27 Oct 2024, 13:48
އަންނަ ބުރާސްފަތި ދުވަހު ރައްޔިތުންގެ މަޖިލީހުގެ ޖަލްސާއެއް ބާއްވައި، އަންނަ އަހަރަށް ލަފާ ކުރާ ބަޖެޓު އެ ދުވަހު ހުށަހަޅާނެ ކަމަށް މަޖިލީހުގެ ނައިބު ރައީސް އަހުމަދު ނާޒިމް މިއަދު ވިދާޅުވެއްޖެއެވެ.
ޓެކްސް ބިލްތައް ދިރާސާ ކުރުމަށް އެކުލަވާލައިފައިވާ، މާލިއްޔަތު އަދި އިގުތިސާދީ ކޮމިޓީގެ ޖޮއިންޓް ކޮމިޓީގައި ނާޒިމް ވިދާޅުވީ، ބަޖެޓު ހުށަހެޅުމުގެ ޖަލްސާ އަންނަ ބުރާސްފަތި ދުވަހު ބާއްވަން މަޖިލީހުގެ ރައީސް އަބްދުއްރަހީމް އަބްދުﷲ ނިންމަވައިފައިވާ ކަމަށެވެ.
އޭނާ އެހެން ވިދާޅުވީ، ކޮމިޓީއަށް ފޮނުވައިފައިވާ ހަތަރު ޓެކްސް ބިލުގެ މަސައްކަތްތައް މާދަމާގެ ނިޔަލަށް ނިންމަން ފެނިވަޑައިގަންނަވާ ކަމަށް ކޮމިޓީގައި ވިދާޅުވަމުންނެވެ. އެ ކޮމިޓީން ވަނީ ނާޒިމް ވިދާޅުވި ގޮތަށް، ޓެކްސް ބިލްގެ މަސައްކަތްތައް ނިންމަން ފާސްކޮށްފައެވެ. އެގޮތުން އެއް ދުވަސް ތެރޭގައި ބިލްތައް ދިރާސާކޮށް ނިންމަން ފެންނަ ކަމަށް 16 މެންބަރުން ވޯޓު ދެއްވިއިރު ނުފެންނަ ކަމަށް ވޯޓުދެއްވީ ތިން މެންބަރުންނެވެ.
ސަރުކާރުން އަންނަ އަހަރުގެ ބަޖެޓު ހުށަހަޅަން ތައްޔާރުވަމުން އަންނައިރު މިހާރު މަޖިލީހަށް ވަނީ 5.1 ބިލިއަން ރުފިޔާގެ ސަޕްލިމެންޓަރީ ބަޖެޓެއް ހުށަހަޅައިފައެވެ.
މި އަހަރަށް ފާސްކުރީ 49.8 ބިލިއަން ރުފިޔާގެ ބަޖެޓެއް ކަމަށްވާއިރު ފިނޭންސް މިނިސްޓްރީން މިހާތަނަށް ޚަރަދުކޮށްފައިވަނީ އޭގެ ތެރެއިން 37.4 ބިލިއަން ރުފިޔާ ކަމަށް ބުނެފައެވެ.
މިދިޔަ ސަރުކާރުގައި، އޭރުގެ ވެރިކަން ކުރާ ޕާޓީގެ އަޣުލަބިއްޔަތު އޮތް މަޖިލީހުން ފާސްކުރި ބަޖެޓާ ގުޅޭ ގޮތުން މި ސަރުކާރުން ގިނަ ޝަކުވާތަކެއް ކޮށްފައިވެއެވެ. އެގޮތުން ބަޖެޓު ފާސްކޮށްފައިވަނީ މި ސަރުކާރުގެ މުހިންމު މަޝްރޫއުތަކަށް ފައިސާ ކަނޑަނާޅައި ކަމުގެ ޝަކުވާތައް ކޮށްފައިވެއެވެ.