26 Oct 2024, 23:11
އިންގްލިޝް ޕްރިމިއާ ލީގުގައި އެންމެ ފަހުގެ ޗެމްޕިއަން މެންޗެސްޓާ ސިޓީ އާއި ސައިތެމްޕްޓަން ބައްދަލުކުރި މެޗު ސިޓީއިން ކާމިޔާބުކޮށް ތާވަލްގެ އެއްވަނައަށް އަރައިފިއެވެ.
ސިޓީގެ ދަނޑުގައި ކުޅުނު މި މެޗު އެ ޓީމުން ކާމިޔާބު ކޮށްފައިވަނީ 0-1 އިންނެވެ. ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ސިޓީއިންނެވެ. އަދި މި މެޗު ސިޓީއިން ފަށާފައިވަނީ ވަރަށް ފޯރީގައެވެ.
މިގޮތުން މެޗުގެ ފަސް ވަނަ މިނެޓުގައި ސިޓީއިން އުފެއްދި ހަމަލާއެއްގައި މެތިއަސް ނޫނޭސް ނަގާދިން ހުރަހަކުން ކާމިޔާބު ކޮށްދީފައިވަނީ އާލިން ހާލަންޑްއެވެ.
މިއީ މި ސީޒަންގައި ލީގުގައި އޭނާ ކާމިޔާބު ކުރި 11ވަނަ ލަނޑެވެ. މިލަނޑާއެކު މި މެޗުގައި ތާވަލްގެ ފަހަތުން ދެވަނައިގާ އުޅޭ ސައުތެމްޕްޓަން ކޮޅަށް ގިނަ ލަނޑު ތަކެއް ޖަހާފާނެ ކަމަށް ހީވެގެންދިޔަ ނަމަވެސް ސިޓީއަށް އެކަން ވާގޮތެއް ނުވިއެވެ.
މި މެޗުގައި ސިޓީއަށް އިތުރު ލަނޑެއް ނުޖެހުމުގައި ސައުތެމްޕްޓަން އިން ވަރަށް ރަނގަޅަށް ޓީމެއްގެ ގޮތުގައި ޑިފެންޑް ކުރުމުގެ އިތުރުން ސިޓިގެ ފޯވަޑް ލައިންގައި ކުޅެމުންދިޔަ ކުޅުންތެރިންގެ ނިންމުން އެހާ ރަނގަޅު ނުވުން ފާހަގަ ވެގެންދިޔައެވެ. މީގެތެރޭގައި ހާލަންޑްއަށް ލިބިގެންދިޔަ ފުރުސަތުތައް ވެސް ފާހަގަ ވެގެންދިޔައެވެ.
މި މެޗުގެ ދެވަނަ ހާފުގައިވެސް ދެޓީމުގެ ފަރާތުން ފެނިގެންދިޔައީ އެއް ގޮތް ކުޅުމެކެވެ. މިގޮތުން ސިޓީއިން ހަމަލާއަށް އިސްކަން ދީގެން ކުޅެމުންދިޔައިރު ސައުތެމްޕްޓަން ފެނިގެންދިޔައީ ޑިފެންސަށް އިސްކަންދީ ލިބޭ ފުރުސަތު ތަކުގައި ހަމަލާ އުފެއްދޭތޯ މަސައްކަތް ކުރަމުންދިޔަ ތަނެވެ.
އަދި މެޗު ނިމެން ގާތްވަމުންދިޔައިރު ސައުތެމްޕްޓަންއިން ލަނޑެއް ޖެހޭތޯ ކުރިއަށް އަރަމުންދިޔަ އިރު ސިޓީ ކޮންމެވެސް ވަރަކަށް ހާސްވެގެންދިޔަތަން ފެނިގެންދިޔައެވެ.
މިކާމިޔާބީއާއެކު ސިޓީއިން މިވަނީ ޕްރިމިއާ ލީގުގައި މެޗަކުން ބަލިނުވެ 32 މެޗު ހަމަކޮށްފައެވެ. އަދި މިހާރު އުޅެނީ ކުޅުނު ނުވަ މެޗުން ލިބިފައިވާ 23 ޕޮއިންޓާއެކު ތާވަލްގެ އެއްވަނައިގައެވެ.
ނަމަވެސް މާދަމާ ރޭ ލިވަޕޫލާއި އާސެނަލް ބައްދަލުކުރާ މެޗު ލިވަޕޫލް ކާމިޔާބު ކޮށްފި ނަމަ އަނެއްކާ ވެސް ލިވަޕޫލް ތާވަލްގެ އެއްވަނައަށް އެރުމުގެ ފުރުސަތު ލިބިގެންދާނެއެވެ.