28 Oct 2024, 08:51
މިހާތަނަށް ކުޅެފައިވާ ކޮންމެ ފިލްމެއްގެ ވެސް ލީޑް ތަރިންނާ އެއްވަރަށް އާއްމުންގެ ސަމާލުކަން ހޯދާ ކުޅަދާނަ އެކްޓަރު ޕަންކަޖު ތުރިޕާޓީއަކީ އެކްޓިން ދާއިރާއަށް ނުކުތުމުގެ ކުރިން ހީވާގިކަމާ އެކު ދަނޑުވެރިކަން ކުރަމުން އައި މީހެއްކަން އެނގިއްޖެއެވެ.
ދަނޑުވެރިކަމުގެ މަސައްކަތުގައި ދަނޑު ހެއްދުމުގައި އަވަދިނެތި އުޅުނު ޕަންކަޖުއަށް ފިލްމު އިންޑަސްޓްރީން ފުރުސަތު ލިބުނު ގޮތުގެ ވާހަކައަކީ ވަރަށް ފިލްމީ އެހާމެ ޝައުގުވެރި ވާހަކައެއްގެ ގޮތުގައި ވަރަށް ގިނަ ބަޔަކު ސިފަކުރެއެވެ.
ފިލްމީ އާއިލާއަކަށް ނިސްބަތްނުވުމުގެ އިތުރުން އިންޑަސްޓްރީގެ އެއްވެސް މީހަކާ ގާތްގުޅުމެއް ނެތުމުން އެފަދަ އެހެން އެކްޓަރުންނެކޭ އެއްގޮތަށް ޕަންކަޖަށް ވެސް އެ ދާއިރާއަށް ނުކުމެވުނީ ވަރަށް ގިނަ ހުރަސްތައް ކަޑައްތު ކުރުމަށްފަހުއެވެ.
ޕަންކަޖު އަންހެނުން މިރުދުލާއާ އެކު--ފޮޓޯ/ޕިންކްވިލާ
އިންޑިއާގެ ބިހާރުގެ ވަރަށް އާދައިގެ އަވަށަކަށް ނިސްބަތްވާ ޕަންކަޖު ހޮޓެލް މެނޭޖްމަންޓް ދާއިރާއިން ތައުލީމު އުނގެނެމުންދިޔަ ދުވަސްވަރު މަސައްކަތް ކުރީ އިންޑިއާގެ ޕަޓްނާގެ ހޮޓަލެއްގެ ބަދިގޭގައި ސުޕަވައިޒަރެއްގެ ގޮތުގައެވެ.
އޭރު ބަދިގޭގެ ސުޕަވައިޒަރެއްގެ މަގާމު އަދާކުރަމުންދިޔަ ޕަންކަޖަކީ ކުރިމަގުގައި ބެލުންތެރިންގެ ބޮޑު މަގުބޫލުކަމެއް ލިބޭނެ ފިލްމީ ތަރިއެއްކަމަށް އެއްވެސް މީހަކު ގަބޫލެއް ނުކުރެއެވެ. ފިލްމު އިންޑަސްޓްރީއަށް ވަނުމުގެ ކުރިން ޕަންކަޖް އެންމެ ފުރަތަމަ ވެސް ކުރި ކަމަކީ ތިއޭޓާއަށް ޚާއްސަ ތަމްރީނުތަކެއް ފުރިހަމަކުރުމެވެ.
މުމްބާއިގެ މަޝްހޫރު ނެޝަނަލް ސްކޫލް އޮފް ޑްރާމާ (އެންއެސްޑީ)އިން ޖާގަ ލިބުން ވެސް ޕަންކަޖަށްވީ ވަރަށް ބޮޑު ވޭނަކަށެވެ. އެހެންނަމަވެސް، އޭނާ އޭރު ވެސް ހުރީ އެހާ ފަސޭހައިން ގޮތްދޫކުރާ ވިސްނުމެއްގައެއް ނޫނެވެ. އެންއެސްޑީން ޕަންކަޖަށް ފުރުސަތު ލިބުނީ ތިން ބުރަށް އެ ސްކޫލަށް ފޯމު ހުށަހަޅައިގެންނެވެ.
ޕަޓްނާގެ ޔުނިވާސިޓީގައި ކިޔަވަމުންދިޔަ ދުވަސްވަރު ދިމާވި ހާދިސާއަކާ ގުޅިގެން ޖަލުގައި ހަތް ދުވަސް ހޭދަކުރި އެކްޓަރު މީޑިއާއަށް ދީފައިވާ އިންޓަވިއުއެއްގައި ބުނީ، ދެ އަހަރު ދުވަސް ވަންދެން ތިއޭޓަރުގައި މަސައްކަތް ކުރީ ބަދިގޭގެ ސުޕަވައިޒަރެއްގެ ވަޒީފާގައި އުޅެމުން ކަމަށެވެ. ހެނދުނު ތިއޭޓަރުގައި މަސައްކަތް ކުރުމަށް ފަހު ރޭގަނޑުގެ ވަގުތު ހުސްކުރީ ވަޒީފާއަށް ކަމަށް ޕަންކަޖު ވަނީ ބުނެފައެވެ.
ފިލްމުތަކުންނާއި ތަފާތު އެކި އިޝްތިހާރުތަކުން މަދުމަދުން ލިބެމުންދިޔަ ފުރުސަތުތަކަށް ފަހު ޕަންކަޖްގެ އަތުގައި ނަސީބު ހިފީ 2012 ވަނަ އަހަރު ޑައިރެކްޓަރު އަނޫރާގް ކަޝްޔަޕް ގެނެސްދިން ސީރީސް "ގޭންގްސް އޮފް ވަސޭޕޫރު"އިންނެވެ.
މި ވެބް ސީރީޒްއަށް ޕަންކަޖް ވެފައި ވަނީ ކުޅޭ ކޮންމެ ފިލްމެއްގެ ވެސް 'ސްޕޮޓް ލައިޓް'އަށެވެ. ފިލްމު "މިމީ"އިން ނެޝަނަލް އެވޯޑު ވެސް ލިބިފައިވާ އެކްޓަރު ބޮލީވުޑްގެ އެންމެ މަގުބޫލު ފިލްމީ ތަރިންގެ ތެރޭ ހިމެނުނު ނަމަވެސް އެއީ ވަރަށް ހިތް ތިރި ހިތްހެޔޮ މިޒާޖެއްގެ މީހެއްގެ ގޮތުގައި ގިނަ ބަޔަކު ސިފަކުރެއެވެ.
މި އަހަރު ރިލީޒްވެ ބޮޑު ކާމިޔާބީއެއް ބޮކްސް އޮފީހުގައި ހޯދި ފިލްމު "އިސްތިރީ 2"ގެ މުހިއްމު ރޯލް ކުޅެފައިވާ ޕަންކަޖު އެންމެ އަވަހަށް ބެލުންތެރިންނަށް ފެންނާނީ ޑައިރެކްޓަރު އަނޫރާގު ބާސޫގެ ފިލްމު "މެޓްރޯ އިން ދިނޯ"އިންނެވެ.