27 Oct 2024, 08:52
އިންޑިއާގެ ސައުތު ސިނަމާގެ އެންމެ އަގު ބޮޑު އެކްޓަރުންގެ ތެރޭ ހިމެނޭ ޕްރަބާސް ވަރަށް ޝާހީ ގޮތަކަށް ފެންނަ ފިލްމު "ދަ ރާޖާ ސާބް"ގެ ޕޯސްޓަރު ދައްކާލައިފިއެވެ.
މީގެ ކުރިން ޕްރަބާސް ފެނިފައިވަނީ ވަރަށް ވަރުގަދަ އެކްޝަން ރޯލްތަކުން ނަމަވެސް "ދަ ރާޖާ ސާބް"ގައި ޕްރަބާސް ކުޅެނީ ހެއްވާ މަޖާ ރޯލެކެވެ.
މި ފިލްމުގައި ޕްރަބާސް ޑަބަލް ރޯލުން ފެންނާނެއިރު ތެލުގޫ ބަހުން ގެނެސްދޭ މި ފިލްމަކީ ރޮމޭންޓިކް ކޮމެޑީ ހޮރޯ ފިލްމެކެވެ. ޕްރަބާސްގެ އުފަންދުވަހާ ދިމާކޮށް ފިލްމުގެ ފުރަތަމަ ޕޯސްޓަރު ދައްކައިލިއިރު ފިލްމު ރިލީޒްކުރާ ތާރީޚަކީ އަންނަ އަހަރުގެ އޭޕްރިލް މަހުގެ 10 ވަނަ ދުވަސްކަމަށް ވަނީ އިއުލާނުކޮށްފައެވެ.
ފިލްމު "ކަލްކީ"ގެ މަންޒަރެއްގައި ޕްރަބާސް--ފޮޓޯ/ފިލްމުފެއަ
ޕްރަބާސްއާ އެކު މި ފިލްމުގައި ބަތަލާއިންގެ ރޯލުން ފެންނާނީ ސައުތު ސިނަމާގެ ފިލްމީ ތަރިން ކަމަށްވާ ނިދީ އަގަރުވާލް އަދި މަލާވިކާ މޯހަނާންއެވެ. ބޮލީވުޑްގެ އެކްޓަރުން ކަމަށްވާ ސަންޖޭ ދަތު އަދި އަނޫޕަމް ހޭރު މި ފިލްމުގެ ވަރަށް ޚާއްސަ ރޯލްތަކުން ފެންނާނެއެވެ.
ފިލްމު "ބާހޫބަލީ"އިން ބޮޑު މަގުބޫލުކަމެއް ލިބުނު ނަމަވެސް ޕްރަބާސް އޭގެ ފަހުން ކުޅުނު ބައެއް ފިލްމުތަކަށް ބެލުންތެރިންގެ ފަރާތުން ލިބިފައިވަނީ ވަރަށް ފިނި ތަރުހީބެކެވެ.
މިދިޔަ އަހަރު ޕްރަބާސް ލީޑް ރޯލް ކުޅުނު ފިލްމު "ސަލާރު: ޕާޓް1-ސީޒްފަޔަ" އަދި "ކަލްކީ"އަކީ ޕްރަބާސްގެ އެނބުރިއައުން ކަމަށް ގިނަ ބަޔަކު ސިފަކޮށްފައިވާއިރު މި ދެ ފިލްމުގެ ވެސް ދެވަނަ ބައި ރިލީޒްކުރާނެ އިރަކަށް ގިނަ ބަޔަކު އަންނަނީ އިންތިޒާރު ކުރަމުންނެވެ.