29 Oct 2024, 11:35
މިނިވަން މުއައްސަސާތަކުގެ އިތުރުން އަތޮޅު ކައުންސިލްތަކުގެ ވެރިން ކަނޑައެޅުމުގެ ބާރު ވެސް ރައީސް ޑރ. މުހައްމަދު މުއިއްޒަށް ދެއްވަންޖެހޭ ކަމަށް ރައްޔިތުންގެ މަޖިލީހުގެ ފޭދޫ ދެކުނު ދާއިރާގެ މެމްބަރު އިބްރާހިމް ދީދީ މިއަދު ވިދާޅުވެއްޖެއެވެ.
އޭސީސީއާއި އިލެކްޝަންސް ކޮމިޝަން (އީސީ)ގެ ރައީސާއި ނައިބު ރައީސް އައްޔަންކުރުމުގެ ބާރު ރައީސުލްުޖުމްހޫރިއްޔާއަށް ދޭ ގޮތަށް ސަރުކާރުގެ ފަރާތުން ވަނީ ރައްޔިތުންގެ މަޖިލީހަށް ދެ ބިލެއް ހުށަހަޅައިފައެވެ.
އެ ކަމަށް ތާއީދުކުރައްވާ އެންޓި ކޮރަޕްޝަން ކޮމިޝަންގެ ގާނޫނަށް ހުށަހެޅި އިސްލާހަށް މިއަދުގެ ޖަލްސާގައި ބަހުސްކުރައްވަމުން މެންބަރު އިބްރާހީމް ދީދީ ވިދާޅުވީ، މިހާރު ކަންކުރާ ގޮތާއި ހުށައަޅާފައިވާ އިސްލާހާ އެއްގޮތަށް ކަން ކުރުމަކުން މާ ބޮޑު ތަފާތެއް ނެތްކަމަށެވެ.
ނަމަވެސް، މިހާރު އިސްލާހު އޮތް ގޮތަކީ އެންމެ ރަނގަޅު ގޮތް ކަމަށް އޭނާ ވިދާޅުވިއެވެ.
މެންބަރު އިބްރާހީމް ދީދީ ވިދާޅުވީ، ކޮމިޝަންގެ ރައީސުންނަކީ ޚާއްސަ ބައެއް ކަމަށް ހީވެފައި އޮތް ނަމަވެސް ކޮމިޝަންތައް ހިންގަނީ ރައްޔިތުން އެދޭ ގޮތާ ޚިލާފަށް ކަމަށެވެ. އޭގެ ބަދަލުގައި އެ ކޮމިޝަންތައް ހިންގަނީ އެ ފަރާތްތަކުން އަމިއްލައަށް ބޭނުންވާ ގޮތަކަށް ކަމަށް ވިދާޅުވިއެވެ.
ހަމަ އެ ގޮތަށް އަތޮޅު ކައުންސިލްތަކުގެ ރައީސުންނަށް އަތޮޅުގެ ކައުންސިލްތައް ހިންގޭތޯ ވެސް އޭނާ ސުވާލު އުފައްދަވާފައިވެއެވެ. އޭގެ ބަދަލުގައި އަތޮޅު ކައުންސިލަށް ރައީސުން އައްޔަނުކުރުމުގެ ބާރު ވެސް ރައީސުލްޖުމްޙޫރިއްޔާއަށް ދެއްވަން އޭނާ ވަނީ ގޮވައިލައްވާފައެވެ.
"އޭރު ރައީސުލްޖުމްހޫރިއްޔާ އަތޮޅު ވެރިން ނުނީ ކަތީބުން އައްޔަންކުރި ޒަމާނުގައި މާ ރަނގަޅަށް ނޫންތޯ އަތޮޅުތަކުގެ ކަންތައްތައް ހިނގަމުން ދިޔައީ. މި ރާއްޖޭގައި މި ތިބަ އަތޮޅު ކައުންސިލްތަކުގެ ރައީސުން ވެސް ރައީސުލްޖުމްހޫރިއްޔާ އައްޔަންކުރަންވީ،" އިބްރާހީމްދީދީ ވިދާޅުވިއެވެ.
އެތައް ބިލިއަން ރުފިޔާއެއް ނަގައި ޚިޔާނާތްތެރިވެފައިވާއިރު، އެ ކޮމިޝަންތަކުގެ ޒިންމާ އޭގެ އެންމެ ފުރިހަމަ ގޮތުގައި އަދާނުކުރާ ކަމަށް އޭނާ ވިދާޅުވިއެވެ.
މި ދެ ބިލުގައި ވާގޮތުން، އޭސީސީ ނުވަތަ އީސީއަށް ރައީސަކާއި ނައިބު ރައީސެއް އައްޔަންކުރަން ކޮމިޝަންގެ މެންބަރުންގެ ތެރެއިން މެންބަރެއްގެ ނަން މަޖިލީހަށް ހުށަހަޅާނީ ރައީސުލްޖުމްހޫރިއްޔާއެވެ. މި ނަން ފާސްކުރަން މަޖިލީހުގެ ޖަލްސާއެއް ބާއްވަން ޖެހެއެވެ. އެ މަގާމުތަކުން އިސްތިއުފާދޭން ހުށަހަޅަން ޖެހޭނީ ވެސް ރައީސުލްޖުމްހޫރިއްޔާއަށް ކަމަށް އިސްލާހުގައި ބަޔާންކޮށްފައިވެއެވެ.
އެ އިސްލާހު ފާސްވެ، އަމަލުކުރަން ފެށުމުގެ ކުރިން ދެ ކޮމިޝަންގެ ރައީސާއި ނައިބު ރައީސް ވެސް ގާނޫނުގައިވާ ގޮތުގެ މަތިން މަގާމުން ވަކިވަންދެން އެ މަގާމުގައި ދެމިތިބޭނެއެވެ.