުގެ އިންޓަނޭޝަނަލް ބްރޭކްގެ ކުރިން ޑޮކޫ ފެންނާނެކަމަކަށް ނުބެލޭކަމުގައި އެ ކްލަބުން ހާމަކުރެއެވެ. އަދި އެންމެ ފަހުން އަނިޔާވި އަކާންޖީ އާއި ސާވީނިއޯގެ އަނިޔާގެ ހާލަތު އަދި އެނގޭވަރެއް ނުވެއެވެ.
ސިޓީ އެންމެ ފަހުން ޕްރިމިއާ ލީގުގައި ސައުތެމްޕްޓަން އާއި ބައްދަލުކޮށް އެއް ލަނޑު ސުން ލަނޑުން މޮޅުވި މެޗުގައި އެކްލަބްގެ ބެންޗުގައި ތިބީ ހަތް ކުޅުންތެރިންނެވެ. މީގެތެރެއިން ދެ ކުޅުންތެރިންނަނީ ކީޕަރުންނެވެ. ޕެޕް ހާމަކުރިގޮތުގައި ސްޕާސް މެޗަށްފަހު މިއަދު ބާއްވާ ފަރިތަކުރުންތަކުގައި ބައިވެރިވާން ތިބޭނީ ފޯވަޑް އާލިން ހާލަންޑްއާއި ދެ ކީޕަރުން އެކަންޏެވެ.
މި ފެށޭ ނޮވެމްބަރު މަހު އިންޓަނޭޝަނަލް ބްރޭކްގެ ކުރިން އެ ޓީމަށް އޮތް މެޗުތަކަށް ބަލާއިރު ބޯންމޯތު މެޗުގެ އިތުރުން ޔުއޭފާ ޗެމްޕިއަންސް ލީގުގައި ރަށުން ބޭރުގައި ސްޕޯޓިން ލިޒްބަން އާއި ބައްދަލުކުރާ މެޗާއި ލީގުގައި ރަށުން ބޭރުގައި ބްރައިޓަން އެންޑް ހޯވް އެލްބިއަން އާއި ބައްދަލުކުރާ މެޗު ހިމެނެއެވެ.
ޕެޕް ހާމަކުރިގޮތުގައި ގިނަ މުބާރާތް ތަކެއްގައި ސިޓީ އެއް ފެންވަރެއްގައި ވާދަކުރަން ބޭނުންނަމަ މި ކުޅުންތެރިން އަވަހަށް އަނިޔާއިން އެނބުރި އައިސް ޓީމާއި ގުޅުން ވަރަށް މުހިންމެވެ.