27 Oct 2024, 17:39
ސަރުކާރުގެ މުއައްސަސާތަކުގައި ރައްކާކޮށްފައި ހުރި އާންމު ރައްޔިތުންގެ ޒާތީ މައުލޫމާތު ބޭނުންކޮށްގެން ވެރިކަން ކުރާ ޕާޓީއަށް ފޯމު ފުރަމުންދާ ކަމަށް ތުހުމަތުކޮށް، އެކަން ސީރިއަސް މައްސަލައެއްގެ ގޮތުގައި ބަލައި، ގާނޫނީ ފިޔަވަޅު އެޅުމަށް އިލެކްޝަންސް ކޮމިޝަން (އީސީ)އަށް އިދިކޮޅު އެމްޑީޕީން ގޮވާލައިފިއެވެ.
ޕީއެންސީން ގެންދަނީ މި އަހަރުގެ ނޮވެމްބަރު ނިމުމުގެ ކުރިން 75،000 މެންބަރުން އެ ޕާޓީއަށް ހަމަކުރުމުގެ މަސައްކަތް ކުރަމުންނެވެ.
ޕީއެންސީއަށް މެމްބަރުން އިތުރުކުރުމަށް ދައުލަތުގެ މުދަލާއި ވަސީލަތްތައް ބޭނުންކުރާ ކަމަށް ބުނެ، އެކަން ކުށްވެރިކޮށް އެމްޑީޕީން މިއަދު ވަނީ ބަޔާނެއް ނެރެފައެވެ.
އެ ބަޔާނުގައި އެމްޑީޕީން ވަނީ ސަރުކާރުގެ މުއައްސަސާތަކުގައި ރައްކާކޮށްފައި ހުރި އާންމު ރައްޔިތުންގެ ޒާތީ މައުލޫމާތު ބޭނުންކޮށްގެން ވެރިކަން ކުރާ ޕާޓީއަށް ފޯމު ފުރައި، މެމްބަޝިޕް އިތުރުކުރަމުންދާ ކަމަށް ތުހުމަތުކޮށްފައެވެ. އޭގެ އިތުރުން ސޮއި ފޯޖުކޮށްގެން ޕީއެންސީގެ ދަފުތަރުގައި މީހުން ރަޖިސްޓްރީ ކުރަމުންދާ ކަމަށް ވެސް އެ ޕާޓީން ތުހުމަތުކުރިއެވެ.
އެ ބަޔާނުގައި ބުނީ ޕީއެންސީއަށް މެންބަރުން އިތުރުކުރުމަށްޓަކައި ދައުލަތުގެ މުއައްސަސާތަކަށް ނުފޫޒު ފޯރުވަމުންދާ ކަމަށާއި އެ ޕާޓީން އެކަން ކުށްވެރިކުރާ ކަމަށެވެ.
ހަމައެއާއެކު މީގެކުރިން އުފެދުނު ޕީޕީއެމްގެ ސަރުކާރެކޭ އެއްގޮތަށް މިވަގުތު އޮތް ޕީއެންސީގެ ސަރުކާރުން ވެސް ޕާޓީއަށް މެންބަރުން އިތުރުކުރުމަށް ވަޒީފާއަށް ނުފޫޒު ފޯރުވަމުންދާ ކަމަށް ބުނާ ޝަކުވާތައް އެމްޑީޕީއަށް ލިބެމުންދާކަމަށާއި އެއްވެސް މީހަކަށް ވަޒީފާގެ ބިރު ދައްކައި ޕީއެންސީއަށް ސޮއިކުރަން މަޖުބޫރުކުރުވުމަކީ ބަލައިގަނެވޭނެ ކަމެއް ނޫން ކަމަށް އެ ޕާޓީން ބުންޏެވެ.
ޕާޓީއަށް މީހުން ވެއްދުމަށްޓަކައި ފޯމު ފުރުމުގެ މަސައްކަތް ސަރުކާރުގެ އިމާރާތްތަކުގައި އަދި މަސައްކަތުގެ ރަސްމީ ގަޑިތަކުގައި ކުރަމުންގެންދާތީއާއި، މުވައްޒަފުން ލައްވާ އެކަން ކުރުވަމުން ގެންދާތީ ބައެއް ތަންތަނުގެ މަސައްކަތަށް ދަތިވަމުންދާ ކަމަށް އެ ތަންތަނުގެ މުވައްޒަފުންގެ ފަރާތުން މައުލޫމާތު ލިބެމުންދޭ،އެމްޑީޕީގެ ބަޔާން
ޕީއެންސީގެ މެމްބަޝިޕް އިތުރުކުރުމުގެ މަސައްކަތް މާލެއާއި އަތޮޅު ތެރޭގައި ކުރިއަށް ދާއިރު، މިހާތަނަށް 65،000އަށްވުރެ ގިނަ މެންބަރުން ހަމަކުރެވިއްޖެ ކަމަށް އެ ޕާޓީގެ ޕާލިމެންޓްރީ ގްރޫޕްގެ ލީޑަރު އަދި ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު އިބްރާހީމް އަދި އަންނަ ނޮވެމްބަރު މަހުގެ މެދަކާ ހަމައަށް 75،000 މެންބަރުން އެ ޕާޓީއަށް ހަމަވާނެ ކަމަށް ބެލެވޭ ކަމަށް ވެސް ފަލާހު ވިދާޅުވިއެވެ.
އިލެކްޝަންސް ކޮމިޝަނުން އާންމުކޮށްފައިވާ މައުލޫމާތުގައިވާ ގޮތުން، މި ހިނގާ ސެޕްޓެންބަރުގެ 18 ވަނަ ދުވަހުގެ ނިޔަލަށް 28،983 މެންބަރުން ޕީއެންސީގައި އެބަ ތިއްބެވެ. އެއާއެކު އެ ޕާޓީއަކީ މިހާރު ރާއްޖޭގެ ތިންވަނައަށް އެންމެ ބޮޑު ޕާޓީއެވެ.
މިހާރު އެންމެ ބޮޑު ޕާޓީއަކީ އެމްޑީޕީ ކަމަށްވާއިރު އެ ޕާޓީގެ މެންބަރުންގެ އަދަދަކީ 50،851 އެވެ.