30 Oct 2024, 13:50
އަހަރުގެ މޮޅު ކުޅުންތެރިޔާއަށް ދެމުން އަންނަ ބެލެންޑޯ އެވޯޑު މިފަހަރު ލިބުނު ސްޕެއިންގެ ރޮޑްރީއަށް އެ އެވޯޑު ހައްގު ކަމަށް އިންގްލިޝް ޕްރިމިއާ ލީގުގެ ކްލަބް މެންޗެސްޓާ ސިޓީގެ ކޯޗް ޕެޕް ގާޑިއޯލާ ބުނެފިއެވެ.
ރޮޑްރީ މި އެވޯޑު ހާސިލް ކޮށްފައިވަނީ ރެއާލް މެޑްރިޑްގެ ވިނީޝިއަސް ޖޫނިއާ އާއި ޖޫޑް ބެލިންހަމް ފަހަތަށް ޖައްސާލުމަށްފަހުއެވެ. މިދިޔަ ސީޒަންގައި ރޮޑްރީވަނީ ޖެހިޖެހިގެން ހަތަރު ފަހަރަށް ޕްރިމިއާ ލިގުގެ ތަށި ސިޓީއަށް ކާމިޔާބު ކޮށްދިނުމުގެ އިތުރުން ޔޫރޯ މުބާރާތް ސްޕެއިން އަށް ކާމިޔާބު ކޮށްދިނުމުގައި ވެސް މުހިންމު ދައުރެއް އަދާކޮށްފައެވެ. އަދި އެމުބާރާތުގައި އެންމެ މޮޅު ކުޅުންތެރިޔާގެ މަގާމު ވެސް ހޯދާފައިވަނީ ރޮޑްރީއެވެ.
މީގެއިތުރުން މިދިޔަ ސީޒަންގައި ރޮޑްރީވަނީ ސިޓީ އާއެކު ޔުއޭފާ ސުޕާ ކަޕްގެއިތުރުން ކްލަބް ވޯލްޑް ކަޕް ވެސް ކާމިޔާބު ކޮށްފައެވެ. ރޮޑްރީ ވެފައިވަނީ 2008ވަނަ އަހަރު ކްރިސްޓިއާނޯ ރޮނާލްޑޯ މިއިނާމް ހާސިލް ކުރިފަހުން ޕްރިމިއާ ލީގަށް ކުޅެމުންދާ ކުޅުންތެރިއަކަށް މި އެވޯޑް ލިބުން ފުރަަތަމަ ފަހަރެވެ.
މިއީ ސްޕެއިންގެ ފުޓްބޯޅައަށްވެސް ލިބިގެންދިޔަ އިނާމެއްގެގޮތުގައި ޕެޕް ސިފަކުރިއެވެ. އޭނާ ބުނީ ސްޕެއިންގެ ފުޓްބޯޅަ ވަނީ ވޭތުވެދިޔަ 10، 15 އަހަރުގެ ތެރޭގައި ބޮޑެތި ކުރިއެރުންތަކެއް ހާސިލް ކޮށްފައިކަމަށެވެ. މީގެތެރޭގައި ތަށި ހޯދުމުގެ އިތުރުން ފުޓްބޯޅަ ކުޅުމަށް އައިސްފައިވާ ކުރިއެރުން ޕެޕް ފާހަގަ ކުރިއެވެ.
ސްޕެއިންގެ ކުރީގެ ދެ ކުޅުންތެރިން ކަމަށްވާ ޒާވީ ހެނާންޑޭޒް ތިން ފަހަރެއްގެ މަތިން ތިންވަނައަށް ގޮސްފައިވާއިރު އަންޑްރޭސް އިނިއެސްޓާ ވަނީ 2010ވަނަ އަހަރު ލިއޮނެލް މެސީގެ ފަހަތުން ދެވަނައަށް ގޮސްފައެވެ. ފަހަރެއްގައި އެއިރު އެ ދެކުޅުންތެރިންނަށް އެއިނާމް ލިބުން ހައްގު ކަމަށްވެސް ވެދާނެ ކަމަށެވެ. އެހެން ކަމުން ރޮޑްރީއަށް މިފަހަރު ލިބިގެން މިދިޔައީ ސްޕެއިން ފުޓްބޯޅައަށް ހައްގު އިނާމެއް ކަމުގައި ޕެޕް ހާމަކުރިއެވެ.
މިފަހަރު އެންމެ މޮޅު ކްލަބްގެ އިނާމް ހާސިލް ކުރި ރެއާލް މެޑްރިޑުން ބެލެންޑޯ އެވޯޑު ދިނުމުގެ ރަސްމިއްޔާތުގައި ބައިވެރިނުވުމަށް ނިންމި ނިންމުމާއި ގުޅޭގޮތުން ޕެޕް ބުނީ، އެޓީމުން އެރަސްމިއްޔާތުގައި ބައިވެރިނުވާން ނިންމުން އެއީ އެކްލަބްގެ ކަމެއް ކަމަށާއި އެއީ މައްސަލައެއް ނޫން ކަމަށެވެ. އަދި ރޮޑްރީއަށް އެފަރާތުން މަރުހަބާކިޔުން އެއީ ރަނގަޅު ކަމެއް ކަމަށާއި އަދި މަރުހަބާ ނުކިޔިއަސް އެއީ މައްސަލައެއް ނޫން ކަމަށެވެ.
އޭނާ ގަބޫލު ކުރާ ގޮތުގައި ފުރަތަމަ، ދެވަނަ ނުވަތަ ތިންވަނަ މަގާމު ލިބުން އެއީ އާދަޔާ ހިލާފު ބޮޑު ކާމިޔާބީއެއް ކަމަށާއި އޭގެން ހާމަކޮށްދެނީ އެފަރާތްތަކުން ކާމިޔާބު ސީޒަނެއް ހޭދަކޮށްފައިވާކަން ކަމުގައި ޕެޕް ސިފަކުރިއެވެ. އެކަމާ އެއެކުޅުންތެރިން އުފާކުރަން ޖެހޭނެ ކަމަށްވެސް ޕެޕް ހާމަކުރިއެވެ.
މިފަހަރުގެ ރަސްމިއްޔާތުގައި ރެއާލް އިން ބައިވެރިވެފައި ނުވަނީ އެޓީމުގެ ކުޅުންތެރިޔަކަށް ބެލެންޑޯގެ އެއްވަނަ މަގާމު ލިބިފައިނުވާތީ އެއީ އެޓީމަށް އިހުތިރާމް ނުކުރާ ކަމުގެ ހެއްކެއް ކަމަށްބުނެ އެޓީމަށް އިހްތިރާމް ނުކުރާ ބައެއް ކުރާ ކަމެއްގައި ބައިވެރިނުވާނެކަމަށް ބުނެއެވެ.
މީގެއިތުރުން ވިނީޝިއަސްއަށް މިއިނާމް ނުލިބުމަކީ އިންސާފުވެރި ގޮތެއް ނޫންކަމަށް ބްރެޒިލްގެ ޖާނަލިސްޓުންނާއި ސިޔާސީ ފަރާތްތަކުގެ އިތުރުން ފުޓްބޯޅައި ދުނިޔޭގައި ފާހަގަ ކޮށްލެވޭ އެހެން ބައެއް ފަރާތްތަކުން ވެސް އަންނަނީ ބުނަމުންނެވެ.