27 Oct 2024, 13:16
ޖަރުމަނު ބުންޑެސްލީގާގައި އާރްބީ ލެއިޕްޒިގް އާއި އެސްސީ ފްރެއިބާގް ބައްދަލުކުރި މެޗު ލެއިޕްޒިގްއިން ކާމިޔާބުކޮށް ތާވަލުގެ އެއްވަނައަށް އަރައިފިއެވެ.
ލެއިޕްޒިގްގެ ދަނޑުގައި ކުޅުނު މިމެޗު އެޓީމުން ކާމިޔާބު ކޮށްފައިވަނީ ފަހަތުން އަރައި ތިން ލަނޑު އެއް ލަނޑުންނެވެ. ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ފްރެއިބާގްއިންނެވެ. އަދި މިމެޗުގެ ފެށުން ވެސް ރަނގަޅުކަމަށް ފާހަގަވީ ފްރެއިބާގްގެއެވެ. މިގޮތުން މެޗުގެ 15 ވަނަ މިނެޓުގައި އުފެއްދި ހަމަލާއެއްގައި ފްރެއިބާގްއިން ވަނީ މިމެޗުގެ ލީޑު ނަގައިފައެވެ. މިލަނޑު އެޓީމަށް ކާމިޔާބު ކޮށްދިނީ ރިޓްސޫ ޑޮއާންއެވެ. މިމެޗުގެ ފުރަތަމަ ހާފުގައި އިތުރު ލަނޑެއް ނުފެނުނު ނަމަވެސް ލަނޑު ޖަހާނެ ފުރުސަތު ދެޓީމަށްވެސް ލިބުނުކަން ފާހަގަވިއެވެ.
މިމެޗުގައި ލެއިޕްޒިގްއިން ކާމިޔާބުކުރި ފުރަތަމަ ލަނޑު ޖަހައި މެޗުގެ ނަތީޖާ ހަމަހަމަ ކޮށްފައިވަނީ ދެވަނަ ހާފުގެ ކުޅުން ފެށިތާ ދެވަނަ މިނެޓުގައި ވިލީ އޯބާޏް ޖަހައިދިން ލަނޑުންނެވެ. އަދި މިމެޗުގެ ލީޑު ލެއިޕްޒިގުން ނަގާފައިވަނީ މެޗުގެ 58 ވަނަ މިނެޓުގައި ލުޓްޝަރެލް ގިއާ ޓުރުއިޑާ ޖަހައިދިން ލަނޑުންނެވެ. މިމެޗުގައި ލެއިޕްޒިގްގެ ފަހު ލަނޑު މެޗުގެ 78 ވަނަ މިނެޓުގައި ކާމިޔާބު ކޮށްދިނީ ލޮއިސް އޮޕެންޑާއެވެ.
މިކާމިޔާބީއާއެކު ލެއިޕްޒިގް މިހާރު އުޅެނީ ކުޅުނު އަށް މެޗުން ލިބިފައިވާ 20 ޕޮއިންޓާއެކު ތާވަލްގެ އެއްވަނައިގައެވެ. ނަމަވެސް މިރޭ ބަޔޭން މިޔުނިކާއި ވީއެފްއެލް ބޯކަމް ބައްދަލުކުރާ މެޗު ބަޔޭން ކާމިޔާބު ކޮށްފި ނަމަ ފައިދާ ގޯލަށް ބަލާ ތާވަލްގެ އެއްވަނައަށް އެރުމުގެ ފުރުސަތު ބަޔޭންއަށް ލިބިގެންދާނެއެވެ. އަދި މިމެޗުން ބަލިވުމުން ފްރެއިބާގް އުޅެނީ 15 ޕޮއިންޓާއެކު ތާވަލްގެ ހަތަރު ވަނައިގައެވެ.
މިމުބާރާތުގައި އެންމެ ފަހުގެ ޗެމްޕިއަން ބަޔާ ލެވަކޫސެން އާއި ވާޑާ ބްރޭމަން ބައްދަލުކުރި މެޗު ދެ ލަނޑު ދެ ލަނޑުންވީ އެއްވަރެވެ. މިމެޗުގެ ލީޑު ވިކްޓާ ބޮނިފޭސްގެ ލަނޑާއެކު ލެވަކޫސެންއިން ނެގި އިރު ވާޑާއިން އެއްވަރު ކުރި ލަނޑު ޖަހައިދިނީ މާވިން ޑަކްޝްއެވެ. މިމެޗުގައި ލެވަކޫސެންގެ ދެވަނަ ލަނޑަކީ ވާޑާގެ ފީލިކްސް އަގޫ އަތުން ބައިކޮޅަށް ވަން ލަނޑެކެވެ. މިމެޗުގެ ނަތީޖާ ދެވަނަ ފަހަރަށް ވާޑާއިން އެއްވަރު ކޮށްފައިވަނީ މެޗުގެ ފަހު މިނެޓުގައި ރޮމާނޯ ޝުމިޑް ޖަހައިދިން ލަނޑުންނެވެ.
މިނަތީޖާއާއެކު ލެވަކޫސެން އުޅެނީ 15 ޕޮއިންޓާއެކު ތާވަލްގެ ތިން ވަނައިގައެވެ. އަދި ވާޑާ އުޅެނީ 12 ޕޮއިންޓާއެކު ތާވަލްގެ ނުވަ ވަނައިގައެވެ.