31 Oct 2024, 12:36
އިޓާލިއަން ސެރީއާގައި އެންމެ ފަހުގެ ޗެމްޕިއަން އިންޓާ މިލާން އާއި އެމްޕޯލީ ބައްދަލުކުރި މެޗު އިންޓާއިން ކާމިޔާބުކޮށް ތާވަލްގެ އެއްވަނައިގައި އުޅޭ ނަޕޯލީއާ ގާތަށް ޖެހިލައިފިއެވެ.
އެމްޕޯލީގެ ދަނޑުގައި ކުޅުނު މިމެޗު އިންޓާއިން ކާމިޔާބު ކޮށްފައިވަނީ ތިން ލަނޑު ސުން ލަނޑުންނެެވެ. ދެޓީމުގެ ފަރާތުން ވާދަވެރި ކުޅުމެއް ފެނުނު މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ އިންޓާއިންނެވެ. ނަމަވެސް އެމްޕޯލީއިންވަނީ މިމެޗުގެ ފުރަތަމަ ހާފުގައި އިންޓާއަށް ލަނޑެއް ޖެހުނަނުދީ ހިފަހައްޓާލައިފައެވެ. ނަމަވެސް މިކަން ކުރުމުގެ ތެރެއިން އެޓީމުގެ ސަބާ ގޮގްލިޗިޑްޒޭއަށް ވަނީ މެޗުގެ 31 ވަނަ މިނެޓްގައި ރަތް ކާޑު ދައްކައިފައެވެ. މިއާއެކު މެޗުގެ ބޮޑު ބައި އެޓީމުން ކުޅެފައިވަނީ އެއް ކުޅުންތެރިއެއް މަދުކޮށެވެ.
މިމެޗުގެ ފުރަތަމަ ލަނޑު އިންޓާއިން ކާމިޔާބު ކޮށްފައިވަނީ ދެވަނަ ހާފުގެ ކުޅުން ފެށިތާ ފަސް ވަނަ މިނެޓުގައި ޑޭވިޑް ފްރަޓޭސީ ޖަހައިދިން ލަނޑުންނެވެ. މިމެޗުގައި އިންޓާގެ ދެވަނަ ލަނޑު މެޗުގެ 67 ވަނަ މިނެޓުގައި ޖަހައިދިނީ ވެސް ފްރަޓޭސީއެވެ. އިންޓާގެ ފަހު ލަނޑު މެޗުގެ 79 ވަނަ މިނެޓުގައި ކާމިޔާބު ކޮށްދިނީ ކެޕްޓަން ލައުޓާރޯ މާޓިނޭޒްއެވެ.
މިކާމިޔާބީއާއެކު އިންޓާ މިހާރު އުޅެނީ ކުޅުނު 10 މެޗުން ލިބިފައިވާ 21 ޕޮއިންޓާއެކު ތާވަލްގެ ދެވަނައިގައެވެ. އަދި އެއްވަނައިގައި އުޅޭ ނަޕޯލީއާ ދެމެދުގައިވާ ފަރަގު މިހާރުވަނީ ހަތަރު ޕޮއިންޓަށް ކުޑަކޮށްފައެވެ. މިމެޗުން ބަލިވުމުން އެމްޕޯލީ އުޅެނީ 11 ޕޮއިންޓާއެކު ތާވަލްގެ 11 ވަނައިގައެވެ.
މިމުބާރާތުގައި އެޓަލާންޓާ އާއި މޮންޒާ ބައްދަލުކުރި މެޗު ދެ ލަނޑު ސުން ލަނޑުން ކާމިޔާބުކޮށް އެޓަލާންޓާ މިހާރުވަނީ ތާވަލްގެ ތިން ވަނައަށް އަރާފައެވެ. މިމެޗުގައި އެޓްލާންޓާއަށް އެޓީމުގެ ދެ ލަނޑު ކާމިޔާބު ކޮށްދީފައިވަނީ ލަޒާ ސަމާޑްޒިޗް އާއި ޑޭވިޑް ޒަޕަކޯސްޓާއެވެ. މިކާމިޔާބީއާއެކު އެޓަލާންޓާ މިހާރުވަނީ ކުޅުނު 10 މެޗުން 19 ޕޮއިންޓް ހޯދައި ކުރިން ތިންވަނައިގައި އުޅުނު ޔުވެންޓަސް ހަތަރު ވަނައަށް ފަހަތަށް ޖައްސާލައިފައެވެ.
ޔުވެންޓަސް ތާވަލްގެ ހަތަރު ވަނައަށް ވެއްޓުމުގެ އެންމެ ބޮޑު އެއް ސަބަަބަކަށްވީ ޕާމާއާ ބައްދަލުކުރި މެޗު އަމިއްލަ ދަނޑުގައި ކުޅެ ދެ ލަނޑު ދެ ލަނޑުން އެއްވަރު ވުމެވެ. މިމެޗުގައި ޕާމާއިން އެންރީކޯ ޑެލް ޕްރާޓޯ އާއި ސައިމަން ސޯމް ޖަހައިދިން ދެ ލަނޑާއެކު ދެ ފަހަރު މަތިން މިމެޗުގައި ލީޑު ނެގި ނަމަވެސް ޔޫވޭއިން ވަނީ ވެސްޓަން މެކެނީ އާއި ޓިމޮތީ ވެއާ ޖަހާދިން ދެ ލަނޑުން ދެ ފަހަރު މަތިން ފަހަތުން އަރައި މެޗުގެ ނަތީޖާ ހަމަހަމަ ކޮށްފައެވެ.
މިމެޗު އެއްވަރު ވުމުން ޔޫވޭ ހަތަރު ވަނައަށް ވެއްޓިފައިވަނީ 10 މެޗުން ލިބިފައިވާ 18 ޕޮއިންޓާއެކުއެވެ. އަދި ޕާމާ އުޅެނީ ނުވަ ޕޮއިންޓާއެކު ތާވަލްގެ 14 ވަނައިގައެވެ.