27 Oct 2024, 13:08
ސަޕްލިމެންޓަރީ ބަޖެޓު ފާސްކުރުމަށް ފިނޭންސް މިނިސްޓަރު މޫސާ ޒަމީރާއި، އޮޑިޓާ ޖެނެރަލް ޙުސައިން ނިޔާޒީ އަދި މަރުކަޒީ ބޭންކް (އެމްއެމްއޭ)ގެ ގަވަރުނަރު އަހުމަދު މުނައްވަރުގެ ލަފާ ހޯދުމަށް ބަޖެޓު ދިރާސާކުރާ ކޮމިޓީއަށް ހާޒިރު ކުރުމަށް ފާސްކޮށްފިއެވެ.
ރައްޔިތުންގެ މަޖިލީހުގެ ގަވާއިދުގައިވާ ގޮތުން ބަޖެޓު ދިރާސާ ކުރުމުގައި ފިނޭންސް މިނިސްޓަރާއި އޮޑިޓާ ޖެނެރަލާއި އެމްއެމްއޭގެ ގަވަރުނަރުގެ އިތުރުން އެ ނޫން ވެސް މުހިންމު ކަމަށް ފެންނަ އެހެން ފަރާތްތައް ހާޒިރުކޮށް، ނުވަތަ ލިޔުމުން އެ ފަރާތްތަކުން ބަޖެޓާ ދޭތެރޭ ދެކޭ ގޮތް ސާފުކުރަންޖެހެއެވެ.
މިއަދު އޮތް މަޖިލީހުގެ ބަޖެޓު ދިރާސާކުރާ ކޮމިޓީގެ ބައްދަލުވުމުގައި މި ތިން ބޭފުޅުން އެކުއެކީގައި ކޮމިޓީއަށް ހާޒިރުކޮށް، އެ ބޭފުޅުންގެ ލަފާ ހޯއްދެވުމަށް ހުށަހެޅުއްވީ ބާރަށު ދާއިރާގެ މެންބަރު އިބްރާހީމް ޝުޖާއުއެވެ. އޭނާ ހުށަހެޅުއްވީ މާދަމާ 14:00ގައި އެ ތިން ބޭފުޅުންނާ އެކު ކޮމިޓީ ބައްދަލުވުން ކުރިޔަށް ގެންދިއުމަށެވެ. އަދި އެ ބައްދަލުވުމަށް ފަހު، މި އަހަރުގެ ބާކީ އޮތް ބައިގައި ޚަރަދު ކުރަން ކަނޑައެޅުނު ސަޕްލިމެންޓަރީ ބަޖެޓު ފާސްކުރުމަށެވެ.
މި ހުށަހެޅުމަށް މާމިގިލީ ދާއިރާގެ މެންބަރު ގާސިމް އިބްރާހީމް ވަނީ ތާއީދު ކުރައްވާފައެވެ. މި ކަމާ މެދު ނެގުނު ވޯޓުގައި 15 މެންބަރުންގެ ވޯޓާއެކު ވަނީ އެ ގޮތަށް ފާސްކޮށްފައެވެ.
އެހެން ނަމަވެސް ބަޖެޓު ދިރާސާކުރާ ކޮމިޓީގައި ހިމެނިވަޑައިގަންނަވާ އިދިކޮޅު އެމްޑީޕީއަށް ނިސްބަވްތާ މެންބަރުންވަނީ، ބަޖެޓުގައި ހިމަނާފައިވާ ފައިސާ ޚަރަދުކުރާ ގޮތުގެ ތަފްސީލު ހިމަނާފައިނުވާ ކަމަށް ވިދާޅުވެ، ކަންބޮޑުވުން ފާޅު ކުރައްވައިފައެވެ. އަދި މި އަހަރުގެ ޖޫންމަހުން ފެށިގެން ދައުލަތުގެ ފައިސާ ޚަރަދު ކޮށްފައިވާ ގޮތުގެ އެއްވެސް ތަފްސީލެއް މި ސަރުކާރުން ހާމަކޮށްފައިނުވާތީ، އެ ކަމުގެ ކަންބޮޑުވުން ވެސް އެ ބޭފުޅުން ފާޅު ކުރެއްވިއެވެ.
އެ ގޮތުން ހަނިމާދޫ ދާއިރާގެ މެންބަރު އަބްދުލްޣަފޫރު މޫސާވަނީ، ކޮމިޓީއަށް ފިނޭންސް މިނިސްޓަރު ހާޒިރުކުރާއިރު، މި ސަރުކާރުން ކޮށްފައިވާ ޚަރަދުތަކުގެ ތަފުސީލު ވެސް ހިއްސާ ކުރުމަށް ހުށަހަޅުއްވާފައެވެ. މި ހުށަހެޅުމަށް ހުޅުމާލެ ދެކުނު ދާއިރާގެ މެންބަރު ޑރ. އަޙުމަދު ޝަމްހީދު ތާއީދު ކުރެއްވިއިރު، ސަރުކާރަށް ނިސްބަތްވާ ބައެއް މެންބަރުން ވަނީ އެ ހުށަހެޅުމާ ގުޅިގެން ނުރުހުން ފާޅުކޮށްފައެވެ.
އެ ކަމާމެދު ނެގުނު ވޯޓުން ނިންމީ ޣަފޫރުގެ ހުށަހެޅުން ބަލައިނުގަތުމަށެވެ.