31 Oct 2024, 15:40
ކަރަބާއޯ ކަޕްގެ ކުއާޓާ ފައިނަލުން އާސެނަލް އާއި ކްރިސްޓަލް ޕެލަސް ޖާގަހޯދައިފިއެވެ.
މިމުބާރާތުގެ ކުއާޓާ ފައިނަލުން އާސެނަލް ޖާގަ ހޯދައިފައިވަނީ ޕްރެސްޓަން ނޯތު އެންޑްއާ ރަށުން ބޭރުގައި ބައްދަލުކޮށް ތިން ލަނޑު ސުން ލަނޑުން މެޗު ކާމިޔާބު ކޮށްގެންނެވެ.
ދެ ޓީމުގެ ފަރާތުން ވާދަވެރި ކުޅުމެއް ފެނުނު މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ އާސެނަލްއިންނެވެ. މިމެޗުގެ ފުރަތަމަ ލަނޑު އާސެނަލްއަށް ކާމިޔާބު ކޮށްދިނީ ތަޖުރިބާކާރު ފޯވަޑް ގެބްރިއެލް ޖޭސުސްއެވެ. މިއީ އޭނާ މިއަހަރުގެ ޖެނުއަރީ މަހަށް ފަހު އެޓީމަށް ކާމިޔާބު ކޮށްދިން ފުރަތަމަ ލަނޑެވެ.
މިމެޗުގައި އާސެނަލްގެ ދެވަނަ ލަނޑު މެޗުގެ 33 ވަނަ މިނެޓުގައި ކާމިޔާބު ކޮށްދިނީ ޒުވާން ހުނަރުވެރިޔާ އީތަން އެންވަނޭރީއެވެ. މިމެޗުގައި އޭނާ ފޮނުވާލި އިތުރު ހަމަލާއެއްވަނީ ގޯލްގެ ދަނޑިއަށްވެސް އަމާޒުވެފައެވެ.
މީގެ އިތުރުން މިމެޗުގައި އޭނާ ދެއްކި ކުޅުމަށް ކޯޗު މިކޭލް އާޓޭޓާގެ ތައުރީފް ލިބުނެވެ. މިމެޗުގައި އާސެނަލްއިން ކާމިޔާބުކުރި ފަހު ލަނޑު މެޗުގެ 57 ވަނަ މިނެޓުގައި ކާމިޔާބު ކޮށްފައިވަނީ ބަދަލު ކުޅުންތެރިޔާ ކައި ހަވާޓްޒްއެވެ. މިމެޗުގައި އިތުރު ލަނޑެއް ނުފެނުނު ނަމަވެސް ލަނޑު ޖަހާނެ ރަނގަޅު ފުރުސަތު އަސެނަލްއަށް ލިބުނެވެ.
މިމުބާރާތުގެ ކުއާޓާ ފައިނަލްގައި ޑިސެމްބަރު މަހުގެ ތިންވަނަ ހަފުތާގައި އާސެނަލް ބައްދަލުކުރުމަށް ހަމަޖެހިފައިވަނީ ކްރިސްޓަލް ޕެލަސް އާއެވެ.
ޑައިޗީ ކަމާޑާ ގޯލު ޖެހުމަށް ފަހު އުފާފާޅުކުރަނީ: ޕެލަސްއިން ވަނީ ދެ ލަނޑު އެއް ލަނޑުން މެޗު ކާމިޔާކޮށްފައި -- ފޮޓޯ/ ޕީއޭ
މިމުބާރާތުގެ ކުއާޓާ ފައިނަލުން ޕެލަސް ޖާގަހޯދީ ރަށުން ބޭރުގައި އެސްޓަން ވިލާއާ ބައްދަލުކުރި މެޗު ދެ ލަނޑު އެއް ލަނޑުން ކާމިޔާބު ކޮށްގެންނެވެ. ދެޓީމުގެ ފަރާތުން ވާދަވެރި ކުޅުމެއް ފެނުނު މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ވިލާއިންނެވެ. ނަމަވެސް މިއާއެކުވެސް މިމެޗުގެ ފެށުން ރަނގަޅުވީ ޕެލަސްގެއެވެ. މިގޮތުން މެޗުގެ އަށް ވަނަ މިނެޓުގައި އުފެއްދި ހަމަލާއެއްގައި ޕެލަސްއިން ވަނީ މެޗުގެ ލީޑު ނަގައިފައެވެ. މި ލަނޑު އެޓީމަށް ކާމިޔާބު ކޮށްދިނީ އެބެރެޗީ އެޒޭއެވެ. ނަމަވެސް މިލަނޑު ޖެހިތާ 10 މިނެޓްފަހުން އެޒޭ ވަނީ އަނިޔާވެގެން ބާލަން ޖެހިފައެވެ.
މިމެޗުގައި ވިލާއިން މެޗުގެ ނަތީޖާ ހަމަހަމަ ކޮށްފައިވަނީ މެޗުގެ 23 ވަނަ މިނެޓުގައި ޖޯން ޑުރާން ކާމިޔާބު ކޮށްދިން ލަނޑުންނެވެ. މިމެޗުން ޕެލަސް މޮޅުކޮށްދިން ލަނޑު މެޗުގެ 64 ވަނަ މިނެޓުގައި ކާމިޔާބު ކޮށްދިނީ އެޒޭގެ ބަދަލުގައި ފުރަތަމަ ހާފުގައި ކުޅެން އެރުވި ޑައިޗީ ކަމާޑާއެވެ.
މިކާމިޔާބީއާއެކު މިމުބާރާތުގެ ކުއާޓާ ފައިނަލް އިން ޕެލަސް ޖާގަހޯދާފައިވާއިރު މިއީ 2011-2012 ވަނަ އަހަރުގެ ސީޒަނަށްފަހު މިމުބާރާތުގެ ކުއާޓާ ފައިނަލުން އެޓީމަށް ޖާގަ ހޯދުނު ފުރަތަމަ ފަހަރެވެ. އަދި މިއީ މިސީޒަންގައި ޕެލަސްއަށް ޖެހިޖެހިގެން ދެމެޗު ކާމިޔާބު ކުރެވުނު ފުރަތަމަ ފަހަރެވެ.