26 Oct 2024, 10:43
އިންގްލިޝް ޕްރިމިއާ ލީގުގައި ނޮޓިންހަމް ފޮރެސްޓް އާއި ލެސްޓާ ސިޓީ ބައްދަލުކުރި މެޗު ފޮރެސްޓް އިން ކާމިޔާބު ކޮށް ލީގުގެ ފަސްވަނައަށް ކުރިއަށް ޖެހިލައިފިއެވެ.
ލެސްޓާގެ ދަނޑުގައި ކުޅުނު މިމެޗު ފޮރެސްޓް ކާމިޔާބު ކޮށްފައިވަނީ ތިން ލަނޑު އެއް ލަނޑުންނެވެ. ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ގިނައިރު ލެސްޓާއިން ބޯޅަ ގެންގުޅުނު ނަމަވެސް ގިނަ ހަމަލާ އުފައްދާފައިވަނީ ފޮރެސްޓް އިންނެވެ. އަދި މިމެޗުގައި ލެސްޓާ ކޮޅަށް ވަން ތިން ލަނޑު ވެސް ވަދެފައިވަނީ އެޓީމުގެ ކުޅުންތެރިންނަށް ހެދުނު ގޯސް ތަކުގެ ފައިދާ ފޮރެސްޓް އިން ނަގައިގެންނެވެ.
ނަމަވެސް ފޮރެސްޓް އިން ވަނީ މިމެޗުގައި ލެސްޓާއަށްވުރެ ނުރައްކާ ތެރި ހަމަލާތަކެއް އުފައްދާފައެވެ. މިމެޗުގެ ފުރަތަމަ ލަނޑު ޖަހާ މެޗުގެ ލީޑު ނަގައިފާވަނީ މެޗުގެ 16ވަނަ މިނެޓުގައި ފޮރެސްޓް އެވެ. ލެސްޓާގެ ފަކުންޑޯ ބޮނަނޯޓޭ އަތުން އަމިއްލަ ހާފުގެ ތެރެއިން ބޯޅަ ގެއްލުމުގެ ފައިދާ ނަގާ މިލަނޑު ފޮރެސްޓްއަށް ކާމިޔާބު ކޮށްދީފައިވަނީ ރަޔަން ޔޭޓްސްއެވެ. ނަމަވެސް މިލީޑު ފޮރެސްޓަށް ދެމެހެއްޓޭވަރުވީ މެޗުގެ 23ވަނަ މިނެޓާ ހަމައަށެވެ.
ލެސްޓާގެ ތަޖުރިބާކާރު ފޯވަޑް ޖެމީ ވާޑީ ވަނީ މިމެޗުގައި އެޓީމުން ކާމިޔާބުކުރި ހަމައެކަނި ލަނޑު ކާމިޔާބު ކޮށްފައެވެ. މިލަނޑާއެކު ލެސްޓާގެ ކުޅުން ރަނގަޅު ވެގެންދާނެކަމަށް ހީވި ނަމަވެސް މިހާފުގައި ދެންވެސް ފެނިގެންދިޔައީ ފޮރެސްޓް އިން ލެސްޓާގެ ގޯލަށް ނުރައްކާ ކުރަމުންދިޔަ ތަނެވެ. ނަމަވެސް މިއިން އެއްވެސް ހަމަލާއެއް ކާމިޔާބު ވާގޮތެއްނުވިއެވެ.
މިމެޗުގެ ދެވަނަ ހާފު ވެގެންދިޔައީ ފޮރެސްޓް އިން އެޓީމުގެ ކުޅުން އިތުރު ހަރުފަތަކަށް ކުރިއަށް ޖައްސާލާފައިވި ހާފަކަށެވެ. އަދި ދެވަނަ ހާފުގެ ކުޅުން ފެށިތާ ދެ މިނެޓް ފަހުން ފޮރެސްޓަށް މިމެޗުގައި ދެވަނަ ފަހަރަށް ލީޑު ނަގައިދިނީ ކްރިސް ވުޑްއެވެ. އަދި މެޗުގެ 60ވަނަ މިނެޓުގައި ވުޑް ވަނީ ފޮރެސްޓްގެ ލީޑު ފުޅާވެސް ކޮށްދީފައެވެ. މިއީ ލީގުގައި މިފަހަރު ވުޑް ކާމިޔާބު ކުރި ހަތްވަނަ ލަނޑެވެ. މިއާއެކު ވުޑްއަށް ވުރެ ގިނައިން މިހާރު ލަނޑު ޖަހާފައިވާ ހަމައެކަނި ކުޅުންތެރިޔަކީ އާލިން ހާލަންޑްއެވެ. އެއީ 10 ލަނޑެވެ.
މިކާމިޔާބީއާއެކު ފޮރެސްޓް މިސީޒަންގައި މިހާތަނަށް ނުވަ މެޗު ކުޅެފައިވާއިރު އެޓީމު ބަލިވެފައިވަނީ އެންމެ މެޗަކުންނެވެ. އަދި މިހާރު އުޅެނީ 16 ޕޮއިންޓާއެކު ތާވަލްގެ ފަސް ވަނައިގައެވެ. ލެސްޓާއަށް ބަލާއިރު 2021ވަނަ އަހަރުގެ ޖެނުއަރީ މަހަށް ފަހު ޕްރިމިއާ ލީގުގައި ޖެހިޖެހިގެން ތިން މެޗުން މޮޅުވުމަށް ކުރަމުންދިޔަ އުންމީދު މިވަނީ ކާމިޔާބުވާ ގޮތް ނުވެފައެވެ. އަދި އެޓީމު އުޅެނީ ނުވަ ޕޮއިންޓާއެކު ތާވަލްގެ 14 ވަނައިގައެވެ.