27 Oct 2024, 23:01
ޖަރުމަނު ބުންޑެސްލީގާގައި ބަޔާން މިޔުނިކާއި ވީއެފްއެލް ބޯކަމް ބައްދަލުކުރި މެޗު ބަޔާން އިން ކާމިޔާބުކޮށް ތާވަލްގެ އެއްވަނައަށް އަލުން އަރައިފިއެވެ.
ބޯކަމްގެ ދަނޑުގައި ކުޅުނު މިމެޗު ބަޔާން އިން ކާމިޔާބު ކޮށްފައިވަނީ ހީކުރި ވަރަށް ވުރެ ފަސޭހަ ކަމާއެކު ފަސް ލަނޑު ސުން ލަނޑުންނެވެ. ޗެމްޕިއަންސް ލީގުގައި އެންމެ ފަހުން އެފްސީ ބާސެލޯނާއާ ބައްދަލުކުރި މެޗުން ތަފާތު ބޮޑުކޮށް ބަލިވެފައިވުމުގެ ސަބަބުން ފާޑުކިޔުން އަމާޒުވެފައިވި ބަޔާން މިމެޗަށް ނިކުތީ އެމެޗުގެ ހިތި ހަނދާންތައް ފޮހެލާ އަލުން މޮޅުވުމުގެ އިހުސާސް ޓީމުގެ ތެރޭގައި އަށަގެންނެވުމުގެ އުންމީދާއެކުއެވެ. މިއާއެކު ބަޔާންއިން މިމެޗު ފަށާފައިވަނީ ވަރަށް ފޯރީގައެވެ. މިގޮތުން މެޗުގެ 16ވަނަ މިނެޓުގައި ބަޔާން އިން ވަނީ ފުރަތަމަ ލަނޑު ޖަހާ މެޗުގެ ލީޑު ނަގައިފައެވެ. މިލަނޑު އެޓީމަށް ކާމިޔާބު ކޮށްދިނީ މައިކަލް އޮލީސޭއެވެ. މިލަނޑު ޖެހިތާ 10 މިނެޓް ފަހުން ބަޔާންގެ ލީޑު އިތުރަށް ފުޅާކޮށްދިނީ ޖަމާލް މުސިއެލާއެވެ.
ފުރަތަމަ ހާފުގައި އިތުރު ލަނޑެއް ނުފެނުން ނަމަވެސް ލަނޑު ޖަހާނެ އިތުރު ފުރުސަތު ބަޔާންއަށް ލިބުންކަން ފާހަގަވިއެވެ.
މިމެޗުގައި ބަޔާންގެ ތިންވަނަ ލަނޑު މެޗުގެ 57ވަނަ މިނެޓުގައި ކާމިޔާބު ކޮށްދިނީ ނުރައްކާތެރި ފޯވަޑް ހެރީ ކޭންއެވެ. މިލަނޑު ޖެހިތާ އަށް މިނެޓް ފަހުން ބަޔާންގެ ހަތަރު ވަނަ ލަނޑު ކާމިޔާބު ކޮށްދިނީ ލިރޯއި ސާނޭއެވެ. އަދި ފަހު ލަނޑު މެޗުގެ 71ވަނަ މިނެޓުގައި ކާމިޔާބު ކޮށްދިނީ ކިންގްސްލީ ކޯމަންއެވެ.
މި ކާމިޔާބީއާއެކު ބަޔާން މިހާރުވަނީ ކުޅުނު އަށް މެޗުން ލިބިފައިވާ 20 ޕޮއިންޓާއެކު ތާވަލްގެ އެއްވަނައަށް ފައިދާ ލަނޑަށް ބަލާއިރު އަރާފައެވެ. ދެވަނައިގާ އުޅޭ ލެއިޕްޒިގަށް ވެސް ވަނީ 20 ޕޮއިންޓް ލިބިފައެވެ. މިމެޗުން ބަލިވުމުން ބޯކަމް އުޅެނީ އެއް ޕޮއިންޓާއެކު ތާވަލްގެ އެންމެ ފުލުގައެވެ.