27 Oct 2024, 22:43
އިންގްލިޝް ޕްރިމިއާ ލީގުގައި ވެސްޓް ހޭމް ޔުނައިޓެޑާއި މެންޗެސްޓާ ޔުނައިޓެޑް ބައްދަލުކުރި މެޗު ވެސްޓް ހޭމް އިން ކާމިޔާބުކޮށްފިއެވެ.
ވެސްޓް ހޭމްގެ ދަނޑުގައި ކުޅުނު މިމެޗު އެޓީމުން ކާމިޔާބު ކޮށްފައިވަނީ ދެ ލަނޑު އެއް ލަނޑުންނެވެ. ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ޔުނައިޓެޑުންނެވެ. މިމެޗުގެ ފެށުން ރަނގަޅުވީ ވެސް ޔުނައިޓެޑްގެއެވެ.
މިގޮތުން އެޓީމުންވަނީ މިމެޗުގެ ފުރަތަމަ ހާފުގައި މޮޅު ކުޅުމެއް ދައްކާ ލަނޑު ޖަހާނެ ރަނގަޅު ދެތިން ފުރުސަތު މިހާފުގައި ހޯދާފައެވެ. މީގެތެރެއިން ވެސް ގެނާޗޯއަށް ލިބިގެންދިޔަ ދެ ފުރުސަތު ފާހަގަ ވެގެންދިޔައެވެ. މީގެތެރެއިން އެއް ހަމަލާ އަމާޒުވީ ގޯލްގެ ހުރަސް ދަނޑިއަށެވެ.
މިމެޗުގެ ދެވަނަ ހާފުގައި ވެސްޓް ހޭމް ފެނިގެންދިޔައީ ފުރަތަމަ ހާފަށްވުރެ ކުޅުން ރަނގަޅު ކޮށެެވެ. އަދި ޔުނައިޓެޑްގެ ކުޅުންތެރިން މެޗު ކޮންޓްރޯލް ކުރަމުންދިޔަ ނަމަވެސް ގިނައިރު ވަމުން ދިޔަވަރަކަށް ވެސްޓް ހޭމްގެ ކުޅުންތެރިންނަށް ލިބެމުންދިޔަ ހިތްވަރު ދިޔައީ އިތުރު ވަމުންނެވެ.
ނަތީޖާއަކަށްވީ މެޗުގެ 74ވަނަ މިނެޓުގައި ކްރިސެންސިއޯ ސަމާވިލްގެ ލަނޑާއެކު ވެސްޓް ހޭމްއިން މެޗުގެ ލީޑު ނެގުމެވެ. ނަމަވެސް މިލަނޑު ޖެހިތާ ހަތް މިނެޓްފަހުން ޔުނައިޓެޑްގެ ކަސެމީރޯ ޖަހައިދިން ލަނޑުން މެޗުގެ ނަތީޖާ ހަމަހަމަވެ މެޗު އެއްވަރު ވެގެން ނިމިދާނެކަމަށް ބެލެވުނެވެ.
ނަމަވެސް ވެސްޓް ހޭމް އިން ހިތްވަރާއެކު މަސައްކަތް ކުރުމުގެ ނަތީޖާއަކަށްވީ ފުރިހަމަ ވަގުތު ހަމަވާން ގާތްވެފައިވަނިކޮށް ވެސްޓް ހޭމްއަށް ޕެނަލްޓީއެއް ލިބުމެވެ. ޔުނައިޓެޑްގެ މަތިއެސް ޑި ލިޓް ވެސްޓް ހޭމްގެ ޑެނީ އިންގްސްއަށް ކުރި ފައުލް ރެފްރީއަށް އަޅައިނުގަތް ނަމަވެސް ވީއޭއާރުން ވަނީ އެކަން ރެފްރީގެ ސަމާލުކަމަށް ގެނެސްފައެވެ.
އެހާދިސާ އަލުން ބެލުމަށްފަހު ރެފްރީވަނީ ޕެނަލްޓީ ދިނުމަށް ނިންމާފައެވެ. ޔުނައިޓެޑުން މިޕެނަލްޓީ އާ ދެކޮޅަށް ވަރަށް ބޮޑަށް އަޑު އުފުލި ނަމަވެސް އެކަމަށް ކާމިޔާބު ވާގޮތެއް ނުވިއެވެ. މިޕެނަލްޓީ ކާމިޔާބު ކޮށްދީ ވެސްޓް ހޭމްއަށް ދެވަނަ ފަހަރަށް ލީޑު ނަގައިދިން މިމެޗުން މޮޅުކޮށްދިން ލަނޑު ޖަހައިދިނީ ކެޕްޓަން ޖެރޮޑް ބޮވެންއެވެ.
މިކާމިޔާބީއާއެކު ވެސްޓް ހޭމް މިހާރުވަނީ ކުޅުނު ނުވަ މެޗުން ލިބިފައިވާ 11 ޕޮއިންޓާއެކު ތާވަލްގެ 13 ވަނައަށް ކުރިއަށް ޖެހިލާފައެވެ. އަދި ޔުނައިޓެޑް އުޅެނީ 11 ޕޮއިންޓާއެކު ތާވަލްގެ 14 ވަނައިގައެވެ.