29 Oct 2024, 19:43
މޯލްޑިވްސް ފައިނޭންސް ލީސިން ކޮމްޕެނީ (އެމްއެފްއެލްސީ)ގެ 23ވަނަ އަހަރީ ދުވަހުގެ މުނާސަބަތުގައި، އެ ކުންފުނިން އިސްލާމިކް ފައިނޭންސް ޚިދުމަތްތައް ދިނުމަށް ''އެމްއެފްއެލްސީ މާލް'' އިފުތިތާހު ކޮށްފިއެވެ.
އެމްއެފްއެލްސީ މާލް އިފުތިތާހުކުރީ ކުންފުނީގެ ކާމިޔާބީތަކާއި މުވައްޒަފުންގެ އަގު ވަޒަންކުރުމަށް ބޭއްވި "ސްޓާފް އެޕްރިސިއޭޝަން ނައިޓު" ހަފުލާގައެވެ. މި މުނާސަބަތު ޝަރަފު ކޮށްދެއްވީ މޯލްޑިވްސް ޕެންޝަން އެޑްމިނިސްޓުރޭޝަން އޮފީހުގެ ޗީފް އެކްސެކެޓިވް އޮފިސަރު ސުޖާތާ ހަލީމެވެ.
އެމްއެފްއެލްސީ މާލްއަކީ ޝަރިއްޔާ ހަމަތަކުން ޚިދުމަތް ދިނުމަށް އިފުތިތާހުކުރި މާލީ ޚިދުމަތެކެވެ.
މި ޚިދުމަތުގެ ސަބަބުން ރާއްޖޭގައި މަގުބޫލުވަމުން އަންނަ އިސްލާމިކް ފައިނޭންސްގެ ޚިދުމަތްތައް ފުޅާވުމަށް މަގުފަހިވާނެ ކަމަށް އެމްއެފްއެލްސީން ބުނެއެވެ. އަދި ޝަރިއްޔާގެ ހަމަތަކާއި މިންގަނޑުތަކުން ދޭ އެމްއެފްއެލްސީ މާލްގެ ޚިދުމަތްތައް ވާނީ ހިންގުމުގައި ދެފުށްފެންނަ، އިންސާފުވެރި، އަދި މާލީގޮތުން މަންފާކުރަނިވި ޚިދުމަތަކަށް ކަމަށް އެ ކުންފުނިން ބުނެއެވެ.
އެ ރަސްމިއްޔާތުގައި ވާހަކަފުޅު ދައްކަވަމުން، އެމްއެފްއެލްސީ ކުންފުނީގެ މެނޭޖިން ޑިރެކްޓަރު އަދި ޗީފް އެކްޒެކެޓިވް އޮފިސަރު އިބުތިޝާމާ އަހުމަދު ސައީދު ވިދާޅުވީ، އެމްއެފްއެލްސީ މާލް އިފުތިތާހު ކުރުމުގެ ސަބަބުން ޝަރިއްޔާގެ ހަމަތަކަށް އިސްކަންދޭ ފަރާތްތަކަށް ވެސް، އެ ކުންފުނިން މާލީ ޚިދުމަތްތަކަށް އެދުމުގެ ފުރުސަތު ފަހިވާނެކަމަށެވެ.
އެމްއެފްއެލްސީ މާލްގެ ދަށުން ޚިދުމަތްތައް ފޯރުކޮށްދޭނީ، ކަމުގެ މާހިރުންގެ ލަފާގެ މައްޗައް ބިނާކުރެވޭ، ވިޔަފާރި ހިންގުމުގެ އޮނިގަނޑެއްގެ ތެރެއިން ކަމަށް އެ ކުންފުނިން ބުނެއެވެ. އެގޮތުން މި ޚިދުމަތް ހޯދުމަށް ކުދި އަދި މެދު ފަންތީގެ ވިޔަފާރިތަކަށް ވެސް ހުށަހެޅޭނެއެވެ.
މި ޚިދުމަތް ދޭން ފަށާނެ ތާރީޚެއް އިއުލާން ކުރާނެ ކަމަށް އެމްއެފްއެލްސީން ބުންޏެވެ.