27 Oct 2024, 08:48
އިންޑިއާގެ ސޮނީ ޓެލެވިޒަންއިން ގެނެސްދެމުން އައި ސިލްސިލާ ޝޯ "ސީއައިޑީ"ގެ ދެވަނަ ސީޒަން ހަ އަހަރު ފަހުން ގެނެސްދޭން ނިންމައި، އޭގެ ފުރަތަމަ ޓީޒާ ވެސް ދައްކާލައިފިއެވެ.
މި އިންވެސްޓިގޭޓިވް ޑްރާމާ ސިލްސިލާ ޕްރީމިއާކުރާނެ ވަކި ތާރީޚެއް އިއުލާންނުކުރި ނަމަވެސް "ސީއައިޑީ"ގެ ދެވަނަ ސީޒަންގެ ޕްރޮމޯ ވަރަށް އަވަހަށް އާއްމުކުރާނެ ކަމަށް ރިޕޯޓުތައް ބުނެއެވެ. ދެވަނަ ސީޒަނުން ވެސް ފެންނާނީ ކުރީގެ ކާސްޓުން ކަމަށާއި މި ސީޒަންގައި ގެނެސްދޭ ހާދިސާތައް ވެސް ތަފާތު ވާނެ ކަމަށް ސޮނީން ވަނީ ބުނެފައެވެ.
ޓެލެވިޒަން ތަރިން ކަމަށްވާ ޝިވާޖީ ސަތަމާއި ދަޔަނަންދު ޝެޓީގެ އިތުރުން އަދިތިޔާ ސްރިވަސްތާވް ހިމެނޭ ކާސްޓުގެ މި ސިލްސިލާއަކީ ޖެނުއަރީ 21، 1998 ވަނަ އަހަރުން ފެށިގެން ސޮނީން ގެނެސްދެމުން ދިޔަ ސިލްސިލާއެކެވެ. މި ސިލްސިލާ އޮކްޓޯބަރު 27، 2018 ގައި ނިންމައިލުމާ ގުޅިގެން ވަރަށް ގިނަ ބަޔަކަށް މާޔޫސްކަން ގެނުވިއެވެ.
ސޮނީގެ މަޝްހޫރު ސިލްސިލާ "ސީއައިޑީ"ގެ އެންމެ މުހިއްމު ތިން އެކްޓަރުން--ފޮޓޯ/އިންޑިއަންއެކްސްޕްރެސް
މި ސިލްސިލާގެ ދެވަނަ ސީޒަން ފަށާނެކަން އިއުލާނުކުރުމާ އެކު ވަރަށް ގިނަ ބަޔަކު ވަނީ ދެވަނަ ސީޒަންއަށް އިންތިޒާރު ކުރާ ކަމަށް ބުނެފައެވެ. ބައެއް މީހުން މިހާރު ވެސް މި ސިލްސިލާގެ ރިޕީޓް އެޕިސޯޑުތައް ބަލަމުން އަންނަ ކަމަށާއި މި ޒަމާނާ ގުޅޭގޮތަށް ދެވަނަ ސީޒަން ގެނެސްދޭނެ ކަމަށް އުއްމީދުކުރެވޭ ކަމަށް ބުނެފައިވެއެވެ.
މި ސިލްސިލާގެ ކާސްޓުންގެ އިތުރުން އެޕިސޯޑުތަކުގެ ޑައިލޮގްތަކަކީ ވެސް އާއްމުންގެ މެދުގައި ވަރަށް މަގުބޫލު ޑައިލޮގްތަކެކެވެ.