31 Oct 2024, 13:39
ކަރަބާއޯ ކަޕްގެ ކުއާޓާ ފައިނަލުން ލިވަޕޫލް ޖާގަހޯދައިފިއެވެ.
މިމުބާރާތުގެ ކުއާޓާ ފައިނަލުން ލިވަޕޫލް ޖާގަހޯދީ ހަތަރުވަނަ ބުރުގައި ބްރައިޓަން އެންޑް ހޯވް އެލްބިއަންއާ ރަށުން ބޭރުގައި ބައްދަލުކުރި މެޗު ތިން ލަނޑު ދެ ލަނޑުން ކާމިޔާބު ކޮށްގެންނެވެ.
ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ލިވަޕޫލެވެ. މިމެޗުގެ ފުރަތަމަ ހާފުގައި ލަނޑު ޖަހާނެ ފުރުސަތު ދެޓީމަށް ލިބިގެންދިޔަ ނަމަވެސް މިމެޗުގައި ފެނިގެންދިޔަ ފަސް ލަނޑުވެސް ފެނިގެން ގޮސްފައިވަނީ ދެވަނަ ހާފުގައެވެ. މިމެޗުގެ ފުރަތަމަ ލަނޑު ދެވަނަ ހާފުގެ ކުޅުން ފެށިތާ އެއް މިނެޓްފަހުން ޖަހާ ލީޑު ނަގާފައިވަނީ ލިވަޕޫލުންނެވެ.
މިލަނޑު އެޓީމަށް ކާމިޔާބު ކޮށްދީފައިވަނީ ކޯޑީ ގަކްޕޯއެވެ. އަދި އެޓީމުގެ ދެވަނަ ލަނޑު މެޗުގެ 63ވަނަ މިނެޓުގައި ޖަހާ ލީޑު ފުޅާކޮށްދީފައި ވަނީ ވެސް ގަކްޕޯއެވެ. ބްރައިޓަން އިން މިމެޗުގައި ކާމިޔާބު ކުރި ފުރަތަމަ ލަނޑު މެޗުގެ 81ވަނަ މިނެޓުގައި ޖަހައިދިނީ ސައިމަން އަޑިންގްރާއެވެ.
މިލަނޑާއެކު ބްރައިޓަންއިން މެޗުގެ ނަތީޖާ ހަމަހަމަ ކުރުމަށް ކުރަމުންދިޔަ މަސައްކަތް އިތުރު ކުރި ނަމަވެސް އަނެއްކާ ވެސް ފެނުނީ ލިވަޕޫލުން ލަނޑެއް ޖަހާ ދެ ލަނޑުގެ ލީޑު ނެގި ތަނެވެ. މިލަނޑު އެޓީމަށް ކާމިޔާބު ކޮށްދިނީ 85ވަނަ މިނެޓުގައި ލުއިސް ޑިއާޒްއެވެ. މިމެޗުގައި ބްރައިޓައިން އިން ކާމިޔާބުކުރި ދެވަނަ ލަނޑު މެޗުގެ ފަހު މިނެޓުގައި ކާމިޔާބުކޮށްދިނީ ތާރިގް ލެމްޕްޓީއެވެ.
މިމެޗުން ބަލިވި ނަމަވެސް ބަރައިޓަން އިން ވަނީ މޮޅު ކުޅުމެއް ދައްކާ ލަނޑު ޖަހާނެ ރަނގަޅު ފުރުސަތު ތަކެއް ތަނަވަސްކޮށް ލިވަޕޫލްގެ ގޯލަށް ނުރައްކާތެރި ހަމަލާތަކެއް ފޮނުވާލާފައެވެ.
މިކާމިޔާބީއާއެކު މިމުބާރާތުގެ ކުއާޓާ ފައިނަލުން ލިވަޕޫލަށް ޖާގަލިބިފައިވާއިރު ކުއާޓާ ފައިނަލުގައި ލިވަޕޫލް ބައްދަލުކުރުމަށް ހަމަޖެހިފައިވަނީ ސައުތެމްޕްޓަންއާއެވެ.
މިމުބާރާތުގެ ކްއާޓާ ފައިނަލުން ސައުތެމްޕްޓަން އިން ޖާގަހޯދާފައިވަނީ ސްޓޯކް ސިޓީއާ ބައްދަލުކުރި މެޗު ތިން ލަނޑު ދެ ލަނޑުން ކާމިިޔާބު ކޮށްގެންނެވެ. މިމުބާރާތުގެ ކްއާޓާ ފައިނަލުންވަނީ ނިއުކާސްލް ޔުނައިޓެޑާއި ބްރެންޓްފަޑްވެސް ޖާގަހޯދައިފައެވެ.
ނިއުކާސްލް އިން ޗެލްސީ ދެ ލަނޑު ސުން ލަނޑުން ބަލިކޮށް ކުއާޓާ ފައިނަލުން ޖާގަހޯދިއިރު ބްރެންޓްފަޑް ޖާގަހޯދާފައިވަނީ ޝެފީލްޑް ވެނިސްޑޭއާ ބައްދަލުކުރި މެޗު އެއް ލަނޑު އެއް ލަނޑުން ދެޓީމު އެއްވަރުވެ ޕެނަލްޓީ ޖަހައިގެން ފަސް ލަނޑު ހަތަރު ލަނޑުންނެވެ.