26 Oct 2024, 22:54
ރައީސް ޑރ. މުހައްމަދު މުއިއްޒުގެ ބައްޕާފުޅު، އަލްމަރުހޫމް ޝެއިޚް ހުސެން އަބްދުއްރަހްމާން ޝަރުއީ ދާއިރާއަށް ކޮށްދެވި ޚިދުމަތުގެ އަގުވަޒަންކޮށް، ޚާއްސަ އެވޯޑެއް ދިނުމާއެކު، ބައްޕާފުޅުގެ ފަނޑިޔާރު ހެދުންކޮޅު ރައީސަށް ހައިކޯޓުން މިރޭ ހަދިޔާކޮށްފިއެވެ.
ރައީސްގެ ބައްޕާފުޅަކީ ރާއްޖޭގައި ހައިކޯޓުގެ ފުރަތަމަ ފަނޑިޔާރުކަން ކުރެއްވި ބޭފުޅުންގެ ތެރެއިން އެއް ބޭފުޅާއެވެ.
ރައީސްގެ ބައްޕާފުޅުގެ އަގުވަޒަންކުރުން އޮތީ ހައިކޯޓުގެ 44ވަނަ އަހަރީ ދުވަސް ފާހަގަކުރުމަށް މިރޭ ސީއެޗްއެސްއީގައި އޮތް ހަފްލާގެ ތެރެއިންނެވެ.
މި ހަފްލާގެ ތެރެއިން ހުސައިން އަބްދުއްރަހްމާނުގެ ފަނޑިޔާރުކަމުގެ ހެދުންކޮޅު ރައީސަށް އެރުވީ ހައިކޯޓުގެ އިސް ފަނޑިޔާރު ހުސައިން ޝަހީދެވެ. ހަމައެއާއެކު ރަމްޒީ ފިލައެއް ވެސް ވަނީ ރައީސަށް އަރުވައިފައެވެ.
ޝެއިޚް ހުސައިން އަބްދުއްރަހްމާނަކީ ވަރަށް ގިނަ ދުވަސްތަކެއްވަންދެން ދައުލަތަށް ހިދުމަތް ކުރެއްވި ބޭފުޅެކެވެ. އެ މަނިކުފާނު އަދާކުރެއްވި މަގާމުތަކުގެ ތެރޭގައި އެޓާނީ ޖެނެރަލްގެ ނާއިބުކަން ހިމެނެއެވެ. އަދި އެކްޓިން އެޓާނީ ޖެނެރަލްއެއްގެ ގޮތުގައި އެ އޮފީސް ހިންގަވާފައި ވެސްވެއެވެ.
އެ މަނިކުފާނަށް 2013ވަނަ އަހަރު ވަނީ، ދީނީ ރޮނގުން ގައުމީ ޝަރަފުވެރިކަމުގެ އިނާމް ވެސް ދައުލަތުން އަރުވައިފައެވެ.
އެ މަނިކުފާނަކީ މިސުރުގެ އަލްއަޒުހަރު ޔުނިވަސިޓީއިން، ޝަރުއީ ދާއިރާ އިން ޑިގްރީ ހާސިލު ކުރައްވާފައިވާ ބޭފުޅެކެވެ.
ރައީސްގެ ބައްޕާފުޅު އަވަހާރަވީ ހައްޖުގެ އަޅުކަމަށް މައްކާއަށް ވަޑައިގެން އުޅުއްވަނިކޮށް، 29 ސެޕްޓެމްބަރު 2015ގައެވެ. އެއިރު ބައްޕާފުޅާއެކު ރައީސް މުއިއްޒު ވެސް ހުންނެވީ ހައްޖުގެ އަޅުކަމުގައެވެ. އެއިރު ރައީސް މުއިއްޒު ހުންނެވީ ކުރީގެ ރައީސް އަބްދުﷲ ޔާމީންގެ ވެރިކަމުގައި ހައުސިން މިނިސްޓަރުކަމުގައެވެ.