27 Oct 2024, 19:41
ގޭގެ ދެ ފްލޯ ކުއްޔަށް ދޭން އެއްބަސްވެ، މަކަރާއި ހީލަތުން ހަތަރުލައްކަ ރުފިޔާ ނެގި މީހެއް، ބައިލައްކަ ރުފިޔާއިން ޖޫރިމަނާ ކުރުމަށް ކްރިމިނަލް ކޯޓުން މިއަދު ހުކުމްކޮށްފިއެވެ.
ކްރިމިނަލް ކޯޓުން މި ހުކުމްކޮށްފައި ވަނީ ކ. މާލެ، ހ. އަކާސިއާ، ހުސައިން ނަސީރުގެ މައްޗަށެވެ. އޭނާގެ މައްޗަށް އުފުލާފައި ވަނީ މަކަރާއި ހީލަތް ހެދުމުގެ ކުށުގެ ދައުވާއެވެ.
ނަސީރު ވަނީ 2016ވަނަ އަހަރުގެ ޑިސެމްބަރު ހަވަނަ ދުވަހު ހ. އަކާސިއާ ގޭގެ ހަތަރު ވަނަ ފްލޯ، ދަފުތަރު ނަންބަރު 1068، މުހައްމަދު އަބްދުއްރަހީމަށް ހަ އަހަރާއި ދެ މަސް ދުވަހުގެ މުއްދަތަށް ކުއްޔަށް ދީފައިވަނިކޮށް، ހަމަ އެ ފްލޯ، 2017ވަނަ އަހަރުގެ އޭޕްރީލް މަހުގެ 13ވަނަ ދުވަހު، ކ. މާލެ، ހ. ކުއްޅަވައްމާގެ، މުހައްމަދު އިބްރާހީމަށް ހަތަރު އަހަރާއި ދެ މަސް ދުވަހުގެ މުއްދަތަކަށް މަހު ކުލި ނުހިނގާ ގޮތަށް ދެލައްކަ ރުފިޔާއަށް ކުއްޔަށް ދޭނެކަމަށް ބުނެ އެއްބަސްވުން ހަދާފައެވެ. އަދި އެ އެއްބަސްވުމުގެ ދަށުން މަކަރާއި ހީލަތުން އޭނާގެ އަތުން ދެލައްކަ ރުފިޔާ ހޯދާފައިވާ ކަމަށް ކްރިމިނަލް ކޯޓުގެ ހުކުމުގައި ބުނެފައިވެއެވެ.
މީގެ އިތުރުން ހއ. ތުރާކުނު، ހިކިފިނިފެންމާގެ އިބްރާހީމް ރަޝީދަށް އެ ގޭގެ ތިންވަނަ ފްލޯ ހަތަރު އަހަރާއި ދެމަސް ދުވަހަށް ކުއްޔަށް ދިނުމަށްޓަކައި 2017ވަނަ އަހަރުގެ އޭޕްރިލް މަހުގެ 27ވަނަ ދުވަހު، ތަނުގެ ކުއްޔަށްވާ ދެލައްކަ ރުފިޔާ އިބްރާހީމް ރަޝީދުގެ އަތުން ނަސީރު ވަނީ ނަގާފައެވެ. އެއަށްފަހު ރަޝީދާ އެ ފްލޯ ހަވާލުކޮށްފައެއް ނުވެއެވެ.
އެ ދެ ދައުވާއަށް ވެސް ނަސީރު ވަނީ ޝަރީއަތުގައި އިންކާރުކޮށްފައެވެ. ނަމަވެސް، ދިފާއުގައި ހެކި ހުށަހެޅުމަށް ދިން ފުރުސަތުގައި އޭނާގެ ފަރާތުން އެއްވެސް ހެއްކެއް ހުށަހަޅާފައެއް ނުވެއެވެ.
އެ ދެ މައްސަލައިގެ ޝަރީއަތުގެ މަރުހަލާ ކުރިއަށް ދަނިކޮށް ޕްރޮސިކިއުޓާ ޖެނެރަލް (ޕީޖީ) އާއި ނަސީރާ ދެމެދު ވެފައިވާ އިއުތިރާފުގެ އެއްބަސްވުމެއް ޕީޖީގެ ފަރާތުން ކޯޓަށް ވަނީ ހުށަހަޅާފައެވެ. އެހެންކަމުން، ޝަރީއަތުން ވަނީ އެ އެއްބަސްވުން ބަލައިގަނެ، ނަސީރުގެ މައްޗަށް ކުށް ސާބިތުވާ ކަމަށް ކަނޑައަޅާފައެވެ.
މި މައްސަލާގައި ކްރިމިނަލް ކޯޓުން ވަނީ، 28،000 ރުފިޔާއިން ނަސީރު ޖޫރިމަނާކޮށް އެ ފައިސާ މިއަދުން ފެށިގެން ތިން މަސްދުވަސް ތެރޭ މީރާއަށް ދެއްކުމަށް ހުކުމްކޮށްފައެވެ.
އަދި ހ. އަކާސިއާ ގޭގެ ތިން ވަނަ ފްލޯ ކުއްޔަށް ދޭނެ ކަމަށް ބުނެ މަކަރާއި ހީލަތުން ރުފިޔާ ނެގި މައްސަލާގައި، އޭނާގެ މައްޗަށް ކުށް ސާބިތުވާކަމަށް ކަނޑައަޅައި، ހަތަރު މަހާއި 24 ދުވަހުގެ މުއްދަތަކަށް ޖަލަށްލުމަށް ވެސް ހުކުމް ކުރިއެވެ. ނަމަވެސް، ޕީޖީއާއެކު އޭނާ ހަދާފައިވާ އެއްބަސްވުމުގެ ސަބަބުން ޖަލު އަދަބު ވަނީ ޖޫރިމަނާގެ އަދަބަކަށް ބަދަލުކޮށް 23،800 ރުފިޔާ އިން ޖޫރިމަނާ ކޮށްފައެވެ.
މި ޖޫރިމަނާ ފަސް ދުވަހުގެ ތެރޭގައި ދެއްކުމަށް ހުކުމުގައި ވެއެވެ.
ދެ ހުކުމުން ކުރި ޖޫރިމަނާގެ ގޮތުގައި އޭނާ 51،8000 ރުފިޔާ މީރާއަށް ދައްކަން ޖެހޭނެއެވެ.