26 Oct 2024, 17:36
އާޓިފިޝަލް ބީޗު ކައިރިން މިއަދު އެކްސިޑެންޓެއް ހިނގައި، އަންހެނަކަށް ފަރުވާދޭން ފަށައިފިއެވެ.
ފުލުހުން ބުނީ މިއަދު 16:10ހާއިރު އާޓިފިޝަލް ބީޗު ކައިރިން ކަފިހި ހުރަސް މަތިން ހިނގާފައިދިޔަ އަންހެނެއް ގައިގައި ކާރަކުން ޖެހި އެކްސިޑެންޓުވި މައްސަލައެއް ފުލުހުންނަށް ރިޕޯޓުކޮށްފައިވާ ކަމަށެވެ.
އަދި އެކްސިޑެންޓުގައި އަނިޔާވި މީހާއަށް ފަރުވާ ދިނުމަށް އޭޑީކޭ ހޮސްޕިޓަލަށް ގެންގޮސްފައިވާ ކަމަށް ފުލުހުން ބުންޏެވެ.
މި މައްސަލަ ފުލުހުން އަންނަނީ ތަހުގީގު ކުރަމުންނެވެ.
ކަފިހި ހުރަސްމަތިން މަގު ހުރަސްކުރަނިކޮށް މިމަހުގެ 10ގައި ތިން އަހަރުގެ ކުޑަކުއްޖެއްގެ ގައިގައި ވެސް ސައިކަލަކުން ޖެހި އަނިޔާވެފައިވެއެވެ.
މާލެ ސަރަހައްދުގައި އެކްސިޑެންޓުތައް ހިނގުން ގިނަވެފައިވަނިކޮށް ފުލުހުންވަނީ އެ ކަން ހައްލު ކުރުމަށް ޚާއްސަ އޮޕަރޭޝަނެއް ވެސް ފަށައިފައެވެ.
އަހަރުގެ މިހާތަނަށް ފުލުހުންނަށް ދެވަނައަށް އެންމެ ގިނައިން ހުށަހެޅިފައިވަނީ ވެސް، ޓްރެފިކް އެކްސިޑެންޓުތަކުގެ މައްސަލަތަކެވެ. އެ ގޮތުން އެކްސިޑެންޓުތަކާ ގުޅޭ 2،267 މައްސަލައެއް، އެ އިދާރާއަށް ރިޕޯޓު ކޮށްފައިވެއެވެ.