26 Oct 2024, 11:58
އެމެރިކާގެ މޭޖާ ލީގު ސޮކާ ކަޕްގެ ޕްލޭ އޮފްގެ ފުރަތަމަ ބުރުގައި އިންޓާ މައޭމީ އާއި އެޓްލާންޓާ ޔުނައިޓެޑްގެ މެދުގައި ކުޅުމަށް ހަމަޖެހިފައިވާ ބެސްޓް އޮފް ތުރީގެ ފުރަތަމަ މެޗު އިންޓާ މައޭމީއިން ކާމިޔާބު ކޮށްފިއެވެ.
އިންޓާ މައޭމީގެ ދަނޑުގައި ކުޅުނު މިމެޗު އެޓީމުން ކާމިޔާބު ކޮށްފައިވަނީ ދެ ލަނޑު އެއް ލަނޑުންނެވެ. ދެޓީމުގެ ފަރާތުން ވާދަވެރި ކުޅުމެއް ފެނުނު މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ އިންޓާ އިންނެވެ. މިމެޗު އިންޓާއިން ފަށާފައިވަނީ ވަރަށް ފޯރީގައެވެ. ނަތީޖާއަކަށް ވީ މެޗުގެ ދެ ވަނަ މިނެޓުގައި ލުއިސް ސުވަރޭޒް ޖަހާދިން ލަނޑުން އެޓީމުން މެޗުގެ ލީޑު ނެގުމެވެ.
މިމެޗުގައި އެޓްލާންޓާއިން އެއްވަރު ކުރި ލަނޑު މެޗުގެ 39 ވަނަ މިނެޓުގައި ކާމިޔާބު ކޮށްދިނީ ސަބާ ލޮބްޒަނިޑްޒީއެވެ. މިއީ މިސީޒަންގައި އޭނާ އިންޓާ ކޮޅަށް ޖެހި ހަތަރު ވަނަ ލަނޑެވެ. ފުރަތަމަ ހާފުގައި އިތުރު ލަނޑެއް ނުފެނުނު ނަމަވެސް ލަނޑު ޖަހާނެ ރަނގަޅު ފުރުސަތު ދެޓީމަށްވެސް ލިބުނެވެ.
މީގެ ތެރެއިން ވެސް އިންޓާގެ ކެޕްޓަން ލިއޮނެލް މެސީއަސް ލިބުނު ފުރުސަތުތައް ފާހަގަވިއެވެ. މިގޮތުން މިހާފުގައި މެސީ ފޮނުވާލި ހަމަލާއެއް އެޓްލަންޓާ ގޯލްގެ ދަނޑުގައި ޖެހިފައި ނިކުން އިރު އިތުރު ދެ ހަމަލާއެއްވަނީ އެޓީމުގެ ކީޕާ ބްރެޑް ގުޒާމް ދިފާއު ކޮށްފައެވެ.
މިމެޗުގެ ދެވަނަ ހާފުގައި ވެސް އިންޓާއިންވަނީ ލަނޑެއް ޖަހާ މެޗު ކާމިޔާބު ކުރުމަށް ކުރަމުންދިޔަ މަސައްކަތް ތަކުރާރު ކޮށްފައެވެ. އަދި އެޓީމުން ކުރަމުންދިޔަ މަސައްކަތް ކާމިޔާބުވީ މެޗުގެ 60 ވަނަ މިނެޓުގައެވެ. މެސީ ތަނަވަސްކޮށްދިން ފުރުސަތެއްގައި މިލަނޑު އިންޓާއަށް ކާމިޔާބު ކޮށްދިނީ ޖޯޑީ އެލްބާއެވެ. މިމޗުގައި އިތުރު ލަނޑެއް ފެނިގެން ނުދިޔަ ނަމަވެސް ލަނޑު ޖަހާނެ އިތުރު ފުރުސަތު އިންޓާއަށް ލިބުނުކަން ފާހަގަވިއެވެ.
މިކާމިޔާބީއާއެކު ޕްލޭ އޮފްގެ ފުރަތަމަ މެޗު އިންޓާ މައޭމީއިން ކާމިޔާބު ކޮށްފައިވާއިރު މިދެ ޓީމުގެ މެދުގައި ކުޅުމަށް ހަމަޖެހިފައިވާ ދެވަނަ މެޗު ނޮވެމްބަރު މަހުގެ ދެ ވަނަ ދުވަހު ކުޅުމަށް ހަމަޖެހިފައިވަނީ އެޓްލާންޓާގެ މާސިޑީޒް ބެންޒް ސްޓޭޑިއަމްގައެވެ. އެމެޗު އެއްވަރުވެ ނުވަތަ އިންޓާ މޮލުވެއްޖެނަމަ ތިންވަނަ މެޗަކަށް ދާކަށް ނުޖެހޭނެއެވެ. ނަމަވެސް އެމެޗު އެޓްލާންޓާ ކާމިޔާބު ކޮށްފިނަމަ ތިންވަނަ މެޗު ނޮވެމްބަރު މަހުގެ ނުވަ ވަނަ ދުވަހު އަނެއްކާ މައޭމީގެ ޗޭސް ސްޓޭޑިއަމްގައި ކުޅޭނެއެވެ.
މެޗަށްފަހު ވާހަކަ ދައްކަމުން އިންޓާގެ ކޯޗު ޖެރާޑޯ މާޓީނޯ ހާމަކުރިގޮތުގައި މިއީ ކުރިއަށް އެޅިގެންދިޔަ ވަރަށް މުހިންމު ފިޔަވަޅެއް ކަމަށެވެ. އޭނާ ހާމަކުރިގޮތުގައި އެޓްލާންޓާއަކީ ރެގިއުލާ ސީޒަންގައި އިންޓާއަށް ބަލިނުކުރެވި އޮތް ހަތަރު ޓީމުގެ ތެރެއިން އެއް ޓީމެވެ. އެހެން ކަމުން ޕްލޭ އޮފް ގައި އެޓީމުގެ މައްޗަށް ކުރި ހޯދުން އެއީ ރަނގަޅު ފެށުމެއް ކަމަށް އޭނާ ސިފަކުރިއެވެ.