27 Oct 2024, 23:19
ވެރިކަންކުރާ މައި ޕާޓީ ޕީއެންސީގެ މެމްބަޝިޕް އިތުރުކުރުމަށްޓަކައި ސޮއި ފޯޖުކޮށް ވަގަށް ފައިސާ ބަހަން ނުޖެހޭނެ ކަމަށާއި އެއީ ތާއީދު ނެތް ލީޑަރުންގެ ޕާޓީތަކުން ކުރަންޖެހޭ ކަންތައްތައް ކަމަށް ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއާޕާސަން އަބްދުއްރަހީމް އަބްދުﷲ މިރޭ ވިދާޅުވެއްޖެއެވެ.
އަބްދުއްރަހީމް އެފަދައިން ވިދާޅުވެފައި ވަނީ މެމްބަރުން އިތުރުކުރަން ީއެންސީން ކުރާ މަސައްކަތްތަކާ ގުޅުވައި ތުުމަތުތަކެއް އިދިކޮޅުން ކޮށްފައި ވަނިކޮށެވެ. އެގޮތުން، ސަރުކާރުގެ މުއައްސަސާތަކުގައި ރައްކާކޮށްފައި ހުރި އާންމު ރައްޔިތުންގެ ޒާތީ މައުލޫމާތު ބޭނުންކޮށްގެންނާއި ސޮއި ފޯޖުކޮށްގެން ޕީއެންސީއަށް ފޯމު ފުރަމުންދާ ކަމަށް އިދިކޮޅު އެމްޑީޕީން މިއަދު ވަނީ ތުހުމަތުކޮށްފައެވެ.
ޕީއެންސީގެ އޮފީހުގައި މިރޭ އޮތް ފޯމު ހަވާލުކުރުމުގެ ރަސްމިއްޔާތުގައި ވާހަކަފުޅު ދައްކަވަމުން އަބްދުއްރަހީމް ވަނީ އެ ތުހުމަތުތަކަށް ރައްދު ދެއްވާފައެވެ.
ރައްޔިތުން ބަލައި ނުގަންނަ ސިޔާސީ ލީޑަރުން ޕާޓީ ހެދީމަ އެ ޕާޓީތަކުން އެކަހަލަ ކަންތައްތައް ކުރާނީ. އެކަމަކު ރައްޔިތުންގެ ތާއީދާ، ރައްޔިތުންގެ ލޯތްބާއި، ރައްޔިތުންގެ އިހުތިރާމް އޮންނަ ވެރިންގެ ޕާޓީތަކަށް މެންބަރުން ވައްދާކަށެއް ނުޖެހޭނެ އެގޮތަކަށް އެކަން ކުރާކަށެއް،މަޖިލީހުގެ ރައީސް އަބްދުއްރަހީމް އަބްދުﷲ
އެކަން ވަރަށް ރަނގަޅަށް އެނގޭ ކަމަށާއި ޕީއެންސީ އޮފީހުން ކޮންމެ ރެއަކު ވެސް އެތައް ސަތޭކަ ފޯމަކާ ހަވާލުވަމުންދާ ކަމަށް އަބްދުއްރަހީމް ވިދާޅުވިއެވެ. އަދި އެއީ މަޖުބޫރުކޮށްގެން ފުރާ ފޯމެއް ނޫން ކަމަށް ވެސް އެމަނިކުފާނު ވިދާޅުވިއެވެ.
ޕީއެންސީގެ އޮފީހުގައި މިރޭ އޮތް ފޯމު ހަވާލުކުރުމުގެ ރަސްމިއްޔާތުގައި ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއާޕާސަން އަބްދުއްރަހީމް އަބްދުﷲ -- ސަން ފޮޓޯ/ ނާއިޝް ނާހިދު
ހަމައެއާއެކު ސަރުކާރުގެ އޮފީސްތަކުން ޕާޓީއަށް ފޯމު ފުރާ ވާހަކައާއި، ކުންފުނިތަކުން ޕާޓީއަށް ފޯމު ފުރާކަމަށް ބުނެ ދައްކާ ވާހަކަތައް އިވިވަޑައިގަންނަވާކަން ފާހަގަކުރައްވާ އެމަނިކުފާނު ވިދާޅުވީ ސަރުކާރުގެ ވަޒީރުކަމުގައާއި ކުންފުނިތަކުގެ މެނޭޖިން ޑިރެކްޓަރު (އެމްޑީ) ކަމުގައި ތިއްބަވާނީ ޕީއެންސީގެ މެންބަރުން ކަމަށެވެ. އެހެންކަމުން ޕީއެންސީ ބޮޑުކުރުމަކީ އެ މެންބަރުންގެ ޒިންމާއެއް ކަމަށް އެމަނިކުފާނު ވިދާޅުވިއެވެ.
އެއީ އެބޭފުޅުން އެ މަގާމަށް ވަޑައިގަންނަވަނީ ޕާޓީގެ ފަރާތުން. އެހެންވީމަ އެބޭފުޅުންގެ ޕާޓީ އެބޭފުޅުން ބޮޑުކުރަން މަސައްކަތްކުރުމަކީ ދުނިޔޭގެ އެއްވެސް ތަނެއްގަ މަލްޓިޕާޓީ ޑިމޮކްރަސީއެއްގަ ހުރަހެއް އޮންނާނެ ކަމެއް ނޫން،މަޖިލީހުގެ ރައީސް އަބްދުއްރަހީމް އަބްދުﷲ
ޕިއެންސީގެ ރައީސް، ރައީސުލްޖުމްޙޫރިއްޔާ ޑރ. މުހައްމަދު މުއިއްޒު ވެރިކަމަށް ވަޑައިގެންނެވިއިރު ޕީއެންސީގައި ތިބި މެންބަރުންގެ އަދަދަކީ 3،022 ނަމަވެސް، އެމަނިކުފާނުގެ ވެރިކަމަށް އެއް އަހަރު ނުފުރެނީސް މިހާރު ރާއްޖޭގައި އޮތް އެންމެ މެންބަރުން ގިނަ ޕާޓީއަކީ ޕީއެންސީ ކަމަށް އަބްދުއްރަހީމް ވިދާޅުވިއެވެ.
ހަމައެއާއެކު ޕާޓީއަށް މެންބަރުން ވެއްދުމަކީ ވަރަށް ބުރަ މަސައްކަތެއް ކަމަށާއި އެކަން އެނގޭނީ އެކަން ތަޖުރިބާ ކޮށްފައި ތިބޭ މީހުންނަށް ކަމަށް އެމަނިކުފާނު ވިދާޅުވިއެވެ.
ޕީއެންސީން ގެންދަނީ މި އަހަރުގެ ނޮވެމްބަރު ނިމުމުގެ ކުރިން 75،000 މެންބަރުން އެ ޕާޓީއަށް ހަމަކުރުމުގެ މަސައްކަތް ކުރަމުންނެވެ. އެގޮތުން، މިހާތަނަށް 65،000އަށްވުރެ ގިނަ މެންބަރުން ހަމަކުރެވިއްޖެ ކަމަށް އެ ޕާޓީގެ ޕާލިމެންޓްރީ ގްރޫޕްގެ ލީޑަރު އަދި ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު އިބްރާހީމް ފަލާހު އިއްޔެ ވަނީ ވިދާޅުވެފައެވެ.
ޕީއެންސީގެ މި ހަރަކާތާ ގުޅިގެން ކަންބޮޑުވުން ފާޅުކޮށް އެމްޑީޕީން މިއަދު ނެރުނު ބަޔާނެއްގައި ވަނީ، މެމްބަރުން އިތުރުކުރުމަށް ދައުލަތުގެ މުދަލާއި ވަސީލަތްތައް ބޭނުންކުރުމުގެ ތުހުމަތާއި އިތުރު ތުހުމަތުތަކެއް ޕީއެންސީއަށް ކޮށްފައެވެ.
އަދި އެކަން ސީރިއަސް މައްސަލައެއްގެ ގޮތުގައި ބަލައި، ގާނޫނީ ފިޔަވަޅު އެޅުމަށް އިލެކްޝަންސް ކޮމިޝަން (އީސީ)އަށް އެމްޑީޕީން ވަނީ ގޮވާލާފައެވެ.
އިލެކްޝަންސް ކޮމިޝަނުން އާންމުކޮށްފައިވާ މައުލޫމާތުގައިވާ ގޮތުން، މި ހިނގާ ސެޕްޓެންބަރުގެ 18ވަނަ ދުވަހުގެ ނިޔަލަށް 28،983 މެންބަރުން ޕީއެންސީގައި އެބަ ތިއްބެވެ. އެއާއެކު އެ ޕާޓީއަކީ މިހާރު ރާއްޖޭގެ ތިންވަނައަށް އެންމެ ބޮޑު ޕާޓީއެވެ.
މިހާރު އެންމެ ބޮޑު ޕާޓީއަކީ އެމްޑީޕީ ކަމަށްވާއިރު އެ ޕާޓީގެ މެންބަރުންގެ އަދަދަކީ 50،851 އެވެ.