26 Oct 2024, 09:53
ބޮލީވުޑްގެ އެކްޓަރު ވިކްރާންތު މަސޭ ޖެހިލުން ކުޑަ ނޫސްވެރިއެއްގެ ރޯލް ކުޅޭ ފިލްމު "ދަ ސަބަރުމާތީ ރިޕޯޓު"ގެ ޓީޒާ ބެލުންތެރިންނަށް ދައްކާލައިފިއެވެ.
ވިކްރާންތުގެ އިތުރުން ސައުތު ސިނަމާގެ ބަތަލާ ރާޝީ ކަންނާ ވެސް ނޫސްވެރިއެއްގެ ރޯލް ކުޅޭ މި ފިލްމަކީ އިންޑިއާގެ ގިނަ ބައެއްގެ ހިތަށް ބިރުވެރިކަން ގެނެސްދިން ތާރީޚީ ހާދިސާ 'ގޯދުރާ ޓްރެއިން ބާނިންގް'ގެ މައްޗަށް ބިނާކޮށް އުފައްދާ ފިލްމެކެވެ.
މި ފިލްމުގައި ދައްކުވައިދޭނީ 2002 ވަނަ އަހަރު އިންޑިއާގެ ހިންދޫންގެ 59 މީހަކު އިންޑިއާގެ އުއްތަރު ޕްރަދޭޝްގެ އަޔޯދިޔާއިން ހިންދޫންގެ ޚާއްސަ އަޅުކަމެއް ނިންމުމަށްފަހު އެނބުރި އެމީހުން ދިރިއުޅޭ އަވަށްތަކަށް ދަތުރު ކުރި މަގުމަތީގައި ހިނގި އަލިފާނުގެ ހާދިސާގެ ވާހަކައެވެ.
ފިލްމު "ދަ ސަބަރްމަތީ ރިޕޯޓު"ގެ ޕޯސްޓަރެއް--ފޮޓޯ/ ބޮލީވުޑްހަންގާމާ
މި ހާދިސާގައި އިންޑިއާގެ ގޯދުރާ ރޭލްވޭ ސްޓޭޝަންއިން ދަތުރުކުރި 59 މީހުންނާ އެކު އެމީހުންނަށް އެހީތެރިވެދިނުމަށް ދަތުރުކުރި މީހުން ވެސް މަރުވިއެވެ. މިހާތަނަށް ވެސް މި ހާދިސާ ހިނގަން މެދުވެރިވި ސަބަބު ހޯދިފައިނެތް އިރު އިންޑިއާގެ ގުޖުރާތަށް ނިސްބަތްވާ ބަޔަކު އޭރު މި ހަމަލާގެ ޒިންމާ އެޅުވީ އިންޑިއާގައި ދިރިއުޅޭ މުސްލިމުންގެ ބޮލުގައެވެ.
މި ފިލްމުގައި ވިކްރާންތު އާއި ރާޝީ ކަންނާ ކުޅޭނީ އެ ދުވަސްވަރު މި ހާދިސާގެ ހަގީގަތް ހޯދަން އެއްވެސް ސިހުމެއްނެތި މަސައްކަތްކުރި ވަރަށް ކެރޭ ދެ ނޫސްވެރިންގެ ރޯލެވެ. މި ހާދިސާގެ ހަގީގަތާ އެކު އެ ކަމުގެ ހަގީގީ ޒިންމާ ނަގަންޖެހޭ މީހުންނާ އެކު އެ ދުވަސްވަރު ގޯސް މައުލޫމާތު މީޑިއާއަށް ފޯރުކޮށްދިން މީހުންގެ ސަބަބުން ކުރިމަގުގައި ގިނަ ބައެއްގެ ދިރިއުޅުމަށް ކުރާނެ އަސަރު މި ފިލްމުން ބެލުންތެރިންނަށް ދައްކުވައިދޭނެއެވެ.
ދީރަޖު ސަރުނާ ޑައިރެކްޓްކުރާ މި ފިލްމަކީ އެކްތާ ކަޕޫރު ޕްރޮޑިއުސްކޮށް އެކްތާގެ ފިލްމު ބާލާޖީ ޓެލެފިލްމްސްއިން ގެނެސްދޭ ފިލްމެކެވެ. ކުރިޔަށް އޮތް ނޮވެމްބަރު މަހުގެ 15ގައި ފިލްމު ސިނަމާތަކަށް ގެންނަން ނިންމާފައިވާއިރު ޒީ ސްޓޫޑިއޯއިން ފިލްމު ވަރަށް އަވަހަށް ޕްރީމިއާ ކުރާނެ ކަމަށް ބާލާޖީ ޓެލެފިލްމްސްއިން ވަނީ ބުނެފައެވެ.