27 Oct 2024, 09:02
އިންޑިއާގެ ސައުތު ސިނަމާގެ ބައެއް ފިލްމުތައް ވެސް ކުޅެފައިވާ ބޮލީވުޑްގެ ބަތަލާ އަމީރާ ދާސްތޫރު ދާދި ފަހުން ރާއްޖެއަށް ކުރި ދަތުރަކީ ދުވަހަކު ވެސް ހިތުން ފޮހެނުލެވޭނެ ދަތުރެއް ކަމަށް އޭނާ ބުނެފިއެވެ.
ބ. އަތޮޅުގައި އޮންނަ ރިސޯޓު ދަ ވެސްޓިން މޯލްޑިވްސް މިރިއަންދޫ ރިސޯޓުގައި ޗުއްޓީ ހޭދަކުރުމަށް ފަހު މިހާރު އެނބުރި އިންޑިއާއަށް ގޮސްފައިވާ ބަތަލާ ބުނެފައިވަނީ މި ސަރަހައްދަށް ސްކޫބާ ޑައިވިންއަށް ދިއުމަކީ ކޮންމެ މީހަކު ވެސް އެއް ފަހަރު ތަޖުރިބާކޮށްލަން ރަނގަޅު ދަތުރެއް ކަމަށެވެ.
ޔުނެސްކޯގެ ބަޔޮސްފިއާ ރިޒާވްގެ ދަރަޖަ 2011 ވަނަ އަހަރު ލިބިފައިވާ ސަރަހައްދުގެ މޫދު އަޑީގައި ހޭދަކުރެވުނު ވަގުތުކޮޅު ދުވަހަކު ވެސް ހަނދާނުން ނުފިލާނެ ކަމަށާއި އެއީ، ތާއަބަދަށް ހިތުގައި ޚާއްސަކަމެއްދީ ފޮރުވިފައިވާ ހިތްގައިމު ވަގުތުތަކެއްގެ ގޮތުގައި ބަތަލާ ވަނީ ސިފަކޮށްފައެވެ.
މިއީ މަސައްކަތުން ދުރަށް ޖެހިލުމަށް ފަހު އަމިއްލަ ނަފުސަށް ވަގުތު ހޯދާލުމަށާއި ސިކުނޑިއަށް ހަމަޖެހުމެއް ހޯދާ އަރާމުކޮށްލަން އެންމެ ރަނގަޅު މާހައުލެއް ކަމަށާއި އެ ސަރަހައްދުގެ މެރިން ލައިފްގެ މުއްސަނދިކަމަށް ބަތަލާ ވަނީ ވަރަށް ބޮޑަށް ތައުރީފުކޮށްފައެވެ.
ރާއްޖެއިން ދިޔައީ ވަރަށް ހިތްހަމަޖެހިގެން ކަމަށާއި ވަރަށް އަވަހަށް އެނބުރި އަންނާނެ ކަމަށް އިންޑިއާގެ ގުޖްރާތަށް ނިސްބަތްވާ ބަތަލާ ވަނީ ބުނެފައެވެ.
އަމީރާ ފުރަތަމަ އިންޓަނޭޝަނަލް ފިލްމު ރިލީޒްކޮށްފައިވަނީ 2017 ވަނަ އަހަރެވެ. އެއީ، މަޝްހޫރު ހޮލީވުޑް އެކްޓަރު ޖެކީ ޗޭންއާ އެކު ކުޅުނު ފިލްމު "ކަންގް ފޫ ޔޯގާ"އެވެ. އަމީރާގެ އެންމެ ފަހުން ރިލީޒްކޮށްފައިވާ ފިލްމަކީ "އިންފުލުއެންސާ"ގެ ނަމުގައި ރިލީޒްކުރި ކުރު ފިލްމެކެވެ. ތަމަޅަ ފިލްމެއް ކަމަށްވާ "ބަގީރާ"އިން ވެސް ބަތަލާ ވަނީ މިދިޔަ އަހަރު ބެލުންތެރިންނަށް ފެނިފައެވެ.