26 Oct 2024, 23:17
އިންގްލިޝް ޕްރިމިއާ ލީގުގައި އެސްޓަން ވިލާ އާއި ބޯންމޯތު ބައްދަލުކުރި މެޗު އެއްވަރުވެއްޖެއެވެ.
ވިލާގެ ދަނޑުގައި ކުޅުނު މި މެޗު ނިމުނީ އެއް ލަނޑު އެއް ލަނޑުން ދެޓީމު އެއްވަރުވެގެންނެވެ. ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ވިލާއިންނެވެ.
މި މެޗު ވިލާއިން ފަށާފައިވަނީ ވަރަށް ވަރުގަދަ ކޮށެވެ. ނަމަވެސް އެންމެ ފަހު މެޗުގައި އާސެނަލްގެ މައްޗަށް ހޯދި ކާމިޔާބީއާއެކު ބޯންމޯތުވެސް ފެނިގެންދިޔައީ އިތުބާރާއެކު ކުޅެމުންދިޔަ ތަނެވެ.
މި މެޗުގެ 28 ވަނަ މިނެޓުގައި ފޮވަޑް އޮލީ ވޮޓްކިންސް ނަގައިދިން ހުރަހަކުން ކެޕްޓަން ޖޯން މެކްގިން ވިލާއަށް ލީޑު ނެގައިދިން ކަމަށް ހީވި ނަމަވެސް ވީއޭއާރުން ވަރަށް ގިނަ އިރު ބެލުމަށްފަހު ވަނީ އެއީ ލަނޑެއް ނޫންކަމަށް ނިންމާފައެވެ.
ވީއޭއާރުން ބެލިބެލުމުން ވޮޓްކިންސް ބޯޅަ ހުރަސް ކުރުމުގެ ކުރިންވަނީ ބޭރުވެފައެވެ. މި މެޗުގެ ފުރަތަމަ ހާފުގައި ލަނޑެއް ފެނިގެން ނުދިޔަ ނަމަވެސް ދެޓީމުގެ ފަރާތުންވަނީ ބަލާހިތްވާކަހަލަ މޮޅު ކުޅުމެއް ފެނިގެން ގޮސްފައެވެ.
މި މެޗުގެ ފުރަތަމަ ލަނޑު ޖަހާ މެޗުގެ ލީޑު ނަގައިފާވަނީ ވިލާއިންނެވެ. މިލަނޑު އެޓީމަށް ކާމިޔާބު ކޮށްދިނީ 76 ވަނަ މިނެޓުގައި ރޮސް ބާކްލީއެވެ. މިލަނޑާއެކު މި މެޗު ވިލާއިން ކާމިޔާބު ކުރާނެކަމަށް ހީވިއިރު މެޗުގެ އިތުރު ވަގުތުގެ ކުޅުން ނިމެން ގާތްވުމާއެކު މިކަން ގިނަ ފަރާތްތަކަކުން ޔަގީންވެސް ކުރިއެވެ.
ނަމަވެސް މިދިޔަ ހަފްތާގައި އާސެނަލް ސިއްސުވާލި ބޯންމޯތުން ހިތްވަރު އެލުވާނުލާ މަސައްކަތް ކުރުމުގެ ނަތީޖާ އަކަށް ވެގެންދިޔައީ މެޗުގެ އެންމެ ފަހު ސިކުންތު ކޮޅުގެ ތެރޭގައި ލަނޑެއް ޖަހާ މެޗުގެ ނަތީޖާ ހަމަހަމަ ކުރުމެވެ.
މި ލަނޑު އެޓީމަށް ލިބިގެންދިޔަ ހިލޭ ޖެހުމަކުން ކާމިޔާބު ކޮށްދިނީ ދެވަނަ ހާފުގައި ކުޅެން އެރި ފޯވަޑް އެވަނީލްސަންއެވެ. އަދި މިލަނޑު ވެގެންދިޔައީ މި މެޗުގެ ފަހު ކުޅުމަށެވެ.
މި މެޗު އެއްވަރު ވުމުން ތާވަލްގެ ދެވަނައިގާ އުޅޭ ލިވަޕޫލާއި އެއް ޕޮއިންޓަށް ގާތްވުމަށް ވިލާއަށް ލިބިގެންދިޔަ ފުރުސަތު ގެއްލިގެން ގޮސްފައެވެ. ވިލާ މިހާރު އުޅެނީ 18 ޕޮއިންޓާއެކު ތާވަލްގެ ތިންވަނައިގައެވެ. އަދި ބޯންމޯތު އުޅެނީ 12 ޕޮއިންޓާއެކު ތާވަލްގެ 10 ވަނައިގައެވެ.