27 Oct 2024, 22:55
އިންގްލިޝް ޕްރިމިއާ ލީގުގައި ޗެލްސީ އާއި ނިއުކާސްލް ޔުނައިޓެޑް ބައްދަލުކުރި މެޗު ޗެލްސީން ކާމިޔާބު ކޮށްފިއެވެ.
ޗެލްސީގެ ދަނޑުގައި ކުޅުނު މިމެޗު އެޓީމުން ކާމިޔާބު ކޮށްފައިވަނީ ދެ ލަނޑު އެއް ލަނޑުންނެވެ. ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ޗެލްސީއެވެ. އަދި މިމެޗު ޗެލްސީން ފަށާފައިވަނީ ވެސް ވަރަށް ފޯރީގައެވެ.
ނަތީޖާ އަކަށްވީ މެޗުގެ 18ވަނަ މިނެޓުގައި ޗެލްސީން އުފެއްދި ކައުންޓާ އެޓޭކެއްގައި އެޓީމުން ލީޑު ނެގުމެވެ. މިލަނޑު އެޓީމަށް ކާމިޔާބު ކޮށްދިނީ ޕެޑްރޯ ނެޓޯ ތަނަވަސްކޮށްދިން ފުރުސަތެއްގައި ނިކޮލަސް ޖެކްސަންއެވެ. މިއީ އޭނާ މިސީޒަންގައި ލީގުގައި ކާމިޔާބުކުރި ފަސްނަ ލަނޑެވެ. މިމެޗުގައި ނިއުކާސްލް އިން މެޗުގެ ނަތީޖާ ހަމަހަމަ ކޮށްފައިވަނީ 32ވަނަ މިނެޓުގައި އެލެގްޒެންޑާ އިސާކްއެވެ.
މިމެޗުގައި ޗެލްސީން ދެވަނަ ފަހަރަށް ލީޑު ނަގާފައިވަނީ ދެވަނަ ހާފުގެ ދެވަނަ މިނެޓުގައި ކޯލް ޕާމާ ޖަހައިދިން ލަނޑުންނެވެ. މިއީ މިފަހަރު ލީގުގައި ޕާމާ ކާމިޔާބުކޮށްދިން ހަތްވަނަ ލަނޑެވެ. މިމެޗުގައި ޗެލްސީއަށް ޕެނަލްޓީއެއް ލިބުނު ކަމަށް ބެލެވުނު ނަމަވެސް ރެފްރީ އެންމެ ފުރަތަމަ ދިން ޕެނަލްޓީ ވީއޭއާރުން ބެލުމަށްފަހު ނިންމުން ވަނީ ބަދަލުކޮށްފައެވެ. އަދި މެޗު ނިމެން ގާތްވެފައިވަނިކޮށް އިސާކްއަށް މެޗުގެ ނަތީޖާ ދެވަނަ ފަހަރަށް ހަމަހަމަ ކުރުމަށް ލިބުނު ފުރަސަތު ވަނީ ގެއްލިގެން ގޮސްފައެވެ.
މިކާމިޔާބީއާއެކު ޗެލްސީ މިހާރު ވަނީ ނުވަ މެޗުން 17 ޕޮއިންޓް ހޯދާ ތާވަލްގެ ހަތަރު ވަނައަށް ކުރިއަށް ޖެހިލާފައެވެ. އަދި ނިއުކާސްލް އުޅެނީ 12 ޕޮއިންޓާއެކު ތާވަލްގެ 12 ވަނައިގައެވެ.
މިމުބާރާތުގައި ކްރިސްޓަލް ޕެލަސް އާއި ޓޮޓްނަމް ހޮޓްސްޕާ ބައްދަލުކުރި މެޗު އަމިއްލަ ދަނޑުގައި ޕެލަސް ކާމިޔާބުކޮށް ވަނީ މިފަހަރު ލީގުގައި ފުރަތަމަ ފަހަރަށް މެޗަކުން މޮޅުވެފައެވެ. މިމެޗުގައި އެޓީމުން ކާމިޔާބުކުރި ހަމައެކަނި ލަނޑު ސްޕާސްގެ ޑިފެންސަށް ހެދުނު ގޯހެއްގެ ފައިދާ ނަގާ ޖަހާދިނީ ޖޮން ފިލީޕޭ މަޓޭޓާއެވެ.
މިކާމިޔާބީއާއެކު ޕެލަސް މިވަނީ ހަ ޕޮއިންޓާއެކު ތާވަލްގެ 17 ވަނައަށް ކުރިއަށް ޖެހިލާފައެވެ. އަދި ސްޕާސް އެޅެނީ 13 ޕޮއިންޓާއެކު ތާވަލްގެ އަށް ވަނައިގައެވެ.